Read zande Pa Amotume 23 Bible Online

Pa Amotume 23 - zande bible

Pa Amotume 23

¹Yekova ki ya fu Mose,

²“Mo yá fu awiri aYisaraere, Gu ringbisiringbisi apumbo nga ga Yekova nga gu oni ka taka pande he wa kparakpara adungurati, nga gimi ringbisiringbisi apumbo, si nga gere.

³Rame sita oni ka manga sunge; ono gu saba uru nga rago sabiti nga ndikidi rago ongoda, nga kparakpara rago dungurati; ka oni nimángi nga sunge ragoho ya; si nga rago sabiti fu Yekova rogo gaoni abaraka dunduko.

⁴“Gere nga gu ringbisiringbisi apumbo nga ga Yekova, nga kparakpara dungurati, nga gu oni ka nitaki pande he ti ringbisiringbisi ragoho.

⁵Rogo bambata diwi, ti rameru 14 nyemu, ga Yekova pumbo susiri nikanidu.

⁶Ti 15 rame nga ga kina gu diwi re, gu pumbo ki du fu Yekova nga ga gu kpokuta adu nga na agbooro ti ni ya; tipa rame saba oni ka niri kina gu kpokuta adu nga na agbooro ti ni ya.

⁷Ti bambata uru oni animangi kparakpara dungurati; ka oni nimángi nga nyanyaki sunge ya.

⁸Ono oni anigamu kina motumo i nazo ho ni we fu Yekova tipa rame saba; saba rame nikanidu ni kparakpara rago dungurati; oni amánga nga nyanyaki sunge wa sa te.”

⁹Yekova ki ya fu Mose,

¹⁰“Mo yá fu awiri aYisaraere. Ho oni ka da ni ku rogo gu ringara nga gu fu mi fu roni ka ke gaha zuzuahe, oni aniye na vodivodi makawa gaoni kekeahe fu boromotumo;

¹¹ko aniwo ti vodivodi ahe ku bara bangiri Yekova, ya ko idi pa roni; wiso fuo rago sabiti boromotumo ka ni wo ti ni.

¹²Ti gu uru ho oni ka niwo ni ti vodivodi ahe, oni anifu wiri bakandoro du garãru sa zanga serõ ni zozo motumo fu Yekova.

¹³Gu motumo riahe nikanidu na ni si aningia fufuru ngungo wa aritere saba, kodi yo ho na nzeme, i azo ho fu Yekova, ni guzuguzu fuõhe; gu mbirimbiri motumo nikanidu na ni si aningia imekakue wa ritere sa na bebere he.

¹⁴Ka oni ari nga kpokuta watadu ugu zende he, watadu iwo ho a ya, da kina ti gu uru re, daho oni ka ye na gamunihe mbedisatise ni nga ga gaoni Mbori: si nga rugapai nye anye kindi dagba arika ngbatungaroni rogo gaoni abaraka dunduko.

¹⁵“Oni ki nigedi rago tona ti gu giraraeo du fuo sabiti, tona ti gu uru oni aye na vodivodi ahe ni nga ga wowoti motumo; si anidu nga poso saba,

¹⁶wa gedigedi uru 50, tona ti gu girarago du fuo saba sabiti; si du oni ki ye na motumo riahe nga ga vovo zende ahe fu Yekova.

¹⁷Oni aniye na udiudi akpokuta ue kpuroni yo i wo ti ni, i animangi he na fufuru ngungo wa aritere saba; i anizo ho na agbooro, ni makawa fu Yekova.

¹⁸Oni aniye na wiri akandoro saba du garãra sa zanga serõ na gaoni kpokuta, na paranga babagara sa, na abaakandoro ue; ami anidu nga zozo motumo fu Yekova, na motumo riahe na mbirimbiri motumo wa sa na ami a, nga motumo i azo ho, ni guzuguzu fuõhe fu Yekova.

¹⁹Oni ki nifu bameme sa tipa motumo ingapai, na wiri akandoro ue ni abara du garãra sa, ni amotumo zereda.

²⁰Boromotumo ki niwo ti ra na kpokuta nga ga makawa ni wowoti motumo ku bara bangiri Yekova, na agu awiri akandoro ue re; ami anidu ni kparakpara he ziazia fu Yekova tipa boromotumo.

²¹Oni ki nitaki pande he ni kina gu uru re; oni ki nimangi kparakpara dungurati; ka oni nimángi nga nyanvaki sunge ya: si nga rugapai nye anye kindi dagba arika ngbatungaroni dunduko rogo gaoni abaraka.

