Read zande Yesaya 65 Bible Online

Yesaya 65 - zande bible

Yesaya 65

¹Yekova aya: “Mi aidi he agu yo ata sana nga he tipa re ya, i gbata re; agu yo bi re naagbata nga re ya.” Mi aya, “Mi du re, mi du re,” fu gu rikaaboro akpara nga ti rimore ya.

²Mi nataã bere na uru pitipiti fu airasamungu, nata rogo gu pai angba nga ya, ki nipeke kina fuo gayo sangaapai;

³nga agu aboro nagara gi zinga kuti yo kina ku bangire kindi, nifu motumo rogo aati ki nizo wene fuõngua auru abiriki;

⁴nga agu yo sungu dagba amurã, ki niraki rogo okooko aba; nari pasio amukuru, ime pasio anyakorokpa du rogo gayo aakoro;

⁵nga agu yo naya, “Sa gamo na ni, ka mo yé nga ki mbedi na mi ya, bambiko mi kpara tire ziazia ti ro.” Agi yo re du wa ngime ore yo, wa gu we nagbi agbi pitipiti na uru.

⁶Mo ngére, si ni keke he ku bangire: “Mi aónga nga te, ono mi aira bape he, ii, mi aira bape ku ngbaduyo yo

⁷tipa gayo irairaapai, na ga abayo irairaapai a wa sa, bambiko i azo wene fuõngua ri abaagangara yo ki nigberẽ ngbayo yo fere ri agangara yo, si du mi ka ringbisa mosoro gayo kuru mangapai ti ni kina ku ngbaduyo yo.”

⁸Ya Yekova wẽ: “Wa i nibi vovo imekakue kporo kakue yo, i ki ya, ‘Ka mo gbárasi nga ha ya, bambiko maku du rogo ho yo,’ wo mi ka manga mbiko kina gimi amoyambu, ka mi agbárasa nga yo dunduko ya.

⁹Mi akúsa angbatunga rogo Yakoba yo, na adikumbo gimi abaagangara dagba ngbatunga Yuda yo; gimi siasia yo nikadia ha ni gayo, gimi amoyambu nikaraka yo.

¹⁰Sarona adú ni banambu tipa rimbasa akandoro, na Ngboongboorago Akora yo adú ni baraka anya, tipa gu gimi aboro naagbata re.

¹¹Ono agu roni mbu Yekova, go bangironi ti gi kparakpara ziazia bagangara, nambakada ba sa inaapai ni sino Adoavure, nahisa inga na kodikodi imekakue fu Abairatandu;

¹²mi akpára roni sa basape, oni dunduko anúgadi sa imo roni; bambiko, ho mi ayambu he ni, oni akaraga nga pai te, ho mi afura ni, oni adega nga turoni sa ni te, ono oni amangi gu pai gberẽ agberã bangire, ki sia gu pai rago angba nga ti re be he ya.”

¹³Si du ya Gbia MBORI wẽ: “Oni ngére, gimi amoyambu ari he, ono oni adú na gomoro; oni ngére, gimi amoyambu ambira he, ono oni adú na gomoro ime; oni ngére, gimi amoyambu angi, ono oni adú na zee;

¹⁴Oni ngére, gimi amoyambu abí bia mbiko ngbarago kpotoyo yo, ono oni akpára kpe mbiko rungo kpotoroni yo, oni ayóra wawa mbiko gu fudifudipai nga ga toro.

¹⁵Rimoroni anyé wa motiwa fu gi siasia yo, mi nga Gbia MBORI aimo roni; ono mi ayámba gimi amoyambu na kura rimo.

¹⁶Si du gu ni nasambua tini kpoto sende no ni asámbua tini a mbiko gu Mbori nga ga rengo, na gu ni nazunga he kpotosende no ni azúnga he mbiko gu Mbori nga ga rengo a; bambiko bangirise go ti fudifudiapai naadu mbata bambiko si ni okooko ho ti bangire.

¹⁷“Bambiko, oni ngére, mi mangi vovo angbangbaturũ na vovo kpotosende a; i atingida nga pa gu bambata apai te si ayé nga ku berãyo yo a te.

¹⁸Ono oni dú na ngbarago ki ningi nye anye kindi tipa gu pai mangi mi he re; bambiko oni ngére, mi mbakadi Yerusarema ni bangi, na gaha aboro na ngbarago

¹⁹Ono mi angi mbiko Yerusarema, ki du na ngbarago mbiko gimi aboro; i agia nga woro kparakpe rogo ho yo berewe te, na kperungo berewe a te.

²⁰Fogo gude adú nga yo nikaima ngbutuko berewe te, na gbinza boro atá digisa nga gani arame rengbe a ya, mbiko gude akpi fuo garã 100, boro ingapai du garãni 100, ni adú ni tiwatiwa ni.

²¹Iadúdua abambu ki niraki rogo; i aruka bakakue aati yo ki niri zuzuhe.

²²I adúa nga bambu kura aboro ki raki rogo ho te; i aru nga he kura aboro ki ri he te; bambiko wa gu rame nga ga ngua wo rame gimi aboro nikadu, gimi siasia aboro ará zezeredi tipa gbanga rago mbiko gu mangapai nga ga beyo.

²³I amánga nga sunge gbua te, i abátika nga agude tipa tunguotunguo gbudagbuda te; mbiko i adú ni atita agu aboro maku nga ga Yekova yo, na awiriyo wa sa na yo.

²⁴Ono si ayé ka du wa gere mbata i nikayamba he, mi akáraga pai, ho i nafura ni mi agia ha agia.

²⁵Waru na wiri kandoro arika wa sa, bahu ari kazimorú wa babagara; nvutu nikangia ga wo riahe. Ami aímisa nga aboro ki nigbarasi yo ri gi kparakpara ziazia bagangara yo te, wo poi Yekova.”