Read zande Pa Amotume 25 Bible Online

Pa Amotume 25 - zande bible

Pa Amotume 25

¹Yekova ki ya fu Mose ri Bagangara Sinai yo,

²“Mo yá fu awiri aYisaraere, Ho oni ka da ni ku rogo gu ringara nga gu mi afu fu roni, gu ringara re amánga pa rago sabiti fu Yekova.

³Garã sita oni ka nisopo gaoni abino, garã sita oni ki nikuya gaoni bakakue, ki dungura zuzuhe;

⁴ono ti saba garã sabiti nikanidu nga ndikidi rago ongoda tipa ringara nga sabiti fu Yekova; ka oni asópa nga gaoni bino watadu kuya gaoni bakakue ya.

⁵Agu ahe nikanikuru ni dasi he ka oni aké nga ha ya, na gu rindi bakakue nga ga gu bakakue oni akuya nga ha ya, oni anidungura nga ha te; si anidu ni garã ndikidi ongoda tipa ringara.

⁶Gu sabiti nga ga ringara nikanifu riahe fu roni, tipa roni na tipa gaoni akanga nga akumba na ade na tipa gaoni aboro sunge na tipa agu aboro sungu ku dagba roni;

⁷tipa gaoni zogozogo anya a na tipa anya nvuo yo, zuzu gaoni auringara dunduko anidu tipa riahe.

⁸“Oni ki nigedi aposo saba nga ga agarã, nga agarã saba bara saba, si du gu rago nga ga aposo saba nga ga agarã anidu fu roni nga garã 49.

⁹Ti bawe uru nga ga saba diwi, oni anivudi gu nambongo wo awo gbe rogo arago dũ; ti gu uru nga ga manga pa dada ingapai oni anivudi nambongo ku rogo gaoni ringara dunduko.

¹⁰Oni ki nikpara gu 50 garã re, ki taki pande pa raniri ku rogo ringara fu araki rogo ho dunduko; si anidu ni garã ngbiko ni ngbarago, oni ni ba sa sa akáraga tironi ku kpuroni yo, oni ni ba sa sa fuo angbatungaroni.

¹¹Bisue bawe garã anidu ni garã ngbiko ni ngbarago fu roni; rogo ho ka oni nirúku nga ahe ya, ka oni niké nga dasi he a ya, ka oni adungura nga rindi Dakakue ti gu abakakue i akuya nga ha ya ya.

¹²Bambiko si nga garã ngbiko ni ngbarago; si anidu ni kparakpara garã fu roni ziazia; si oni akaniri gu zuzuhe ti ni nakura ati yo.

¹³“Rogo gu garã nga garã ngbiko ni ngbarago re oni ni ba sa sa nikanikaraga tironi ku kpuroni yo.

¹⁴Ka oni bagi he fu akuaroni watadu ngbe he be akuaroni, oni animangi nga gu ni gbegberẽ te.

¹⁵Kuti gedigedi agarã fuo susa garã ngbiko ni ngbarago, oni ki ningbe he be akuaroni, na kina kuti gedigedi agarã tipa zuzu gu he ni ka baga ha fu roni.

¹⁶Ka garã du ni dungu he oni ki nikiisi genohe, ka garã du ni umba ha oni aniumbasi genohe a, bambiko si nga gedigedi zuzuhe ni abaga ha fu roni.

¹⁷Ka oni nimángi nga akuaroni gbegberẽ ya, ono oni agúnde ti gaoni Mbori; bambiko Mi nga Yekova nga gaoni Mbori.

¹⁸“Si du oni ka amanga gimi rugaapai, nika kuti gimi ruru asarangbanga ki nimangi he; si du oni ki niraki rogo ringara ni bandabanda roni.

¹⁹Ringara azúka gaha zuzuahe, oni ki niri gaoni úmbire, ki niraki rogo ho ni bandabanda roni.

²⁰Ka oni ya, ‘Gine ani ka ri rogo saba garã, wa ka ani aru nga he watadu dungura gaani rũkurũku he ya?’

²¹Mi afú gi maku ku ri roni rogo sita garã, si du si akúsa zuzuhe rengbe tipa agarã biata.

²²Ho oni ka nirũ he ni rogo muambi garã, oni aniri mbaku he; dati ribua garã, ho agu ahe nazuka ka kura ni, oni ki niri mbaku he.

²³I anibagi nga ringara si nye ku be boro kindi te, bambiko ringara nga gimi; bambiko oni fere wa kungba aboro nga agu aboro sungu na mi.

²⁴Oni aniidi pa tumo ringara rogo agu aringara dunduko oni adi he ni ukumbo.

²⁵“Ka wirinaroni du ni rungorungo ni, ki bagi bete gani ũkporo, si du gu mbembedi gumeni nikanitumo agu ahe bagi wirinani.

²⁶Ka boro adu nga ho ka tumo ho ya, fuo gure ni ni tini ki du na kumuko ki bi gu he rengbe ka tumo pa ha,

²⁷ni gédi agu agarã wa ni abagi he ki fu marã nasusi fu gu boro ni abagi he fu ni; ni ki karaga tini fuo gani ũkporo.

²⁸Ono ka he adu nga beni ka tumo ho tigani ya, si du gu he ni abagi he anyé kina ku be gu ni nangbe he dati gu garã nga garã ngbiko ni ngbarago; i ki gasi he, ni ki karaga tini fuo gani úkporo.

²⁹“Ka boro bagi bambu du rogo bakporo ngapa, ni ki ngbe he berewe rogo garã sa fuo baga ni he; bambiko tipa kina garã sa pa tumo ho anidu ni gani.