²²“Ho oni ka nike gaoni ũringara ni, ka oni niké nga he ati kpuroni yo ki da ti ndikidi bangbanda ha ya, ka oni adúngura nga futuhe fuo ke oni he ya; oni animbu he fu rungorungo aboro na fu kungba aboro: Mi nga Yekova nga gaoni Mbori.”

²³Yekova ki ya fu Mose,

²⁴“Mo yá fu awiri aYisaraere, Rogo saba diwi, ti rameru sa, oni animangi pa gu uru nga ga ndikidi rago ongoda, ni rago tingida pai taki yo pande he na bakere woro ambanya, nga kparakpara rago dungurati.

²⁵Ka oni nimángi nga nyanyaki sunge ragono ya; oni ki nifu kina motumo i azo ho fu Yekova.”

²⁶Yekova ki ya fu Mose,

²⁷“Ti bawe uru nga ga saba diwi nga uru motumo dada ingapai; si anidu fu roni ni rago kparakpara dungurati, oni anirungosi tironi ki fu motumo i azo ho fu Yekova.

²⁸Ka oni amánga nga sunge rogo gu uru re ya; bambiko si nga uru manga pa dada ingapai tipa roni ku oara bangiri Yekova gaoni Mbori.

²⁹Bambiko gu boro nikarungosi nga ti ni ti gi uru re ya, i anikpara ni akpara ku sa yo ti gani aboro.

³⁰Gu boro ka mangi sunge rogo gu uru re, mi anigbarasi gu boro re agbarasa dagba gani aboro.

³¹Ka oni nimángi nga sunge ya: si nga rugapai nye anye kindi dagba arika ngbatungaroni rogo gaoni abaraka dunduko.

³²“Si adú fu roni nga sabiti nga ndikidi rago ongoda, oni ki nirungosi tironi; ti rame diwi ribua tona nyemu, nyemu da ti gu nyemu, wo oni ka amanga pa gaoni sabiti.”

³³Yekova ki ya fu Mose,

³⁴“Mo yá fu awiri aYisaraere, Ti 15 rame nga ga gi saba diwi re, pumbo abasura nikanidu fu Yekova tipa uru saba.

³⁵Ti bambata uru kparakpara dungurati nikanidu; ka oni nimángi nga nyanyaki sunge ragoho ya.

³⁶Oni anifu amotumo i nazo ho fu Yekova tipa rame saba; ti muambi uru oni aniyambu kparakpara dungurati ki fu motumo i nazo ho fu Yekova; si nga irisiirisi gbuu; ka oni nimángi nga nyanyaki sunge ragoho ya.

³⁷“Gere nga gu ringbisiringbisi apumbo du fu Yekova, nga gu oni ka nitaki pande he tipa arago kparakpara dungurati, tipa fu amotumo i nazo ho fu Yekova, zozo amotumo na amotumo riahe, amotumo na mbirimbiri amotumo, si ni ba sa sa ti kina gaha ndikidi uru;

³⁸ku ri asabiti nga ga Yekova, na ku ri gaoni agamahe, na ku ri gaoni akidohe, na ku ri gu gaoni gamunihe oni afu he zaza ni nyemuhe, nga gu oni nafu fu Yekova.

³⁹“Ti 15 rame nga ga saba diwi, ho dungura oni zuzu aũringara ni, oni animangi ga Yekova pumbo tipa rame saba; ti bambata uru nikaningia ndikidi rago ongoda, na ti muambi uru nikaningia ndikidi rago ongoda a.

⁴⁰Oni ki nindu na gu bawene zuzu angua ti bambata uru, abe asikisa na be angua du na wikowiko kpehe, na sarizi nga ga pavuru di; oni ki ningi ku bara bangiri Yekova tipa rame saba.

⁴¹Oni amánga ha wa pumbo fu Yekova tipa rame saba rogo garã sa; si nga rugapai nye anye kindi dagba arika ngbatungaroni dunduko; oni animangi he rogo saba diwi.

⁴²Oni anira tii abasura yo tipa rame saba; oni nga awiri ringara Yisaraere yo, oni anira kina tii abasura yo,

⁴³ya arika ngbatungaroni ini he nga mi naya awiri aYisaraere niráki tii abasura yo ho mi aye ni na yo ringara Ezipeta yo: Mi nga Yekova nga gaoni Mbori.”

⁴⁴Were Mose ki taki pande pa gu ringbisiringbisi apumbo nga ga Yekova fu awiri aYisaraere.