Read zande Pa Amotume 4 Bible Online

Pa Amotume 4 - zande bible

Pa Amotume 4

¹Yekova ki ya fu Mose,

²“Mo yá fu awiri aYisaraere, Ka boro mángi ingapai zanga ruga tini na pa ha rogo agu apai Yekova arugu he ya ka boro mángi nga ha ya, ni ki mangi gu sa dagba ha yo;

³ka si ngia boromotumo du ni mbedimbedi ko mangi ingapai nga gu pai niye na pai ku ri aboro, si du ko aniye na paranga babagara zanga serõ fu Yekova tipa motumo ingapai, tipa gu ingapai mangi ko he.

⁴Ko aniye na gu babagara re ku pangbadimo bamburoko dungurati ku bara bangiri Yekova. Ko ki moi beko ku auru ri babagara, ki imi gu babagara re ku bara bangiri Yekova.

⁵Gu boromotumo du ni mbedimbedi ko, ko anidi bete kure babagara ki ye na ni ku bamburoko dungurati yo;

⁶boromotumo anizogo wirinzagako ku kureru yo, ki nimigidi kureru bara saba bara bangiri Yekova ho du roko kparaba ni nga ga kparakpara ziazia ba.

⁷Boromotumo ki kpe bete kureru ti agbanga du ti bamotumo wene fuõngua bara bangiri Yekova nga gu du bamburoko dungurati yo, ko aniuka gu yangara kure babagara re kuti mburu bamotumo nga ga zozo motumo du pangbadimo bamburoko dungurati.

⁸Ko anirogo nzeme dunduko ku sa yo du ti babagara, gu nzeme du auru aũvuru yo, na gu nzeme du vuru yo dunduko a,

⁹na agbiiri ue, na gu nzeme du ti ni dimoru yo na ngbebe du ti pavuru enderu, ni anirogo ho ku sa yo na agbiiri,

¹⁰a wa i arogo ho ti gu babagara nga ga gamunihe mbedisatise nga ga motumo zereda, boromotumo anizo ho ri bamotumo nga ga zozo motumo.

¹¹Ono ko anitindi kpoto babagara ku zegi yo gii bataya yo, na pasioru dũ, na riru, na anduru, na aũvuru yo na regboru, nga babagara na ba ru dunduko ku gigiri ba yo, yo i naauka akuke ku ho ni, ki zo ho yo; yo i naauka akuke ku ho ni, yo i ka azo ho ni.

¹³“Ka rimbasa aYisaraere dunduko mangi ingapai zanga ruga tiyo na pa ha, gi pai re si ki du ni okooko ho ti bangiri aboro gbuu, i ki mangi gu pai sa dagba gu Yekova arugu he ya ka boro mángi nga ha ya, si ki du ni pai ku ri yo;

¹⁴ho i ka niini pa gu ingapai ni mangi yo re, rimbasa gbuu aniye na paranga babagara ni motumo ingapai, ki ye na u ku barangba bamburoko dungurati yo;

¹⁵ga rimbasa abaakumba animoi beyo ku ri babagara bara bangiri Yekova, i ki imi babagara bara bangiri Yekova.

¹⁶Gu boromotumo du ni mbedimbedi ko, ko aniye na bete kure babagara ku bamburoko dungurati yo,

¹⁷boromotumo anizogo wirinzagako ku kureru yo, ki nimigidi he bara saba bara bangiri Yekova, barangba roko kparaba.

¹⁸Koanikpebete kureru ti agbanga du ti bamotumo du rogo bamburoko dungurati yo, ku bara bangiri Yekova; ko aniuka gu yangara kureru re kuti mburu bamotumo zozo motumo du pangbadimo bamburoko dungurati.

¹⁹Ko anirogo anzemeru dunduko ti ru ku sa yo, ki zo ho ri bamotumo.

²⁰Were ko ka nimangi na babagara; wa ko nimangi na gu babagara nga ga motumo ingapai ru, wo ko ka nimangi na gi ru re a; boromotumo animangi pa dada ingapai tipa yo, mi ki vu yo ti ni.

²¹Ko anitindi babagara ku zegi yo gii bataya yo, ki zo ru wa ko nizo gu bambata babagara; si nga motumo ingapai tipa gbuu.

²²“Ho bazogo ka nimangi ingapai ni zanga ruga tiko na pa ha, ki mangi gu pai sa dagba agu apai Yekova gako Mbori arugu he ya ka boro mángi nga ha ya, pai ki du ku ri ko,

²³ho ko ka niini pa gako ingapai ni nga gu mangi ko ho, ko aniye na meme tipa gako gamunihe mbedisatise nga bara, zanga serõ,

²⁴ki moi beko ku auru ri meme, ki imi ru rogo gu ba yo i naimo zozo motumo ni bara bangiri Yekova; si nga motumo ingapai.

²⁵Boromotumo ki di bete kure nga ga motumo ingapai ni wirinzagako, ki kpe he ti agbanga du ti bamotumo zozo motumo, ki uka gu yangara kureru kuti mburu bamotumo zozo motumo yo.

²⁶Ko anizo amemeru dunduko ri bamotumo, wa gu nzeme motumo nga ga amotumo zereda; si du boromotumo animangi pa dada ingapai tipa bazogo na tipa gako ingapai, mi ki vu ko ti ni.

²⁷“Ka gu boro sa dagba aboro ringara yo mangi ingapai zanga ruga tini na pa ha ki mangi gu pai sa dagba agu apai Yekova arugu pa ha ya ka boro mángi nga ha ya, pai ki du ku ri ni;

²⁸ho ni ka niini pa gu ingapai ni mangi ni he, ni aniye na meme tipa gani gamunihe mbedisatise nga nara zanga serõ, tipa gani ingapai nga gu mangi ni.

²⁹Ni animoi beni ku auru ri nya motumo ingapai, ki imi nya motumo ingapai rogo ba zozo motumo.

³⁰Boromotumo anidi bete kureru ni wirinzagako, ki kpe he ti agbanga du ti bamotumo zozo motumo, ki uka gu yangara kureru re dunduko kuti mburu bamotumo yo.

³¹Ko anirogo nzemeru ku sa yo dunduko a wa ko naroga nzeme ku sa yo ti motumo zereda, boromotumo ki zo ho ri bamotumo ni guzuguzu fuõhe fu Yekova; boromotumo ki mangi pa dada ingapai fu ni, mi ki vu ni ti ni.

³²“Ka ni ye na wiri kandoro tipa gani gamunihe mbedisatise tipa motumo ingapai, ni aniye na nara zanga serõ,

³³ki moi beni ku auru ri nya motumo ingapai ki imi ru tipa motumo ingapai, yo i naimo zozo motumo ni.

³⁴Boromotumo anidi bete kure motumo ingapai ni wirinzagako ki kpe he ti agbanga du ti bamotumo zozo motumo. Ko ki uka gu yangara kureru dunduko ku ti mburu bamotumo yo.

³⁵Ko anirogo nzemeru ku sa yo dunduko, a wa ko naroga nzeme wiri kandoro ku sa yo ti gu nga amotumo zereda; boromotumo ki zo ho ri bamotumo ri agu amotumo i nazo ho fu Yekova; boromotumo ki mangi pa dada ingapai fu ni tipa gu gani ingapai mangi ni, mi ki vu ni ti ni.