Read zande Yesaya 62 Bible Online

Yesaya 62 - zande bible

Yesaya 62

¹Mi aónga nga tipa ga Siona pai te, na tipa ga Yerusarema pai mi aóngoda nga te, daho gaha ruru ngbanga ka ndu ni ku mbata yo wa imarago, na gaha bata wa we atara nakĩ.

²Ono arikaaboro abí gaoni ruru ngbanga, abakindo dunduko abí gaoni taarimo; i ayámba roni na vovo rimo, nga gu Yekova ka yamba ha.

³Oni adú ni kpakpari ngbanya bakindo ku be Yekova, ni ga akindo fongo asiapaapai a ku be gaoni Mbori.

⁴I ayámba nga roni Mbumbu Aboro berewe te, i ayá nga ti gaoni ringara Ngbakungba berewe a te; ono i ayá ti roni Gi Ngbarago du rogo ri yo, na gaoni ringara nga Didi de; mbiko rago angba ti Yekova mbiko roni, gaoni ringara adú wa didide.

⁵Mbiko wa paranga nadia ngasu de, wo awironi ka dia roni, wa badide nangi tipa didide, wo gaoni Mbori ka ngi tipa roni a.

⁶Ako Yerusarema, mi moi ababa ndarago ri gamo angapa bakporo, i aónga nga uru na yuru wa sa te. Oni nga ga Yekova abatingidipai ka oni óngodi nga wa sa ya,

⁷ki fu ongoda fu ko a ya, daho ko ka nyakasa pa Yerusarema ni, ka manga ha ni tambuatambua he auru kpotosende no.

⁸Yekova zunga he ni kumbabeko, na ni gu ome nga ga kumbabeko; “Ni rengo mi afú nga gaoni zende ahe berewe si du ni riahe fu avuraroni te, kungba aboro ambira nga gu gaoni imekakue oni amangi sunge he te;

⁹ono agu yo nake he i ari he ari ki tambua re nga Yekova, agu yo nadungura ha i ambira ha vurukporo gi kparakpara ziazia ba yo.”

¹⁰Oni kúru, oni kúru rogo angbadimo bakporo, oni mbákadi gene tipa aboro; oni sári he du, oni sári bagene, oni rógodi ambia ku sa yo, oni túmba yuguyuguhe ku ari fú aboro.

¹¹Oni ngére, Yekova taki pande pai si da kuti digida kpotosende yo: Oni yá fu aboro Siona, “Oni ngére, gaoni bata naye; oni ngére, gako mosoro du beko, na gako irabape ye mbata yo fu ko.”

¹²I ayá ti yo Gu kparakpara ziazia aboro, Ga Yekova tumotumo yo; i ayá ti roni, Oni i agbata roni, nga gu bakporo i ambu nga ha ya.