Read zande Pa Amotume 19 Bible Online

Pa Amotume 19 - zande bible

Pa Amotume 19

¹Yekova ki ya fu Mose,

²“Mo yá fu rimbasa awiri aYisaraere dunduko, Oni adú ziazia; bambiko mi nga Yekova nga gaoni Mbori du ziazia.

³Aboro ni ba sa sa ka irisa anayo na abayo, oni ki ka kuti irisa gimi arago sabiti: Mi nga Yekova nga gaoni Mbori.

⁴Ka oni nisá nga tironi fuo kpiaahe watadu mbakada zaragasizaragasi ambori fu roni ya: Mi nga Yekova nga gaoni Mbori.

⁵“Ho oni ka fu amotumo zereda ni fu Yekova, oni afú he mi idi pa roni aida.

⁶I ari he ni kina gu uru fu oni he, watadu fuo girarago; gu he nikaninye daku ti biata uru i anizo ho azo.

⁷Ka i ri he ti biata uru, si nga kere gbegberẽ sino; mi idí nga pa ha te,

⁸agu aboro dunduko ka ri he i ambú mbugo gayo irairapai, bambiko i gbarasi ziazia he nga ga Yekova; i akpára agu aboro re akpara ku sa yo ti gayo aboro.

⁹“Ho oni ka nike gaoni ũringara ni, oni anike nga ha ati kpuroni yo ki da ti ndikidi bangbanda ha te, ka oni adúngura nga futuhe fuo ke oni he a ya.

¹⁰Ka oni nizúra nga gaoni bakakue dunduko ya, ka oni nidúngura nga gu tiwitiwi rindi bakakue natiwa rogo gaoni ati bakakue a ya; oni animbu he fu rungorungo aboro na fu agu aboro sungu ku dagba roni: Mi nga Yekova nga gaoni Mbori.

¹¹“Ka oni nidĩ nga he ya, ka oni nimángi nga pai ni biriki ya, ka oni nigúmba nga zire fu akuaroni a ya.

¹²Ka oni nizúnga nga he ni rimore ni biriki ya, ka gbarasa rimo gaoni Mbori: Mi nga Yekova.

¹³“Ka oni nirúngosi nga kuaroni watadu dĩ gayo ahe ya. Ka ga boro sunge mosoro ima nga ku beroni yuru da ku wiso ya.

¹⁴Ka oni nitíwa nga boro ngbianga watadu maa ũkota barangba iravurari ya, ono oni agunde ti gaoni Mbori: Mi nga Yekova.

¹⁵“Ka oni niírasi nga sarangbanga ya, ka oni nibérẽ nga pa du boro ni rungorungo ni ya, watadu gunde ti gu ni du ni bakere ni a ya, ono oni ka sara ngbanga ni ruru he fu akuaroni.

¹⁶Ka oni nindú nga ku bani na ku bani wa abagbarasirimo dagba gaoni aboro ya, ka oni nikúru nga ka kita ngbanga akuaroni ni zire sa kpio a ya: Mi nga Yekova.

¹⁷“Ka oni nisógo nga wirinaroni ku kpotoroni yo ya, ono oni asáka pai dagba roni na akuaroni oni ka mbu mbugo gayo ingapai.

¹⁸Ka oni niíri nga bape watadu kpi pai kuti awiri gaoni aboro ya, ono oni akpi nyemu akuaroni wa oni akpí nyemu tironi: Mi nga Yekova.

¹⁹“Oni aká kuti gimi rugaapai. Ka oni nimbú nga gaoni zogozogo anya ami vungu na kura ngbatunga anya ya; ka oni nirũ nga ngbatunga atunga rogo gaoni ati ue ya; ka oni niúkadi nga tironi na roko i atu rogo ngbatunga ahe ue ya.

²⁰“Ka kumba ra na de nga kanga wa sino borose, pazua yo ri fu kura boro ka i ata tumo nga ri watadu ki mbu ri ti sunge kanga ya, i asasana he ti ni. I aímo nga yo te, bambiko ri adu ni kanga;

²¹ono kumba aniye na motumo tindika tipa ko fu Yekova, ku ngbadimo bamburoko dungurati yo, nga bakandoro tipa motumo tindika.

²²Boromotumo ki mangi pa dada ingapai tipa ko na gu bakandoro nga ga motumo tindika ru ku bangiri Yekova tipa gako ingapai nga gu mangi ko; Yekova avú ko ti gu ingapai ko amangi he.

²³“Ho oni ka da ni ku rogo gu ringara re ki rũku ngbatunga angua dunduko ni riahe, si du oni asá zuzuhe wa ginagina he; oni agína ha tipa garã biata, oni arí nga ha te.

²⁴Ti biama garã zuzuhe adú dunduko ni kparakpara ha ni motumo nga ga tambuahe fu Yekova.

²⁵Ono ti bisue garã oni ki niri zuzuhe, ya si zuku fu roni ni zoozoo ho: Mi nga Yekova nga gaoni Mbori.

²⁶“Ka oni nirí nga pasio na kure rogo ho ya. Ka oni nisóroka nga watadu gia sangba abinza a ya.

²⁷Ka oni nikpé nga mange pavuro rironi watadu yera mburu maingbaroni ya.

²⁸Ka oni nidéwe nga kpotoroni tipa kpio boro watadu ke aze ti kpotoroni wa sa ya: Mi nga Yekova.

²⁹“Ka oni nigbárasi nga wironi nga de nisa ri ni debari ya, ringara ka du na pa bari, ringara ki hi be gbegberẽ pai.

³⁰Oni aká kuti gimi arago sabiti ki niirisi gi ziazia ba: Mi nga Yekova.

³¹“Ka oni nindú nga fuo agumba sangbaatoro na abinza ya; ka oni nigbáta nga yo ya, oni ka birikosi tironi ni gayo apai: Mi nga Yekova nga gaoni Mbori.

³²“Oni arú ku ari bara bangiri gbinza aboro, ki niirisi kuru aboro, oni ki nigunde ti gaoni Mbori: Mi nga Yekova.

³³“Ho kungba boro nisungu ni ku dagba roni rogo gaoni ringara, ka oni nimángi nga ni gbegberẽ ya.

³⁴Gu kungba boro sungu ku dagba roni adú fu roni wa wiri ringara dagba roni, oni ki nikpi nyemu ni a wa oni akpi nyemu tironi; bambiko oni adu ni kungba aboro ringara Ezipeta yo: Mi nga Yekova nga gaoni Mbori.

³⁵“Ka oni niírasi nga sarangbanga na pa ringbisa bagizaahe watadu na pa barõaahe na pa bangbeahe ya.

³⁶Oni adú na gaoni ũringbisaahe nzunzu, na ũringbisa barõaahe nzunzu, na ũringbisa zende ahe nzunzu, na nzunzu úringbisa ime ahe a: Mi nga Yekova nga gaoni Mbori, naye oni ringara Ezipeta yo.

³⁷Oni akpária pa gimi rugaapai dunduko na gimi ruru asarangbanga dunduko, ki nimangi he: Mi nga Yekova.”