Read zande Pa Amotume 7 Bible Online

Pa Amotume 7 - zande bible

Pa Amotume 7

¹“Gere nga rugute tipa motumo tindika. Si du ni kparakpara he ziazia susi;

²rogo gu ba i niimi zozo motumo ni, yo i ka niimi motumo tindika ni a, boromotumo ki nimigidi kureru kuti bamotumo kirikiri.

³I ki ye na nzemeru dunduko, na saru na nzemehe, na gu nzeme du ti aũvuru yo na gu nzeme du vuru yo a,

⁴na agbiiri ue na gu nzeme du dimoru yo, na ngbebe pavuru enderu a, nga gu ko ka roga ha dunduko ku sa yo na agbiiri;

⁵boromotumo anizo ho ri bamotumo ni motumo ni we fu Yekova; si nga motumo tindika.

⁶Akumba dunduko dagba aboromotumo nikaniri he rogo gu kparakpara ziazia ba, si du ni kparakpara he ziazia susi.

⁷Wa du pa motumo ingapai a wo du pa motumo tindika, rugute he kina sa; gu boromotumo namanga pa dada ingapai na ni, si adú ni gako he.

⁸Gu boromotumo nafu ga gu boro zozo motumo re, kina ko adía kpoto gu zozo motumo ko afu he.

⁹Agu amotumo riahe dunduko i azó ho gbigiwi yo, na gu mbakadi yo ho rogo kpano ni awadiawadi he, na gu zo yo rogo kpasakpasa saani, si nikanidu ni ga gu boromotumo he nafu he.

¹⁰Agu amotumo riahe dunduko kodi yo ho na nzeme watadu ni uguhe, si adú ni ga awiri Arona dunduko, ga gu ni wa kina ga kura ni.

¹¹“Gere nga rugute tipa motumo nga amotumo zereda, nga gu boro ka niye na ni fu Yekova.

¹²Ka ni ye na ni tipa tambuahe, si du ni aniye na rukutu zozo kpokuta zanga agbooro ti ni wa sa na motumo tambuahe, kodi yo ho na nzeme, na ayaaya kpokuta zanga agbooro ti ni uka yo nzeme ku auru he, na rukutu zozo kpokuta puta yo ho riburibu na nzeme na fufurũ ngungo.

¹³Ni afú gani gamunihe mbedisatise wa sa na rukutu kpokuta du na agbooro ti ni, na ũmotumo gani motumo zereda tipa tambuahe.

¹⁴Ni afú gu kpokuta sa dagba gamunihe mbedisatise ni tumbatumba gamahe fu Yekova, si adú ni ga gu boromotumo namigida kure nga ga amotumo zereda.

¹⁵Pasio gani ũmotumo nga ga amotumo zereda du tipa tambuahe i aniriti he du ni Kina gu uru ni afú gamunihe mbedisatise, ni ambú nga yangara ha ki da ku wiso te.

¹⁶Ono ka ũmotumo gani gamunihe mbedisatise du nga ga kidohe, watadu gamunihe ni nyemuhe, i aniri he ni kina gu uru ni afu gani ũmotumo; gu ka nye i ki ri he wiso,

¹⁷ono gu nikaninye dagba pasio ũmotumo Ki da ti biata uru i anizo ho azo.

¹⁸Ka i ri bete gu pasio ũmotumo nga ga gani amotumo zereda ti biata uru, i aída nga pa gani motumo te, ka i agéda nga pa ha fu gu ni nafu he a ya; si adú ni kere gbegberẽ he, gu ni nikaniri he ni ambú mbugo gani irairapai.

¹⁹“Gu pasio ka zi tihe na birikobiriko he i aniri nga ha te; i azó ho azo. Ono tipa pasio, agu yo du gigiri i arí he dunduko,

²⁰ono gu boro du ni birikobiriko ni nari pasio ũmotumo nga ga amotumo zereda du ni ga Yekova he, i akpára gu ni re akpara ku sa yo ti gani aboro.

²¹Gu boro ka zadi biriko nya, watadu gu biriko nga ga boro watadu kere gbegberẽ biriko he, ki ri pasio ũmotumo nga ga amotumo zereda du ni ga Yekova he, i aKpára gu ni re akpara ku sa yo ti gani aboro.”

²²Yekova ki ya fu Mose,

²³“Mo yá fu awiri aYisaraere, Ka oni nirí nga nzeme nga nzeme babagara, watadu ga kandoro, watadu ga meme ya.

²⁴Nzeme kotokakpi na nzeme gu ru sipi nyarinde ru, oni nimángi sunge amanga na ni, ono ka oni niri nga ha wa sa ya.

²⁵Bambiko agu aboro ka ri nzeme gu nya boro afu ni motumo i amanga ha ni we fu Yekova, i akpára yo akpara ku sa yo ti gayo aboro.

²⁶Ka oni nirí nga ngbatunga kure rogo gaoni akporo wa sa ya, watadu gu nga ga zire na gu nga ga nya a ya.

²⁷Gu boro ka ri kure, i akpára ni akpara ku sa yo ti gani aboro.”

²⁸Yekova ki ya fu Mose,

²⁹“Mo yá fu awiri aYisaraere, Gu ni naye na motumo nga gani amotumo zereda fu Yekova, ni ka niye na gani gamunihe mbedisatise fu Yekova. Dagba gani motumo nga gani amotumo zereda,

³⁰ni aniye na motumo ni kina boro beni nga gu i amanga ha ni we fu Yekova; ni aniye na nzeme ngbaduru a, ya i wó ti ngbaduru ni wowoti motumo ku bangiri Yekova.

³¹Boromotumo anizo nzemeru ri bamotumo, ono ngbaduru nikanidu ni ga Arona na awiriko.

³²Gu kumbambosoru oni ka nifu he fu boromotumo ni tumbatumba gamahe dagba agu amotumo yo nga ga gaoni motumo zereda.

³³Gu ko dagba awiri Arona nafu kure amotumo zereda, na nzemeru, ko adía kumbambosoru ni gako.

³⁴Bambiko mi di gu ngbaduru i awo ti ni na gu tumbatumba mbosoru dagba aũmotumo yo nga ga gayo amotumo zereda, be awiri aYisaraere, ki fu he fu Arona nga boromotumo na fu awiriko ni nyenye rugapai kindi ku dagba awiri aYisaraere yo.

³⁵Gere nga gu kparakpara he du tipa Arona na tipa awiriko, dagba agu amotumo yo i amanga ha ni we fu Yekova, i akpara ha fu yo ni kina gu uru moi yo yo i nimangi sunge ni ga Yekova aboromotumo.

³⁶Si nga gu he Yekova arugu pa ha ya awiri aYisaraere fu he fu yo, ni gu uru i ambedi yo ni nzeme; si du ni nyenye rugapai fu rika angbatungayo.”

³⁷Gere nga rugute tipa zozo motumo, tipa motumo riahe, tipa motumo ingapai, tipa motumo tindika, tipa pa dika ahe, na tipa amotumo zereda a;

³⁸nga gu Yekova arugu Mose na ni ri Bagangara Sinai yo, ni gu uru ko arugu awiri aYisaraere i ye na gayo gamunihe mbedisatise fu Yekova, ngbakungba Sinai yo.