Read zande Yesaya 60 Bible Online

Yesaya 60 - zande bible

Yesaya 60

¹Oni gúari, oni hási rago: bambiko gaoni imarago ye, na gu taarimo nga ga Yekova ye ku ri roni

²Bambiko oni ngere, bitimo adáda kpotosende, nduunduu bitimo ki dadi aboro; ono Yekova ayé ku ri roni, i abi gako taarimo ku ri roni

³Arikaaboro aye sa gaoni imarago, na abakindo sa gaoni naima imarago.

⁴Oni túka nga bangironi ka ngera nga kirikiri, ka bi nga; i dungura tiyo adungura wa sa dunduko, i naye kono du oni ni; awironi nga akumba ayé gii ngbi yo, aboro atínda awironi nga ade kina be yo.

⁵Si du oni abi he rago ki ha fu roni, kpotoroni yo ki nikio ki du na wasa; bambiko aúbaime tikpo du kpaima akáraga tihe koyo du oni ni, gu kumuko nga ga arikaaboro ayé fu roni.

⁶Rimbasa akameri adáda roni, paranga akameri nga ga aMidiano ra na ga Efa ra; ami ayé dunduko Seba yo. Ami ayé na dahabu na tome fuõngua, ki nitaki pande pa Yekova ni tambuahe.

⁷Agu arimbasa akandoro dunduko du Kedara yo adungura tira sa koyo du oni ni, agu abaakandoro du Nebayota yo amánga pa roni; ami ayé wa gu he idi mi paha ku ri gi bamotumo, mi ki taasi pa gi bambu taarimo.

⁸Ada nga agi yo naya wa dubo re, wa ambipo sa gaami abangiri abambu?

⁹Agu aringara du ti ngba gango baime asúnguda re, na agu abaakurungba nga ga Tarusisa mbata, ka yega na awironi gii ngbi yo, na gayo feda na gayo dahabu be yo a, tipa rimo Yekova gaoni Mbori, na tipa ga Yisaraere Ziazia Ko, bambiko ko taasi rimoroni.

¹⁰Kungba aboro adúa gaoni angapa bakporo, gayo abakindo amánga pa roni; bambiko mi nga Yekova amangi roni ni gi zinga, ono mbiko gi weneringise ini mi pai fu roni ti ni.

¹¹Gaoni angbadimo bakporo adú ni zaza ha a kindi; i akisa nga ha uru na yuru a te; ya aboro niye na kumuko fu roni nga ga arikaaboro, na gayo abakindo ki ye ni zizi yo a.

¹²Bambiko gu rikaaboro na gu ngbi nikara nga fu roni ya, i akpí akpi; agu arikaaboro re i agbárasa yo kpakaya.

¹³Gu taarimo nga ga Rebanona ayé fu roni, nga ngua kupuresa, na degbe, na gu kura ha wa kupuresa a, ka mbakada ngbanya gu ba nga ga gi kparakpara ba; mi amánga ba ndure ni taasitaasi he.

¹⁴Awiri agu yo naarungosi roni i ayé ki tumusa fu roni; agu yo dú napayasi roni i anúgadi pati nduroni; i ayá ti roni, gu Bakporo nga ga Yekova nga Siona nga ga ga Yisaraere Ziazia Ko.

¹⁵Wa i ambu roni ki nisogo roni, ya ka boro susi nga yo du oni ni ya, mi asá roni ni nyenye abadukuriapai, ni ũngbarago fu gu rika ngbatunga aboro dati gu rika ngbatunga aboro.

¹⁶Oni ambira gu mamuanya nga ga arikaaboro a, ki niha mamu abakindo; oni aina ha ya mi nga Yekova, nga gaoni Batasi nga gu Ko natumo roni, nga gu Ko nga ga Yakoba Iraome.

¹⁷Mi ayé na dahabu ku ba sirigi, mi ki ye na feda ku ba kpano; na ku ba ngua, mi ki ye na sirigi, ku ba ambia mi ki ye na marã. Mi afú zereda fu gaoni abarukuriapai a, na rurupai fu gaoni abarugupasunge.

¹⁸I agia nga pa mangapai ni zuu rogo gaoni ringara berewe te, pa nyasa he gbua na pa kuadirago rogo gaoni bangbandarago berewe a te; oni ayá ti gaoni angapa bakporo, Bata, na gaoni akpuguru bakporo, Tambuahe.

¹⁹Uru adú nga berewe fu roni ni gaoni imarago uru te, na imaima ima diwi si ahása nga rago ku ri roni yuru a te; ono mi Yekova nikadu fu roni ni nyenye imarago, na gaoni Mbori nikadu ni gaoni taarimo

²⁰Gaoni uru ati nga berewe te, gaoni diwi adia nga tiru ku sa yo a te; bambiko mi adú ni gaoni nyenye imarago, arame gaoni kparakpe adiga adiga.

²¹Gaoni aboro dunduko adú ni ruru yo; i adia kumbo ringara nye anye kindi, wa tomo ngua nga gu mi aru he, gu sunge nga ga bere, ya mi du ni taasitaasi re.

²²Gu umba pa boro adú wa ngbatunga kutu sa, gu toni ni ki ngia nyanyaki rikaaboro; mi nga Yekova; mi nikaipisa paha ti ragoho.