³⁰Ka ni atúmo nga ha rogo gu garã sa re ya, si du gu bambu du rogo bakporo ngapa ka nye ti ni fu gu ni nangbe he kindi, rogo arika ngbatungaroni dunduko; i agása nga ha ti garã ngbiko ni ngbarago te.

³¹Ono agu abambu nga ga wiri akporo adú nga na ngapa bakporo pati he ya, i anigedi he wa sa na agu aati nga ga ringara; i anitumo ho atumo, i ki nigasi he rogo garã ngbiko ni ngbarago.

³²Ono agu abaakporo nga ga aRevi, na agu abambu du ni gayo rogo gayo ũkumbo, aRevi rengbe ka tumo ho ti gu rago.

³³Ka boro Revi aida nga ka tumo gani ahe ya, si du gu bambu i abagi he bakporo yo du dagba gayo ũkumbo, i anigasi he ti garã ngbiko ni ngbarago; bambiko agu abambu du rogo abaakporo nga ga aRevi nga gayo ũkumbo dagba awiri aYisaraere.

³⁴Ono agu aati nga ga kungba ringara nga ga gayo abaakporo i anibagi nga ha te; bambiko gure nga gayo ũkumbo nye anye kindi.

³⁵“Ka wirinaroni du ni rungorungo ni, ka ni arengba nga na unda tini rengbe na oni wa sa ya, oni aniunda ni aunda; ni ará kporo na oni wa kungba boro na wa gu boro sungu ku dagba roni.

³⁶Ka oni dí nga mokiisa be ni watadu kiisa ha ya, ono oni nigúnde ti gaoni Mbori; ya wirinaroni niraki dagba roni.

³⁷Ka oni nifú nga bape fu ni tipa mokiisa a ya, ka oni afú nga gaoni riahe fu ni ka oni u be he ya.

³⁸Mi nga Yekova nga gaoni Mbori nakusi roni ringara Ezipeta yo ka fu ringara Kanana fu roni ni gaoni, ki du ni gaoni Mbori.

³⁹“Ka wirinaroni du ni rungorungo ni dagba roni, ki bagi tini fu roni, oni anisa nga ni ni mangi sunge fu roni wa kanga te;

⁴⁰ono ni anidu na oni wa boro sunge na wa gu boro sungu ku dagba roni, ni animangi sunge na oni ki da ti garã ngbiko ni ngbarago;

⁴¹fuo gure ni ki kuru be roni, ni na awiriri na ni a, ki ga fuo ndikidi gani aborokporo, ki karaga tini fuo ga abani aũkumbo.

⁴²Bambiko i nga gimi aboro, nga agu yo mi akusi yo ringara Ezipeta yo; ka i nibági nga yo wa akanga ya.

⁴³Ka oni nizógo nga ni gbegberẽ ya, ono oni agúnde ti gaoni Mbori.

⁴⁴Tipa pa gaoni akanga nga ade na akumba ka du be roni: oni aningbe kumba na de ni akanga dagba kina agu arikaaboro du pati roni kirikiri.

⁴⁵Oni aningbe yo a dagba gu kungba aboro sungu na oni na gayo aborokporo nga agu yo du na oni, i avungu yo rogo gaoni ringara; i ki du ni gaoni ũkporo.

⁴⁶Oni animbu yo a fu awironi fuo kpioroni, i di yo ni gayo nye anye kindi; oni anisa akanga dagba yo, ono awirinaroni nga awiri aYisaraere, oni azóga nga yo te, gu ni ku ri kurani ni gbegberẽ he te.

⁴⁷“Ka kungba boro watadu gu boro sungu na oni sa tini ni irakumuko, gu wirinaroni du pati ni ki sa tini ni rungorungo boro ki bagi tini fu kungba boro, watadu fu gu boro sungu na oni, watadu fu gu boro dagba ga kungba aboro aborokporo,

⁴⁸si du fuo baga ni tini i anitumo ni atumo berewe; wirinani sa nikanitumo ni,

⁴⁹watadu andoni, watadu wiri unduru bani nikanitumo ni; watadu mbembedi gumeni nga ga gani aborokporo nikanitumo ni; watadu ka ni kumuko ni ki tumo tini.

⁵⁰Ni anigedi pai fu gu ni nangbe ni tona ti gu garã ni abagi tini fu ni ki da ti garã ngbiko ni ngbarago, genoni anidu kina kuti gedigedi agarã; ni gu rago ni adu na bairani i aniringbisi he wa pa gu rago nga ga boro sunge.

⁵¹Ka dungu agarã nye kindi, ni anifu marã berewe kuti gedigedi garã dagba gu geno i afu tipa ni ni marã gani tumori.

⁵²Ka yangara garã nye ni umba ha dati garã ngbiko ni ngbarago, i anigedi he na ni; kina kuti garã manga ni gu sunge du be ni ni anikaraga marã fu ni berewe tipa gani tumori.

⁵³Ni adú na ni wa gu ni nga boro sunge na garã na agarã; ni anizogo nga ni gbegberẽ ku bangironi te.

⁵⁴Ka i atúmo nga ni ni agi apai re ya, si du i anigasi ni agasa rogo garã ngbiko ni ngbarago, ni na awirini na ni a.

⁵⁵Bambiko awiri aYisaraere du fere ni gimi amoyambu, i nga gimi amoyambu, mi akusi yo ringara Ezipeta yo: Mi nga Yekova nga gaoni Mbori.