Read zande Pa Amotume 3 Bible Online

Pa Amotume 3 - zande bible

Pa Amotume 3

¹“Ka ga boro gamunihe mbedisatise du ni motumo nga motumo zereda, ka ni ye na nya dagba rimbasa abagara yo, bara watadu nara, ni aniye na gu ru zanga serõ ku bara bangiri Yekova.

²Ni ki nimoi beni ku auru ri gani gamunihe mbedisatise, ki imi ru pangbadimo bamburoko dungurati; awiri Arona nga aboromotumo ki nimigidi kureru kuti bamotumo kirikiri.

³Ti gu motumo nga motumo zereda ni motumo ni we fu Yekova, ni aniye na gu nzeme du ti aũvuru yo na gu nzeme du ti vuru yo dunduko a,

⁴ni anirogo agbiiri ue ku sa yo, na gu nzeme du dimoru yo, na gu ngbebe du ti pavuru enderu wa sa na agbiiri a.

⁵Awiri Arona ki nizo ho ri bamotumo ku ri gu zozo motumo du ku ri nyake ti we; si nga motumo ni we, du ni guzuguzu fuõhe fu Yekova.

⁶“Ka gani gamunihe mbedisatise du ni motumo nga motumo zereda fu Yekova ni kandoro dagba rimbasara yo, bara watadu nara, ni aniye na gu ru zanga serõ.

⁷Ka ni ye na wiri kandoro tipa gani gamunihe mbedisatise ni aniye na u ku bara bangiri Yekova,

⁸ki nimoi beni ku ri gani gamunihe mbedisatise, ki imi ru barangba bamburoko dungurati; awiri Arona ki nimigidi kureru kuti bamotumo kirikiri.

⁹Ti gu motumo nga motumo zereda ni motumo ni we fu Yekova a, ni aniye na nzemeru na saru na nzemehe dunduko ni nadi he ti meme ngongoru, na gu nzeme du auru aũvuru yo na gu nzeme du vuru yo,

¹⁰ni anirogo agbiiri ue ku sa yo na gu nzeme du ti ni dimoru yo, na gu ngbebe du ti pavuru enderu wa sa na agbiiri a.

¹¹Boromotumo ki nizo ho ri bamotumo wa gu riahe i afu he ni we fu Yekova.

¹²“Ka gani gamunihe mbedisatise du ni meme, ni aniye na u ku bara bangiri Yekova,

¹³ki nimoi beni ku auru riru, ki imi ru barangba bamburoko dungurati; awiri Arona ki nimigidi kureru kuti bamotumo kirikiri.

¹⁴Ni aniye na gani gamunihe mbedisatise nga motumo ni we fu Yekova, gu nzeme du auru aũvuru yo, na gu nzeme du vuru yo dunduko a,

¹⁵ni anirogo agbiiri ue ku sa yo na gu nzeme du ti ni dimoru yo, na gu ngbebe du ti pavuru enderu, wa sa na agbiiri a.

¹⁶Boromotumo anizo ho ri bamotumo, wa gu motumo i afu he ni we ni guzuguzu fuõhe. Nzemeru dunduko nga ga Yekova.

¹⁷Gi pai re si adú ni nyenye rugapai fu arika ngbatungaroni rogo gaoni abaraka dunduko, nga, ka oni níri nga nzeme watadu kure ya.”