Read zande Pa Amotume 14 Bible Online

Pa Amotume 14 - zande bible

Pa Amotume 14

²“Gere nga rugute tipa boro ngbataka rago girisa ni. I anindu na ni koyo du boromotumo ni;

³boromotumo anikuru ku zegi yo ku gii bataya yo, boromotumo aningana ni. Si du ka kaza ngbataka aima go ti ni,

⁴boromotumo anirugu pai i rógo azire ue du ni gigiri ra tipa gu ni i akagírisa ni, na gu ngua nga kedara na gire ni zamba ha na gu ngua nga usopo;

⁵boromotumo ki rugu yo i ími gu zire sa ku pere yo, ri fufu ime.

⁶Ko anidi gu kurai na gu ngua nga kedara, na gire ni zamba ha, na gu ngua nga usopo, ki mogo ho dũ na gu unga zire re ku rogo kure gu zire i niimi ru ri fufu ime.

⁷Ko ki nimigidi gu ni na kureru ko ka girisa ni be ngbataka wa bara saba, fuo gure ko ki ya ni ni gigiri ni, ko ki zogo gu unga zire re u merẽ ku ringara yo.

⁸Gu ni i akagírisa ni ni anizundu gani aroko, ki kpe rini dunduko, ki zundu ti ni, ni ki giri; fuo gure ni ki yega ku bataya yo, ono ni anira ku zegi pati gani bamburoko tipa rame saba.

⁹Ti saba rame ni ka nikpe rini dunduko, na maingbani na ngakaĩni, na mange kpotoni dunduko; ni anizundu gani aroko ki zundu tini, ni ki giri.

¹⁰“Ti muambi rame ni anirogo wiri akandoro ue ni abara zanga serõ, du garãra sa, na fufurũ ngungo wa aritere bawe na bebere he, tipa motumo riahe, kodi yo ho na nzeme na kura nzeme ringbisi yo ho wa bebere ritere.

¹¹Gu boromotumo nikagirisa ni ko animoi gu ni i akagírisa ni bara bangiri Yekova na agu ahe re dunduko, ku pangbadimo bamburoko dungurati.

¹²Boromotumo anidi wiri kandoro ni bara sa ki fu ru ni motumo tindika, na ringbisiringbisi nzeme, ki wo ti ni ni wowoti motumo bara bangiri Yekova.

¹³Ko aniimi wiri kandoro yo i naimo motumo ingapai ku ho ni na zozo motumo a, rogo kparakpara ziazia ba; bambiko wa du motumo ingapai ni ga boromotumo he, a wo du motumo tindika a, si ni kparakpara he ziazia susi.

¹⁴Boromotumo anidi bete kure nya motumo tindika, boromotumo animoi he ti ngba kpetu gu ni i nikagirisa ni, ku kumbabeni yo, na ti bawirinzaga kumbabeni, na tibawirindukumbanduni.

¹⁵Boromotumo anidi bete ringbisiringbisi nzeme ki uka ha ku kpabeko yo ku garebe,

¹⁶ko ki zogo wirinzaga kumbabeko ku rogo gu nzeme du ku kpabeko yo ku garebe, ki nimigidi gu nzeme du ti wirinzagako ku bara bangiri Yekova bara saba.

¹⁷Bete gu yangara nzeme ka nye kpabeko yo, boromotumo ki moi bete he ti ngba kpetu gu ni i nikagirisa ni ku kumbabeni yo, na ti bawirinzaga kumbabeni, na ti bawirindu kumbanduni, ku auru kure motumo tindika;

¹⁸gu yangara nzeme ka nye kpabe boromotumo yo ko ki moi he ku ri gu ni i nikagirisa ni. Boromotumo ki nimangi pa dada ingapai tipa ni ku bara bangiri Yekova.

¹⁹Boromotumo anifu motumo ingapai, ka manga pa dada ingapai tipa gu ni i akagírisa ni be gani birikosibirikosi pai. Fuo gure ko ki imi nya tipa zozo motumo;

²⁰boromotumo anifu zozo motumo na motumo riahe ku ri bamotumo. Si du boromotumo animangi pa dada ingapai tipa ni, ni ki giri.

²¹“Ono ka ni du ni rungorungo boro, ka ni aréngba nga na bi agu ahe re wo ya, si du ni ki di wiri kandoro sa tipa motumo tindika ni bara i wo ti ru, tipa manga pa dada ingapai fu ni, na fufurũ ngungo wa aritere biata na bebere he, kodi yo ho na nzeme tipa motumo riahe, na kura nzeme ringbisi yo ho wa bebere ritere;

²²na ambipo ue a watadu paranga agbungu ue, wa rengbe ni na pa bi ra; gu ru sa anidu tipa motumo ingapai, gu ru sa tipa zozo motumo.

²³Ni aniye na ami fu boromotumo ti muambi rame tipa girisa tini, ku pangbadimo bamburoko dungurati ku bara bangiri Yekova;

²⁴boromotumo anidi gu wiri kandoro du tipa motumo tindika, na ringbisiringbisi nzeme, boromotumo ki niwo ti ni ni wowoti motumo ku bara bangiri Yekova.

²⁵Ko aniimi wiri kandoro du tipa motumo tindika; boromotumo anidi bete kure nya motumo tindika ki moi he ti ngba kpetu gu ni i nikagirisa ni ku kumbabeni yo, na ti bawirinzaga kumbabeni, na tibawirindukumbanduni.

