Read zande Pa Amotume 10 Bible Online

Pa Amotume 10 - zande bible

Pa Amotume 10

¹Were aNadaba na Abiu nangia awiri Arona ki rogo gayo aũzokingire ni ba sa sa, ki uka we ku rogo ho, ki moi fuõngua ku ri he, ki fu he na kungba we ku bangiri Yekova nga gu pai ko aruga nga pa ha fu yo ya.

²We ki kuru yo du Yekova ni, ki riti yo, i ki kpiki kina ku ho bara bangiri Yekova.

³Si du Mose ki ya fu Arona. “Gere nga gu pai Yekova agumba pa ha wa ko aya, ‘Mi adú ni kparakpara re ziazia fu agu yo nambeda na mi, mi adu ni taasitaasi re bara bangiri aboro dunduko.’ ” Arona ki ongo aonga kit.

⁴Mose ki yambu aMisaere na Eresafana nangia awiri Uziere nangia tame ba Arona, ki ya fu yo, “Oni yé kono ka tinda akuaroni kparakpara ziazia ba no ku zegi yo ku gii bataya yo.”

⁵Si du i ambedi ti ni, ki tindi yo na gayo aroko kuari ku zegi yo gii bataya yo, a wa Mose nigumba ha.

⁶Mose ki ya fu Arona na fu awiriko nangia Erazara na Itamara, “Ka oni nimbú nga mangerironi ni zakizaki he ni gbanga ha ya, ka oni sípi nga gaoni aroko a ya, oni ka kpika, zinga ka ye be Yekova ku ri rimbasa aboro dunduko. Ono awirinaroni nga angbatunga aYisaraere dunduko i kpári kpe tipa agu aboro Yekova tigako nizo yo.

⁷Ka oni akúra nga ti ngbadimo bamburoko dungurati ku zegi yo ya, oni ka kpika; bambiko ga Yekova nzeme mbeda du ti roni.” I ki mangi he kuti sangba Mose.

⁸Yekova ki gumba pai fu Arona ki ya,

⁹“Ka mo mbíri nga imekakue watadu baripiro, mo na awiro a ya, ho oni narima ni ku bamburoko dungurati yo, oni ka kpika. Si adú ni rugapai nye anye kindi fu rika ngbatungaroni.

¹⁰Si oni ka ina kparaka dagba gu he du ni kparakpara ha ziazia na gu he du ni kungba he, dagba gu he du ni birikobiriko he na gu du ni gigiri he a;

¹¹oni ka yugo pa agu arugapai dunduko fu awiri aYisaraere nga gu gumba Yekova fu yo ku ngba Mose.”

¹²Mose ki ya fu Arona na fu agu awiriko nanye nangia Erazara na Itamara, “Oni di gu motomo riahe nga gu nanye dagba amotumo mangi yo no ni we tu Yekova, ki ri he zanga agbooro ti ni pati bamotumo yo, bambiko si du ni kparakpara he ziazia susi;

¹³oni arí he rogo kparakpara ziazia ba yo, bambiko si nga gamo he, na ga awiro he a rogo amotumo nga ga Yekova mangi yo ho ni we, bambiko wo rugu Yekova re na ni.

¹⁴Ono gu ngbadu nya nga gu wo yo ti ni na tumbatumba mboso nya fu yo ho, oni arí he rogo gigiri ba, mo na agu awiro nga akumba na agu awiro nga ade wa sa; bambiko i fu he foro ni gamo he, ni ga awiro he a rogo agu amotumo nga ga amotumo zereda nga ga awiri aYisaraere.

¹⁵Gu tumbatumba mboso nya ye yo na ni na gu ngbadu nya wo yo ti ni, si i ka ye na ni na agu amotumo nzeme mangi yo ho ni we, ka wo ti ni ni wowoti motumo ku bara bangiri Yekova, si adú ni gamo he, na ga awiro he a, ni rugapai nye anye kindi; a wa Yekova arugu pa ha.”

¹⁶Mose ki sana he kpekpekpe tipa gu meme nga ga motumo ingapai ru, atikawari, i aima zo ru! Ko ki zingi fu Erazara na fu Itamara nangia agu awiri Arona nanye, ki ya,

¹⁷“Tipagini he oni nari nga motumo ingapai ti ni rogo kparakpara ziazia ba yo ya, wa du he ni kparakpara he ziazia susi i nifu he fu roni, ya oni di ga rimbasa aboro irairapai ku sa yo, ka manga pa dada ingapai tipa yo bara bangiri Yekova?

¹⁸Oni ngére, i aye nga na kureru ku dimo yo ku kparakpara ziazia ba yo te. Ka oni ari he kina rogo kparakpara ziazia ba yo ni rengo, a wa mi arugu he.”

¹⁹Arona ki ya fu Mose, “Mo ngére, areme i afu gayo motumo ingapai na gayo zozo motumo ku bara bangiri Yekova; ono ngbatunga apai wa gere ye kina ku ri re! Ka mi niri motumo ingapai areme a, ka si ngba bangiri Yekova?”

²⁰Ho Mose agi gu pai ni re, si ki ru bangiriko.