Read zande Pa Amotume 21 Bible Online

Pa Amotume 21 - zande bible

Pa Amotume 21

¹Yekova ki ya fu Mose, “Mo gúmba pai fu aboromotumo, nga awiri Arona, ki ya fu yo ka i nibírikosi nga tiyo tipa kpio gumeyo ya,

²kina tipa gu bambembedi gumeyo, tipa nayo, tipa bayo, tipa wiriyo nga kumbagude, tipa wiriyo nga degude, tipa wirinayo,

³tipa gu dawiriyo nga ngasu de, du mbembedi na yo bambiko kumbari ti ni te; ri i ka nibirikosi tiyo tipa kpio ri.

⁴Ka i nibírikosi nga tiyo wa kumba ku de dagba gayo aboro ya, ka gbarasa tiyo mbiko ho.

⁵Ka i nikpé nga riyo ni marã ya, watadu yera mburu maingbayo a ya, ka i adé nga aze ti kpotoyo a ya.

⁶I adú ni kparakpara yo ziazia fu gayo Mbori, ka i agbárasa nga rimo gayo Mbori ya; bambiko i nafu amotumo na we fu Yekova, gu riahe nga ga gayo Mbori; si du i adú ti ni ni kparakpara yo ziazia.

⁷Ka i aróga nga adebari watadu agu ade i agbarasi yo ya; ka i aróga nga agu ade akumbayo ambu yo ambu ya; bambiko boromotumo du ni kparakpara ko ziazia fu gayo Mbori.

⁸Oni akpára ko, bambiko ko nafu gu riahe nga ga gaoni Mbori; ko adú wa kparakpara ko ziazia bangironi; bambiko mi nga Yekova nakpara roni ziazia, mi du ni kparakpara re ziazia.

⁹Wiri boromotumo ni degude, ka ri gbarasi tiri ni manga bari, ri nagbarasa rimo bari nga boromotumo; i anizo ri azo.

¹⁰“Gu boromotumo du ni gbia dagba awirinako, nga gu ko i auka nzeme ku riko yo, du ni kparakpara ko tipa ukadi roko boromotumo, ka ko nimbú nga mangeriko ni zakizaki he ni gbanga ha ya, ka ko nisíri nga gako aroko a ya;

¹¹ka ko nirími nga ku dimo yo fuo kangba boro ya, ka ko nibírikosi nga tiko a ya, zavura tipa bako na nako a ya;

¹²ka ko nikúru nga rogo ziazia ba yo ku zegi yo ya, ka ko nigbárasi nga gu ziazia ba nga ga gako Mbori a ya; bambiko gu kparatise nga ga mbeda ko na nzeme nga ga gako Mbori du ri ko: Mi nga Yekova.

¹³Ko adía kina gu de du ni ngasu ri.

¹⁴Dekurugbo, watadu gu ri i ambu ri ambu, watadu gu de i agbarasi ri, watadu debari, agi yo re ko ka roga nga yo ya; ono ko adía ngasu de kina dagba gako aboro,

¹⁵ya ka ko nigbárasi nga awiriko dagba gako aboro ya; bambiko mi nga Yekova kpara ko ziazia.”

¹⁶Yekova ki ya fu Mose,

¹⁷“Mo yá fu Arona, A nga boro sa dagba atitaro rogo arika ngbatungayo du na serõ nikambeda ka fu riahe nga ga gani Mbori te.

¹⁸Bambiko a nga boro sa du na serõ ka mbedi na bamotumo te, nga iravurari watadu gbarĩgbarĩ boro, watadu gu boro du na serõ kpakpuni yo watadu gu boro du gu pan, ni gbanga ha susi kura ha,

¹⁹watadu gu boro du na gbarĩgbarĩ nduni, watadu gbarĩgbarĩbeni,

²⁰watadu kpindiakpindia boro, watadu gu boro du na kaza bangirise watadu gu boro du na kpurunya, watadu ndaka, watadu fiõfiõ õrõni;

²¹a nga boro sa dagba atita Arona yo nga boromotumo du na serõ nikambeda ka fu ga Yekova amotumo na we te; wa du ni na serõ, ni ayé nga ka mbeda ka fu gu riahe nga ga gani Mbori te.

²²Ni aniri gu riahe nga ga gani Mbori, gu du ziazia susi na gu nga ga ziazia ahe a,

²³ono ni aniye nga mbembedi ku pati roko kparakpara ba te, watadu mbeda na bamotumo a te, bambiko ni du na serõ, ya ka ni gbárasi nga gimi ziazia aba ya; bambiko mi nga Yekova nakpara yo ziazia.”

²⁴Si du Mose ki gumba ha fu Arona na fu awiriko na fu awiri aYisaraere dunduko.