Read zande Pa Amotume 17 Bible Online

Pa Amotume 17 - zande bible

Pa Amotume 17

¹Yekova ki ya fu Mose,

²“Mo yá fu Arona na fu awiriko, na fu awiri aYisaraere dunduko, Gere nga gu pai rugu Yekova ha.

³Ka boro dagba ngbatunga aYisaraere yo imi babagara watadu wiri kandoro watadu meme rogo bataya, watadu imo ru zegi yo gii bataya yo,

⁴ono ka ni ayé nga na u ku pangbadimo bamburoko dungurati yo ya, ka fu ru ni gamunihe mbedisatise fu Yekova barangba banye nga ga Yekova ya, i anigedi bape kure kina ku ri gu boro re; ni uka kure; i anikpara ni akpara ku sa yo ti gani aboro.

⁵Si du awiri aYisaraere nikaniye ti ni na gayo amotumo nga agu anya imi yo ra ringara yo, ki fu ra fu Yekova, ku be boromotumo ku pangbadimo bamburoko dungurati yo, ki imi ra ni motumo nga amotumo zereda fu Yekova;

⁶boromotumo ki migidi kurera kuti ga Yekova bamotumo pati ngbadimo bamburoko dungurati, ki zo nzemera ni guzuguzu fuõhe fu Yekova.

⁷Si du i aimo nga gayo amotumo fu kpia abameme berewe te, nga gu kpiaahe i amanga pai na ni wa sino pa bari. Gere nikadu ni nyenye rugapai fu yo na fu arika ngbatungayo ku mbata yo kindi.

⁸“Mo ayá fu yo, Gu boro dagba ngbatunga aYisaraere yo watadu dagba kungba aboro sungu ku dagba yo, nga gu ni nafu zozo motumo watadu kura motumo,

⁹ono ka ni ayé nga na ni ku pangbadimo bamburoko dungurati yo, ka tumo na ni fu Yekova ya; i anikpara gu boro re akpara ku sa yo ti gani aboro.

¹⁰“Ka gu boro dagba ngbatunga aYisaraere yo watadu dagba kungba aboro sungu ku dagba yo ri kure nya, mi azínga kuti gu boro niri kure ki kpara ni ku sa yo ti gani aboro.

¹¹Bambiko unga ahe du rogo kure he yo; mi fu he fu roni oni nifu he ri bamotumo ka manga pa dada ingapai tipa mbisimoroni; bambiko kure namanga pa dada ingapai tipa unga.

¹²Si du mi agumba ha fu awiri aYisaraere ki ya, Ka boro dagba roni yo rí nga kure wa sa ya, watadu gu kungba boro sungu ku dagba roni, ka ni ri nga kure a ya.

¹³Gu boro a dagba awiri aYisaraere yo, watadu dagba kungba aboro nga agu yo sungu ku dagba yo yo, namanga anya watadu azire nga ngbatunga agu ra i nari ra, ni aniuka kurera ku sande ki kpisidi he ni nvutu.

¹⁴“Bambiko unga unga ahe dunduko du rogo kure he yo; si du ya mi ti ni fu awiri aYisaraere, Ka oni nirí nga kure unga he wa sa ya, bambiko unga unga ahe dundu ko du kina rogo kure he yo; gu ni nikaniri he, i anikpara ni akpara ku sa yo.

¹⁵Agu aboro dunduko nari kotokakpi watadu gu ru zi nyarinde ru, watadu ni nga wiri ringara na gu ni sungu ku dagba roni yo, ni anizundu gani aroko, ki zundu tini, ki du ni birikosibirikosi ni ki da ku nyemu; fuo gure ni ki giri.

¹⁶Ono ka ni azúnda nga gani aroko ki zundu tini a ya, ni ambú mbugo gani irairapai.”