Read zande Pa Amotume 26 Bible Online

Pa Amotume 26 - zande bible

Pa Amotume 26

¹“Ka oni nimángi nga kpiaahe fu roni watadu dua sese kpiahe watadu maa duadua mbia ya, ka oni amáa nga sese mbia rogo gaoni ringara ki tumusa barangba ha ya; bambiko mi nga Yekova nga gaoni Mbori.

²Oni aká kuti pa gimi arago sabiti ki niirisi gi ziazia ba: Mi nga Yekova.

³“Ka oni apéka gimi rugaapai ki nika kuti gimi arugute, ki nimangi he,

⁴si du mi afú gaoni mai ti regbo ho, sende ki nizugasi zuzuhe, angua ati yo azúka zuzuhe.

⁵Gu zuzuhe oni ataki he si ki ima da ti rago kata bakakue, rago kata bakakue ki ima ki da ti rago tipa sopa bmo; oni ki niri gaoni riahe ki nimbiki, ki niraki rogo gaoni ringara ni bandabanda roni.

⁶Mi ki fu zereda ku rogo gaoni ringara, oni ki nira zezeredi, ka boro agúndesi nga roni ya; mi ki do anyarinde rogo gaoni ringara, ka basape andú nga rogo gaoni ringara ya.

⁷Oni ki nido fuo avuraroni, i ki nitiwi ku barangba roni be basape.

⁸Aboro bisue dagba roni ado aboro 100, aboro 100 dagba roni adó aboro wa 10,000; avuraroni ki nitiwi barangba roni be basape.

⁹Mi ki beré pa roni ki zugasi roni ki ngeesi roni, ki nyakasi gi zungahe na oni.

¹⁰Oni arí mbaku ahe i abanda tipa gbanga rago, oni ki niwege mbaku ahe ku zegi yo ba vovo ho.

¹¹Mi ki moi gi banye dagba roni, ka mbisimore asóga nga roni ya.

¹²Mi ki nita dagba roni, ki du ni gaoni Mbori, oni ki du ni gimi aboro.

¹³Mi nga Yekova nga gaoni Mbori, nakusi roni ringara Ezipeta yo, ya ka oni dú nga ni gayo akanga ya; mi ki Kuadi angbongbo gonga ti gorõni ki mbakadi roni oni nita nzunzu.

¹⁴“Ono ka oni adéga nga turoni fere ya, ka oni amánga nga agi arugute re dunduko ya,

¹⁵ka oni agíndiga gimi rugaapai; ka mbisimoroni asóga gimi ruru asarangbanga, ka oni amánga nga gimi arugute dunduko ya, ki basa gi zungahe,

¹⁶mi amánga gere fu roni: mi ayámba ũgbudagbuda ku ri roni rure, kaza runa, na kaza faakpoto nga gu nagbarasa bangirise ki mangi unga si nyasi. Oni anivura rũ gaoni atunga vurũ, bambiko avuraroni aríta ha dũ;

¹⁷mi azínga fu roni oni ki nikpiki bara bangiri avuraroni; agu yo nasoga roni i azóga roni azoga, oni ki nioro ho boro ado nga fuo roni ni ya.

¹⁸Ka oni adéga nga turoni fere mbiko gere ya, si du mi ki mbusi roni berewe bara saba tipa gaoni ingaapai,

¹⁹mi ki gbarasi gu ruka nga ga gaoni tandu, mi ki sa gaoni angbangbaturũ wa marã na gaoni kpotosende wa sirigi;

²⁰omeroni ki nibati gbua, bambiko gaoni ringara azúka nga zuzuhe te, angua ringara yo azuka nga zuzuhe a te.

²¹“Ka oni atá akia ti re, ka oni adéga nga turoni fere ya, mi ayé na kura gberãngbi ku ri roni, wa bara saba ngee a wa du gaoni ingaapai.

²²Mi ki zaki anyarinde ki mbu ra ku dagba roni, nga agu ra nikatuka awironi be roni, ki niimi gaoni zogozogo anya, ki nirunasi roni, oni du ni umba roni, si du gaoni arago adú wa kina bate.

²³“Ka oni asá nga tironi fere mbiko gi rugapai re ya, ono oni ki nita akia ti re,

²⁴mi atá akia ti roni, mi ni tire ki mangi roni bara saba tipa gaoni ingaapai.

