Read zande Pa Amotume 15 Bible Online

Pa Amotume 15 - zande bible

Pa Amotume 15

¹Yekova ki ya fu Mose na fu Arona,

²“Oni yá fu awiri aYisaraere, Ho kpanda kaza ka ga ni ti kumba, gu naga si ni birikosibirikosi he.

³Gere nga rugute tipa gani birikosibirikosi kaza ga kpanda: watadu kpanda naga ti ni watadu kpanda akiti ti ni, si ki du nga birikosibirikosi kaza du ti ni.

⁴Agu abarame dunduko gu boro kaza ga kpanda ti ni nikanira auru he si anidu ni birikosibirikosi he; agu ahe ni asunga ti ni si anidu ni oirikosibirikosi he a.

⁵Gu kura boro ka zadi gani barame ni anizundu gam aroko, ki zundu kpotoni, ni ki du ni birikosibirikosi ni ki da ku nyemu.

⁶Gu boro ka sungu ti gu he boro kaza ga kpanda nasunga ti ni, ni anizundu gani aroko, ki zundu kpotoni ki du ni birikosibirikosi ni ki da ku nyemu.

⁷Gu boro ka zadi kpoto gu boro du na Kaza ga kpanda ti ni, ni anizundu gani aroko, ki zundu kpotoni, ki du ni birikosibirikosi ni ki da ku nyemu.

⁸Ka boro kaza ga kpanda suku sure kuti gu boro du ni gigiri ni, gu boro re anizundu gani aroko, ki zundu kpotoni, ki du ni birikosibirikosi ni ki da ku nyemu.

⁹Gu basunga nidu ri nya boro kaza ga kpanda asunga auru he, si adú ni birikosibirikosi he.

¹⁰Gu boro ka zadi gu he ka du tii gu ni yo re, ni adú ni birikosibirikosi ni ki da ku nyemu; gu boro ka tindi agu ahe re ni anizundu gani aroko ki zundu kpotoni, ki du ni birikosibirikosi ni ki da ku nyemu.

¹¹Gu boro ka boro kaza ga kpanda zadi ni, ka boro kaza ata zunda nga beni ya, ni anizundu gani aroko ki zundu kpotoni, ki du ni birikosibirikosi ni ki da ku nyemu.

¹²Gu pere ka boro kaza ga kpanda zadi he, i aniimi he aimo; gu ũsunge nga ngua i anizundu he azunda.

¹³“Ho boro kaza ga kpanda ka gira ni be gani kaza ga kpanda, ni anigedi rame saba tipa girisa tini, ki zundu gani aroko; ni azúnda kpotoni rogo fufu ime, ni ki giri.

¹⁴Ti muambi rame ni anirogo ambipo ue tipa ni watadu paranga agbungu ue, ki ye ku bara bangiri Yekova ku pangbadimo bamburoko dungurati yo, ki fu ra fu boromotumo;

¹⁵boromotumo anifu ra, gu ru sa tipa motumo ingapai, gu kurai tipa zozo motumo; boromotumo ki nimangi pa dada ingapai ku bara bangiri Yekova tipa gani kaza ga kpanda.

¹⁶“Ka tunga awiri kumba agá ti ni ni anizundu kpotoni dunduko, ki du ni birikosibirikosi ni ki da ku nyemu.

¹⁷Agu aroko dunduko tunga awiri kumba ka nidu ti ni, na ti gu kpoto nya a, i anizundu he, si ki du ni birikosibirikosi he Ki da ku nyemu.

¹⁸Ka kumba ra na de tunga awirini ki ga, i ue anizundu kpotoyo ki du ni birikosibirikosi yo ki da ku nyemu.

¹⁹“Ho du de ni na kaza ade nga gu nga nzunzu kaza ade, ri anigiri he tipa rame saba, gu boro nikanizadi ri ni anidu ni birikosibirikosi ni ki da ku nyemu.

²⁰Agu ahe dũ ri ka nira auru he ho ri agira gari kaza ade ni si anidu ni birikosibirikosi he; agu ahe dunduko a ri asunga ti ni si anidu ni birikosibirikosi he.

²¹Gu boro nikanizadi gari barame ni anizundu gani aroko, ki zundu tini, ki du ni birikosibirikosi ni ki da ku nyemu.

²²Gu boro nikanizadi gu he ri nasunga ti ni, ni anizundu gani aroko, ki zunau tini, ki du ni birikosibirikosi ni ki da ku nyemu;

²³watadu si nga barame watadu gu he ri nasunga ti ni, ho ni ka nizadi he ni, ni anidu ni birikosibirikosi ni ki da ku nyemu.

²⁴Ka kumba ra na ri, gari kaza ade ki gbadi kuti ni, ni anidu ni birikosibirikosi ni tipa rame saba; agu abarame dunduko ni ara auru he anidu ni birikosibirikosi he.

²⁵“Ka kaza ade zi de tipa dungu arame, ki susi nzunzu rame gari gira kaza ade, watadu si aga ti ri rame ki susi gari gira kaza ade agu arame dunduko re kaza ade amanga ri ti ni ri adú kindi ni birikosibirikosi ri; wa ti rago ga ndikidi rago kaza ade, ri anidu ni birikosibirikosi ri.

²⁶Agu abarame dunduko ri ara auru he, ni agu arame dunduko du ri na kaza ade, anidu fu ri wa arame gari gira kaza ade, agu ahe dunduko ri asunga ti ni si anidu ni birikosibirikosi he, wa ti rago gu biriko nga ga gari gira kaza ade.

²⁷Gu boro nikanizadi agi ahe re ni anidu ni birikosibirikosi ni ni ki nizundu gani aroko, ki zundu tini, ki du ni birikosibirikosi ni ki da ku nyemu.

²⁸Ono ka gari kaza ade go, ri anigedi rameri saba, fuo gure ri ki du gigiri.

²⁹Ti muambi rame ri anirogo ambipo ue watadu paranga agbungu ue, ki ye na ami fu boromotumo, ku pangbadimo bamburoko dungurati yo.

³⁰Boromotumo ki fu gu ru sa tipa motumo ingapai na gu ru sa tipa zozo motumo; boromotumo nimángi pa dada ingapai tipa ri ku bara bangiri Yekova tipa gari biriko kaza ade.

³¹“Were oni ka nikpara awiri aYisaraere ti gayo birikosibirikosi apai, i ka kpika na gayo birikosibirikosi apai mbiko gbarasa yo gi banye nga gu du dagba yo.”

³²Gere nga gu rugute du tipa pa gu ni du na kaza ga kpanda ti ni, na tipa gu kumba tunga awirini aga, du ni birikosibirikosi ni be he;

³³na tipa gu ri du na kaza ti rago gari gira kaza ade a; si tipa gu boro nga kumba watadu de kaza ga kpanda adu ti ni, na tipa kumba ra na de nga gu ri du ni birikosibirikosi ri.