Read zande Pa Amotume 27 Bible Online

Pa Amotume 27 - zande bible

Pa Amotume 27

¹Yekova ki ya fu Mose,

²“Mo yá fu awiri aYisaraere, Ho boro nikido ndikidi kidohe ni tipa boro fu Yekova ku ti ringbisiringbisi gaoni genohe,

³si du gaoni geno kumba du garãni 20 ki da ti 60 anidu ni asekere 50 nga ga feda, ringbisi he kina kuti pa gu sekere nga ga ziazia ba.

⁴Ka gu boro re du ni de, gaoni geno tipa ni anidu ni asekere 30.

⁵Ka gu boro re du na garãni tona ti bisue da ti 20, gaoni geno tipa kumba anidu ni asekere 20, na tipa de asekere bawe.

⁶Ka gude du tona ti diwi sa ki da ti bisue garã, gaoni geno tipa kumbagude anidu ni asekere bisue, nga ga feda, tipa degude gaoni geno ki ngia asekere biata nga ga feda.

⁷Ka boro du na garãni 60 na ka ndu ku mbata yo, si du gaoni geno tipa kumba anidu ni asekere 15, tipa de asekere bawe.

⁸Ka boro du ni rungorungo ni ki susi ka ni aréngba nga na fu gu gaoni geno re ya, i ki ye na gu boro re ku bangiri boromotumo, boromotumo nikanimoi genoni; kuti ome gu ni nizunga he, kina boromotumo moi genoni.

⁹“Ka si du wa nya du ni ngbatunga gu ru wa aboro nafu ru ni gamunihe mbedisatise fu Yekova, ngbatunga agu ahe dunduko nga gu boro afu fu Yekova, si dú ziazia.

¹⁰Ni anisa nga gu kura he ku ba ha watadu unda ha te, wene he ku ba gbegberẽ he, watadu gbegberẽ he ku ba wene he a te; ka ni unda nya ku ba gu nya, si du ami ue, gu ru unda yo ru na gu ru du ku ba ru anidu ni kparakpara ra ziazia.

¹¹Ka si du wa nyakorokpa du, nga ngbatunga gu ru i afu nga ru ni motumo fu Yekova ya, si du boro ki ye na gu nya re ku bara bangiri boromotumo,

¹²boromotumo ki nigedi genoru wa ka ngia wene ru watadu gbegberẽ ru a; wa mo ka maa genoru nga boromotumo, kina wo si ka nidu.

¹³Ono ka ni akpi nyemu ka tumo ru, ni ki nimoi sa dagba bisue ku ri genoru.

¹⁴“Ho boro nakpara gani kporo ni si du ziazia fu Yekova, boromotumo nikanigedi genoho wa du pa wene he watadu gbegberẽ he a; wa boromotumo ka maa genoho, si adú a kina wo.

¹⁵Ka gu ni nikpara ha akpi nyemu ka tumo gani kporo, ni animoi marã wa sa dagba bisue ku ri ndikidi genoho, si ki du ni gani.

¹⁶“Ka boro kpara papara gani ati fu Yekova nga ga gani ukumbo, si du gu genoho oni naringbisa ha ki du kuti gu tunga du tipa ha; geno zendehe wa mapunga rengbe tipa ru he wa aritere biata na bebere he ki ngia asekere 50 nga ga feda.

¹⁷Ka ni kpara gani ati tona ti garã ngbiko ni ngbarago, si anidu kina kuti ndikidi gu genoho;

¹⁸ono ka ni kpara gani ati fuo garã ngbiko ni ngbarago, si du boromotumo anigedi gu marã geno tipa ha kuti garã nga gu nye da ti garã ngbiko ni ngbarago berewe, oni ki imi geno marã.

¹⁹Ka gu ni nakpara ati akpi nyemu ka tumo ho, si du ni animoi marã wa sa dagba bisue ku ri ndikidi genoho, si ki nye ni gani.

²⁰Ono ka ni akpi nga nyemu ka tumo gu ati re ya, watadu ka ni bagi ati fu kura boro, i anitumo nga ha berewe te;

²¹ono gu ati re, ho i ka nikusi pa ha ni ti garã ngbiko ni ngbarago, si anidu ziazia fu Yekova, wa gu ati i akpara ha; boromotumo nikanidu ni iraha.

²²Ono ka ni kpara ati fu Yekova nga gu ati ni angbe he, angia nga papara gani ringara ni ukumbo ya,

²³si du boromotumo anigedi genoho dati garã ngbiko ni ngbarago, gu boro re nik anifu marã genoho kina wa ziazia he fu Yekova ni gu uru re.

²⁴Rogo garã ngbiko ni ngbarago i ka karaga ati fu gu ni i angbe he be ni, fu gu boro du ringara ni gani, si adú ni ũkumbo.

²⁵Ageno ahe ni ba sa sa adú kina kuti sekere nga ga ziazia ba: agera 20 nikanidu wa sekere sa.

²⁶“Ono gu bambata wiri anya, nga agu ra du wa bambata ra fu Yekova, a nga boro nikakpara ra wa sa te; watadu babagara watadu kandoro, ami nga ga Yekova ra.

²⁷Ka u du ni nyakorokpa, si du ni ki ngbe ru berewe kuti gu genoru ringbisi mo, ki moi sa dagba bisue ku ri he; watadu, ka i atúmo nga ru ya, i ki bagi ru kuti gu genoru.

²⁸“Ono a nga kparakpara he ho sa nga gu boro nakpara ha fu Yekova, ka i bagi watadu tumo ho te, nga gu du dagba agu ahe du be ni, watadu boro watadu nya, watadu ga gani ati ũkumbo a, agu ahe dunduko i akpara ha fu Yekova, si ni kparakpara ha ziazia.

²⁹Ka i túmo nga gu boro kpara yo ni te, nga gu ni ka i gbarasi ni dunduko dagba aboro, i aniimi ni aimo.

³⁰“Gu sa dagba bawe nga ga ringara, watadu tunga ũsende, watadu zuzu angua, si nga ga Yekova; si ni kparakpara ha ziazia fu Yekova.

³¹Ka boro akpí nyemu ka tumo gani sa dagba bawe, ni animoi sa dagba bisue ku ri he a.

³²Gu sa dagba bawe dunduko nga ga rimbasa abagara na rimbasa akandoro, nga gu bawe ru nga ga anya dunduko nga agu ra nikasusa tii ga babandara ngau, anidu ni kparakpara ra ziazia fu Yekova.

³³Ka boro nisána nga he tipa du u wenengaĩ, watadu u gbegberẽ ya, ka ni aunda nga ru a ya; ono ka ni unda ru, ami ue nga gu ru ni niunda ru na gu kurai anidu ni kparakpara ra; ka i nitúmo nga ra berewe ya.”

³⁴Gere nga agu arugute Yekova arugu Mose na ni tipa awiri aYisaraere ri Bagangara Sinai yo.