²⁵Mi ki ye na basape ku ri roni, nga gu nikasara ngbanga irabape zungahe; ka oni adúngura tironi ku rogo gaoni abaakporo mi akeaa tata kaza ku dagba roni, oni ki du ni kusikusi roni ku be avuraroni.

²⁶Ho mi ka dia gaoni riahe ni be roni, ade bawe nikazo gaoni riahe rogo gu gbigiwi sa, i ki kusi gaoni riahe berewe ni ringbisiringbisi baroãha; oni ki ri he, ka oni ambíka nga be he ya.

²⁷“Ka oni adéga nga turoni fere mbiko gere ya, ono oni ki nita akia ti re,

²⁸si du mi Ri nita akia ti roni rogo ngariangaria zinga, ki mbusi roni ni tire wa bara saba tipa gaoni ingaapai.

²⁹Oni aniri kina pasio awironi nga akumbagude, oni ari kina pasio awironi nga adegude.

³⁰Mi ki gbarasi gaoni tumbatumba aba, ki dewe gaoni abamotumo fuõngua, ki bafu kangbaroni ku ri kurugba gaoni kpiaahe; mbisimore asóga roni.

³¹Mi ki gbarasi gaoni abaakporo ki sa gaoni ziazia aba ni bate, ka mi agia nga fuõ gaoni guzuguzu fuõhe a ya.

³²Mi ki gbarasi ringara, si du avuraroni ki moi kporo rogo ho, iriwoho ki ti ti yo.

³³Mi ki gbandaka roni ku dagba arikaaboro yo, mi ki mo basape kuti roni; gaoni ringara ki du ni vurubate, gaoni abaakporo ki du ni kungba ha.

³⁴“Si du ringara azámbua be gaha asabiti wa si nikadu ni bate tipa gbanga rago, ho oni ka du ni rogo ga avuraroni ringara; si du ringara aongoda, ki nizambua be gaha asabiti.

³⁵Wa si aima ni bate, si ki du na ongoda, gu ongoda re si adu nga na ni rogo ho rago gaoni asabiti ho oni araka ni rogo ho te.

³⁶Na tipa agu yo dagba roni nye, mi akéda rungbura ku ngbaduyo yo rogo agu aringara nga ga avurayo; woro yaya kpe aba yo ti oto, i ki nioro wa gu boro naora be basape, i ki nitiwi ho boro ado nga fuo yo ni ya.

³⁷I akótoka gu ni ti kurani, wa ka i aora be basape, ka boro avura nga ka ado fuo yo vurũ ya; ka ome adú nga tironi ka ru bara bangiri avuraroni ya.

³⁸Oni ki kpiki dagba arikaaboro, gu ringara nga ga avuraroni arita roni dũ.

³⁹Agu yo i ambu yo dagba roni yo arúna rogo ga avuraroni aringara bambiko gayo irairapai; na bambiko gu irairapai a nangia ga abayo, i arúna dũ wa kina yo.

⁴⁰“Ono ka i kúsi gayo irairapai nangia ga abayo rogo gayo pa biriki nga gu i anamanga kuti re, ki nita akia ti re,

⁴¹si du mi atá akia ti yo ki ye na yo ku rogo ga avurayo ringara; ka i aúmbasi gu kpotoyo yo zanga yeratise, ki mbakadi gayo irairapai;

⁴²si du mi atíngida pa gu zungahe mi azunga ha fu Yakoba, mi ki tingidi pa gu zungahe mi azunga ha fu Yisaka na gi zungahe fu Abarayama a, mi ki tingidi pa ringara.

⁴³Ono kina yo nikambu ringara, ringara ki zambua be gaha asabiti wa du he ni bate be zanga yo rogo ho. I ki mbakadi gayo irairapai, bambiko i gindiga gimi ruru asarangbanga, mbisimoyo ki sogo gimi rugaapai.

⁴⁴Tipa gure dunduko, ho i ka du ni rogo ga avurayo ringara, mi agíndiga nga yo te, mi asóga nga yo ka mi gbarasi yo kpakaya ka basa pa gi zungahe fu yo te; bambiko mi nga Yekova nga gayo Mbori;

⁴⁵ono mbiko gayo pai mi atíngida pa gi zungahe fu atitayo, nga agu yo mi akusi yo ringara Ezipeta yo ku bangiri arikaaboro, ya mi du ni gayo Mbori: Mi nga Yekova.”

⁴⁶Gere nga gu rugaapai na gu ruru asarangbanga na arugute nga gu Yekova amangi he dagba ko na awiri aYisaraere ri Bagangara Sinai yo ku ngba Mose.