Read zande Pa Amotume 24 Bible Online

Pa Amotume 24 - zande bible

Pa Amotume 24

¹Yekova ki ya fu Mose,

²“Mo rúgu awiri aYisaraere i ye na ziazia nzeme wa nzeme banga nga gu i asuka ha tipa tara we nikĩ akĩ kindi.

³Arona nikanibanda pa ha gii roko kparaba yo nga ga dezirepai, rogo bamburoko dungurati, tona nyemu ki da ku wiso ku bara bangiri Yekova kindi; si adú ni rugapai nye anye kindi dagba arika ngbatungaroni.

⁴Koanibanda atara kindi nzunzu auru baduawe du ni ndikidi dahabu bara bangiri Yekova.

⁵“Oni anirogo fufurũ ngungo, ki zo kpokuta 12 rogo ho; ngungo wa aritere saba nikanidu rogo gu kpokuta re ni ba sa sa.

⁶Oni animoi he ti agenehe ue, wa sita ti gene he sa ri mbisa ndikidi dahabu.

⁷Oni animoi ndikidi wene fuõngua ti agenehe ni ba sa sa, si du wa sa na kpokuta ni kparakpara ũtingida ka tumo na ni i nizo ho fu Yekova.

⁸Arona animoi he na asabiti dunduko ni tangaratangara ha ti genehe ku bara bangiri Yekova kindi tipa awiri aYisaraere wa zungahe tipa yo nye anye kindi.

⁹Si anidu tipa aArona na tipa awiriko, i ki niri he kina rogo kparakpara ba, wa du he fu ko ni ziazia he susi dagba agu amotumo i nazo ho fu Yekova, ni nyenye pai.”

¹⁰Were wiri de ni ngbatunga Yisaraere ni kumbagude, bani angia boro Ezipeta, akuru dagba awiri aYisaraere; wiri gu de Yisaraere nga kumba apaa na gu kura Yisaraere bataya yo,

¹¹wiri gu de Yisaraere ki gberẽ ngbako yo ti Rimo, ki senge he. I ki ye na ko koyo du Mose ni. Rimo nako nangia Seromita, wiri Debiri, dagba ngbatunga Dana yo.

¹²I ki ba ko ku bambukisa yo, daho i ka yugo gu pai ni Yekova ka gumba ha fu yo.

¹³Yekova ki ya fu Mose,

¹⁴“Mo kúsi gu ko nisenge he ku gii bataya yo; agu aboro nigi he ku ngbako ki moi beyo ri ko, rimbasa roni ki sopo ko ni ambia.

¹⁵Mo ki ya fu awiri aYisaraere, Gu boro ka gberẽ ngbani yo fu gani Mbori, ni akpída kina pa gani ingapai.

¹⁶Gu ni ka gberẽ ngbani yo ti rimo Yekova i aniimi ni aimo; rimbasa roni anisopo ni asopa ni ambia; gu boro sungu ku dagba roni na awiri ringara dunduko a, ho gberẽ ni ni ngbani yo ti Rimo, i aniimi ni aimo.

¹⁷Gu boro nikaniimi boro, i aniimi ni aimo a.

¹⁸Gu ni nikaniimi nya ni anitumo pa ru, unga ku ba unga.

¹⁹Ho boro ka nigbarasi kpoto kurani ni, wa mangi ni, kina wo i ka nimangi fu ni a,

²⁰kita meme boro ku ba kita meme, bangirise ku ba bangirise, rinde ku ba rinde; wa gbarasi ni boro, i anigbarasi ni kina wo a.

²¹Gu ni nikaniimi nya, ni anitumo pa ru; gu ni nikaniimi boro i aniimi ni aimo.

²²Rugute adú sa tipa gu boro sungu ku dagba roni na tipa wiri ringara; bambiko mi nga Yekova nga gaoni Mbori.”

²³Si du Mose ki gumba ha fu awiri aYisaraere; i ki ndu na gu boro nasenge he ku gii bataya yo, ki sopo ko ni ambia. Were awiri aYisaraere amangi wa Yekova arugu Mose na ni.