Read zande Pa Amotume 6 Bible Online

Pa Amotume 6 - zande bible

Pa Amotume 6

¹Yekova ki ya fu Mose,

²“Ka boro mangi ingapai, ki ti ndika kuti Yekova, ni nanga kurani tipa gu he i afu he ku be ni, ni banda ha, watadu rogo pa ngbaanga, watadu rogo pa dĩ, watadu manga pai fu kurani ni zuu,

³watadu ni bi gu he naaingi ki gumba zire tipa ha nizunga he ― rogo gu dagba agu apai yo dunduko nga gu boro amanga ha ni manga ingapai rogo ho,

⁴ho boro nimangi ingapai ni, ki du na pai ku ri ni mbiko ho, ni anikaraga gu he ni adĩ, watadu gu he ni arogo ho ni zuu, watadu gu he i afu he ku be ni ni banda ha, watadu gu he naaingi ni abi he,

⁵watadu gu he ni azunga he tipa ha ni zife; ni anikaraga ha kpakuse, ki moi sa dagba bisue ku ri he ki fu he fu bairaha ni gu uru fu ni gani motumo tindika.

⁶Ni aniye na gani motumo tindika fu Yekova ki fu he fu boromotumo, nga bakandoro zanga serõ dagba rimbasara yo gedi mo genoru ringbisi he kuti geno motumo tindika,

⁷boromotumo ki nimangi pa dada ingapai tipa ni bara bangiri Yekova, mi ki vu ni tipa gu pai ni nimangi he dagba agu apai aboro amanga ha ki du na pai ku ri yo mbiko ho.”

⁸Yekova ki ya fu Mose,

⁹“Mo rúgu Arona na awiriko ki ya, Gere nga rugute tipa zozo motumo. Zozo motumo nidu ri bagindawe bamotumo yo yuru dunduko sasasa ki da ku wiso, we ki nikĩ kindi ri bamotumo yo.

¹⁰Boromotumo ki niukadi tiko na gako roko du ni giri nzibi, ki vo gako roko sorondu du ni giri nzibi a, ko ki rogo agu akuke we niriti zozo motumo ri he bamotumo yo, ko ki moi he pati bamotumo.

¹¹Fuo gure, ko ka niuru gako aroko, ki ukadi tiko na kura aroko, ki tindi akuke ki kusi he ku zegi yo gii bataya yo ku rogo gigiri ba.

¹²Gu we du ri bamotumo si akĩ ri he kindi, si abísa nga wa sa te; boromotumo aniginda we ri he na awiso na awiso, ko ki nitangara zozo motumo ri he nzunzu, ki nizo nzeme amotumo zereda ri he.

¹³We akĩ ri bamotumo kindi, si abísa nga wa sa te.

¹⁴“Gere nga rugute tipa motumo riahe. Awiri Arona nikaniye na ni ku bara bangiri Yekova, ku barangba bamotumo.

¹⁵Gu ko sa ki nirogo fufurũ ngungo na beko sa nga ga motumo riahe, na gaha nzeme, na gu wene fuõngua dunduko du ri motumo riahe, ki zo gere ri bamotumo ni ũtingida ni guzuguzu fuõhe fu Yekova.

¹⁶Gu yangara ha Arona nikaniriti he na awiriko; i aniri he zanga agbooro ti ni rogo gu kparakpara ba; i aniri he vurukporo yo pati bamburoko dungurati.

¹⁷I azó nga ha na agbooro rogo ho te. Mi fu he fu yo si du ni gayo he dagba gimi amotumo yo mangi yo ho ni we; si du ni kparakpara he ziazia susi, wa motumo ingapai, wa motumo tindika a.

¹⁸Awiri Arona dunduko nga akumba nikaniri he, dagba agu amotumo nga ga Yekova mangi yo ni we, wa mi arugu he, nye anye kindi tipa arika ngbatungaroni dunduko. Gu boro nazada ha ni adú ziazia.”

¹⁹Yekova ki ya fu Mose,

²⁰“Gere nga gu gamunihe mbedisatise Arona na awiriko ka afu he fu Yekova ni gu uru i ka mbeda ko na nzeme: fufurũ ngungo wa aritere biata na bebere he ni motumo riahe nye anye kindi, i afú bebere he wiso na gu kura bebere he ku nyemu.

²¹I amánga ha na nzeme ri kpasakpasa saani; oni aniye na ni ni putaputa ha wenengaĩ, ni zozo ho ni rukutu he wa motumo riahe ki fu he fu Yekova ni guzuguzu fuõhe.

²²Gu boromotumo dagba awiri Arona yo, nga gu ko mbedi yo ko, nikadia ba ko, ko nikanifu he fu Yekova wa mi arugu he nye anye kindi; ko anizo ho dunduko.

²³I azó agu amotumo riahe kpakuse nga ga boromotumo; i ari nga ha wa sa te.”

²⁴Yekova ki ya fu Mose,

²⁵“Mo yá fu Arona na fu awiriko, Gere nga rugute tipa motumo ingapai. Rogo gu ba yo i niimi nya zozo motumo ni, yo i ka niimi motumo ingapai ni ku bara bangiri Yekova; si du ni kparakpara he ziazia susi.

²⁶Gu boromotumo nafu he tipa ingapai, kina ko nikaniri he; ko aniri he rogo gu kparakpara ba, vurukporo bamburoko dungurati yo.

²⁷Gu he watadu gu boro nikaazada pasioru, si adú ziazia; ho i ka nimigidi kureru ni kuti roko, oni anizundu gu he i amigidi he kuti ni rogo kparakpara ba.

²⁸Ono gu pere i ka nimura ha rogo ho, i aniimi he aimo; ono ka i mura ha rogo akoro sirigi, i anikpe vuru he yo ki zundu he.

²⁹Akumba dunduko dagba aboromotumo yo nikaniri he; si du ni kparakpara he ziazia susi.

³⁰Ono i aniri nga motumo ingapai nga gu ru i aniye nga na kureru ku rogo bamburoko dungurati yo tipa manga pa dada ingapai kparakpara ziazia ba yo wa sa te; i anizo ho.