Read zande Yesaya 63 Bible Online

Yesaya 63 - zande bible

Yesaya 63

¹Da nga gi ni naye Edome yo re, na zamba roko ti ni Bosura yo, gi ni re du ni taasitaasi ni be gani ukadiukadi roko, nandu be ome gani tandu? “Mi du nga gu ko nafura tipa ruru ngbanga, du na tandu ka batasa aboro.”

²Tipagine du ga roko ti ni ni zamba ha? na ga baukadi wa kina ga gu ni nasimba he bapira imekakue yo?

³“Mi simbi he bapira imekakue yo ni sa re, ono dagba aboro gu ni adu nga yo na mi wa sa te; mi andu auru yo ni gi zinga ki simbi yo ni gi ngariangaria zinga; kureyo du ni migidimigidi he ti gimi aroko, si atakadi gimi aremu dunduko.

⁴Bambiko rago irabape adu kpotore yo, garã agu yo mi atumo yo si da.

⁵Mi ki ngere, ono boro adu nga ho sa ka unda pai te; si ki iriwo ti re, wa boro adu nga ho sa ka asongodi pai a ya; si du kina bere aye na bata ti ni fere; gi ngariangaria zinga si asongodi re.

⁶Mi asimbi aboro ku sande ni gi zinga, ki mangi yo i kpi gi ngariangaria zinga, mi ki uka kureyo ku auru kpotosende.”

⁷Mi apé pa gu weneringise nga ga Yekova, na pa tambua Yekova, ku sangba agu apai du Yekova afu fu rani, na pa gu bakere weneapai du fu ngbatunga Yisaraere, nga gu ko afu fu yo ku sangba gako inapai yo, na ku sangba gako weneringise yo du ni dungu he.

⁸Bambiko ko aya, I nga gimi aboro, ni rengo, nga agu agude nikamanga nga pai ni biriki ya; si du ko adu ti ni ni gayo Batasi.

⁹I aimisi ko rogo gayo aimisiri dunduko, gu maraika du bara bangiriko abatasi yo; ko atumo yo mbiko gako nyemuse na gako nunga; ko atumba yo ki nitindi yo ti agu arago dunduko naadu bakuru yo.

¹⁰Ono i asa mungu, ki rungosi gako ziazia Toro; si du ko asa tiko ti ni ka du ni vurayo, ko ni tiko naso vura kuti yo.

¹¹Si du ko atingidi pa gu rago ti ni naadu bakuru yo, rago Mose na pa gako aboro. Wari du gu ko ni naakusi yo baime yo nga babanda gako akandoro? Wari du gu ko ni naamoi gako ziazia Toro dagba yo?

¹²nga gu ko namangi taasitaasi beko si du ku kumbabe Mose yo, nga gu ko nakparaka ime bara bangiriyo ka maa nyenye rimo fu tiko,

¹³nga gu ko nangbe fu yo ku mbata yo rogo angirimo, wa farasi rogo ngbakungba, ka i akotoka nga ya.

¹⁴Wa agu anya nazorã ku ngboo ngboorago yo, wo ga Yekova Toro aidi pa ongoda fu yo. Wo mo angbe ku mbata yo fu gamo aboro, ka maa rimoro si du foro ni taasitaasi he.

¹⁵Mo ngére ngbangbaturũ yo ku sende no, ti gu baraka nga ga ga ziazia pai na ga taarimo. Wari du ga kenapai ni na ngarã? Mo ka na pa ga manga pa re na pa nungare.

¹⁶Bambiko mo nga Barani, wa Abarayama avura nga ina rani ya ka Yisaraere aida nga pa rani a ya; Ako Yekova, mo tigamo nga Barani, nga gu Ko natumo rani rimoro adu bakuru yo nye anye kindi.

¹⁷Ako Yekova, tipagine ingisi mo rani ti ni ani ingi ti gamo agene ki nyakasi ngbadurani yo ka ani agunde nga ti ro ya? Mo káraga tiro mbiko gamo amoyambu nga agu aboro mo asia yo i du ni gamo yo.

¹⁸Ga ziazia ba adu be gamo kparakpara ziazia aboro ngbutuko; ono avurarani asimbi he ku sande.

¹⁹Ani sa tirani wa agu yo mo azoga nga yo wa sa ya, wa agu yo i ayamba nga yo ti rimoro a ya.