²⁶Boromotumo aniuka bete nzeme ku kpabeko yo ku garebe;

²⁷ki nimigidi bete gu nzeme du kpabeko yo ku garebe na wirinzaga kumbabeko bara saba ku bara bangiri Yekova.

²⁸Boromotumo animoi bete gu nzeme du kpabeko yo ku ti ngba kpetu gu ni i nikagirisa ni ku kumbabeni yo, na ti bawirinzaga kumbabeni, na ti bawirindu kumbanduni, yo i nimoi kure motumo tindika ni;

²⁹gu yangara nzeme ka nye ku kpabe boromotumo yo, ko animoi he ku ri gu ni i nikagirisa ni, ka manga pa dada ingapai tipa ni ku bara bangiri Yekova.

³⁰Ni anifu gu mbipo sa, watadu paranga gbungu sa, wa rengbe ni na pa bi ru,

³¹gu ru sa tipa motumo ingapai, gu ru sa tipa zozo motumo wa sa na motumo riahe; boromotumo animangi pa dada ingapai tipa gu ni i nikagirisa ni ku bara bangiri Yekova.

³²Gere nga gu rugute du tipa gu ni du na kaza ngbataka ti ni, arengba nga na pa bi gu he rengbe tipa girisa ni tipa ha ya.”

³³Yekova ki ya fu Mose na fu Arona,

³⁴“Ho oni ka da ni ku rogo ringara Kanana yo, nga gu mi afu fu roni ni gaoni ukumbo, mi ki moi kaza wa ngbataka vuru gu bambu rogo gaoni ringara;

³⁵si du gu ni du bambu ni gani ni aniye ka gumba paha fu boromotumo, ki ya, ‘Si bangire wa ngbatunga kaza du ti gi bambu.’

³⁶Boromotumo anirugu pai ya i kúsi ahe dimoyo dunduko, mbata boromotumo nikandu koyo ka ngana gu kaza re; agu ahe du dimo yo dunduko ka du ni birikosibirikosi he; fuo gure boromotumo anirimi ku dimo yo ka bi bambu.

³⁷Ko ki ningana gu kaza re; ka gu kaza re du ti vuro bambu ni nvutanvuta ha watadu ni zamba ha, ki du ti ambia vuru bambu yo,

³⁸boromotumo anikuru dimo yo, ki ru ngbadimo ho ki kisi bambu tipa rame saba.

³⁹Boromotumo aniye berewe ti saba rame, ka ngana ha; ka gu kaza re fira ti vuro bambu,

⁴⁰boromotumo ki rugu pai i rogo agu ambia du kaza ti ni, ki bafu he ku ba biriko yo gii bakporo yo;

⁴¹ko ki rugu he i kpere vuro bambu ho kirikiri dũ; i ki uka gu pere i nikpere he ti vuro ho ku ba biriko yo gii bakporo yo;

⁴²si du i ki rogo kura ambia, ki moi he ku ba agu ambia re, ko ki di kura pere ki mbedi vuro bambu na ni.

⁴³“Ka gu kaza re kuru berewe ti vuro bambu fuo roga ko ambia ti ni, na fuo kpera ko vuro bambu a, ki mbedi he na pere berewe,

⁴⁴boromotumo anindu ka ngana ha; ka gu kaza re fira ti vuro bambu, si nga kere kaza wa ngbataka dimo yo; bambu ni birikosibirikosi he.

⁴⁵Ko ki futuka bambu dunduko, ambia ha na angua ha a, na pere bambu dunduko a; ko ki tindi he dunduko ku ba biriko yo gii bakporo yo.

⁴⁶Ku ri gere gu boro nikanirimi ku rogo gu bambu re ho si adu ni ni kisikisi he, ni anidu ni birikosibirikosi ni ki da ku nyemu;

⁴⁷gu boro nikanipi vuru gu bambu re ni anizundu gani aroko; gu boro nikaniri riahe vuru gu bambu yo re ni anizundu gani aroko a.

⁴⁸“Ono ka boromotumo ye ki ngana ha, ka kaza afira nga ti vuro bambu ya, fuo mbeda yo pere ti ni berewe, boromotumo ki ya bambu du ni gigiri he, bambiko wa kaza naima go.

⁴⁹Tipa pa girisa gu bambu re, ko anirogo rukutu azire ue, na ngua nga kedara, na gire ni zamba tia, na ngua nga usopo,

⁵⁰ko aniimi gu zire sa rogo pere ku ri fufu ime,

⁵¹ko ki rogo akedara na usopo, na gire ni zamba ha, na gu unga zire, ki mogo ho ku rogo kure gu zire i niimi ru, na ku rogo fufu ime a, ki migidi gu bambu re na ni bara saba.

⁵²Were ko ka girisa bambu na kure zire, ni fufu ime na unga zire a, na ngua kedara na usopo na gire ni zamba ha a;

⁵³ko ki zogo gu unga zire re u guari bakporo yo ki merẽ ku ringara yo; si du ko ka amanga pa dada ingapai ti ni tipa bambu, si ki du gigiri.”

⁵⁴Gere nga gu rugute du tipa ngbatunga akaza ngbataka dunduko: tipa kaza kpurunya,

⁵⁵tipa kaza wa ngbataka ti aroko watadu ti vuro bambu,

⁵⁶tipa hihihe watadu tipa iri oro, watadu tipa biba,

⁵⁷ka yugo ho si ngia si ni birikosibirikosi he, watadu ni gigiri he. Gere nga rugute tipa ngbataka.