Read zande Pa Amotume 8 Bible Online

Pa Amotume 8 - zande bible

Pa Amotume 8

¹Yekova ki ya fu Mose,

²“Mo rógo aArona na awiriko a, na aroko, na nzeme mbeda, na babagara tipa motumo ingapai, na abaakandoro ue, na kpokuta zanga agbooro ti ni na baga;

³mo ki dungura rimbasa aboro ku ngbadimo bamburoko dungurati yo.”

⁴Mose ki mangi he wa Yekova arugu ko na ni. Rimbasa aboro adungura tiyo ku ngbadimo bamburoko dungurati yo.

⁵Mose ki ya fu rimbasa aboro, “Gere nga gu Yekova arugu he i nimángi he.”

⁶Mose ki ye na aArona na awiriko, ki zundu yo.

⁷Ko ki ukadi ko na roko kuari, ki vo giri dimose dimoko, ki ukadi ko na gbanga roko, ki moi efoda ti ko, ki vo bawene giri efoda dimoko i atu he ni tatamana.

⁸Ko ki asi mangu ngbaduse ti ngbaduko, ki moi Urima na Tumima ku rogo mangu ngbaduse yo.

⁹Ko ki moi kaĩkaĩ rokori ku riko yo, ki moi gu dahabu du ni kpasakpasa ha ku ri kaĩkaĩ rokori auru kpakpuko, nga kparakpara kpakpari ziazia, a wa Yekova arugu Mose na ni.

¹⁰Mose ki di nzeme mbeda, ki mbedi banye na ni na agu ahe dunduko nadu rogo ho, ki kpara ha ziazia.

¹¹Ko ki migidi bete nzeme ku auru bamotumo wa bara saba, ki mbedi bamotumo na aũhe dunduko, na kurungbu zundatise na ndumburuhe, ka kpara ha ziazia.

¹²Ko ki uka bete nzeme mbeda ku ri Arona yo, ki mbedi ko ka kpara ko ziazia.

¹³Mose ki ye na awiri Arona ki ukadi yo na aroko kuari, ki vodi giri dimose ku dimoyo, ki moi akutuku ku riyo yo, a wa Yekova arugu Mose na ni.

¹⁴Ko ki ye na gu babagara du tipa motumo ingapai; aArona na awiriko ki moi beyo ku ri gu babagara du tipa motumo ingapai.

¹⁵Mose ki imi ru, ki di kureru ni wirinzagako ki kpe he ti agbanga bamotumo kirikiri, ki girisi bamotumo, ki uka kureru kuti mburu bamotumo, ki kpara ha ziazia, ka manga pa dada ingapai tipa ha.

¹⁶Ko ki rogo gu nzeme dunduko du ti aũvuru yo na ngbebe pavuru enderu, na agbiiri ue na gu nzeme du ti ni, Mose ki zo ho ri bamotumo.

¹⁷Ono babagara na kpotoru na pasioru, na regboru ko azo ho ku zegi yo gii bataya yo, a wa Yekova arugu Mose na ni.

¹⁸Ko ki ye na gu bakandoro du tipa zozo motumo; aArona na awiriko ki moi beyo ku auru ri bakandoro.

¹⁹Mose ki imi ru, ki migidi kureru ku ri bamotumo kirikiri.

²⁰Ho i niyepe rogo bakandoro ni, Mose ki zo riru na yepeyepe pasioru na nzemeru a.

²¹Ho i nizundu aũvuru yo ni na nduru, Mose ki zo gu bakandoro re na ba ru ri bamotumo, ni zozo motumo ni guzuguzu fuõhe, ni gu motumo i amanga ha ni we fu Yekova, a wa Yekova arugu Mose na ni.

²²Ko ki ye na gu kura bakandoro, gu bakandoro nga ga dikatise ru; aArona na awiriko ki moi beyo ku auru ri bakandoro.

²³Mose ki imi ru, ki di bete kureru ki moi he ti ngba kpetu Arona ku kumbabeko yo, na ti bawirinzaga kumbabeko, na ti bawirindu kumbanduko.

²⁴Awiri Arona ki ye a tigayo, Mose ki moi bete kure ti ngba kpetuyo ku kumbabeyo yo, na ti abawirinzaga kumbabeyo na ti abawirindu kumbanduyo. Mose ki migidi kureru kuti bamotumo kirikiri.

²⁵Ko ki di nzemeru na saru na nzemehe, na gu nzeme dunduko du ti aũvuru yo na ngbebe pavuru enderu, na agbiiri ue na gu nzeme du ti ni, na kumbambosoru.

²⁶Ko ki di rukutu zozo kpokuta sa adu nga na agbooro ti ni ya baga yo, nadu bara bangiri Yekova, na rukutu zozo kpokuta sa du na nzeme, na ayaaya kpokuta a sa, ki moi he ri nzeme, ku auru kumbambosoru.

²⁷Ko ki mamoi agi ahe re dunduko ku be Arona yo na ku be awiriko yo, ki wo ti beyo ni wowoti motumo bara bangiri Yekova.

²⁸Si du Mose ki rogo ho be yo ki zo ho ri bamotumo na zozo motumo, ni ũdikatise ni guzuguzu fuõhe, ni motumo i amanga ha ni we fu Yekova.

²⁹Mose ki di ngbaduru ki wo ti ni ni wowoti motumo bara bangiri Yekova. Si adu ni ga Mose bete pa bakandoro dikatise, a wa Yekova arugu Mose na ni.

³⁰Mose ki di bete nzeme mbeda na bete gu kure du ri bamotumo, ki migidi he ku ri Arona na gako aroko, na awiriko na gayo aroko a wa sa.

³¹Mose ki ya fu Arona na fu awiriko, “Oni pási pasio pati ngbadimo bamburoko dungurati, ki ri he yo na gu kpokuta du baga yo ngaga amotumo dikatise, a wa mi arugu he, niya, ‘Arona arí he na awiriko a’!

³²gu pasio nikaninye na gu kpokuta a, oni anizo ho azo.

³³Ka oni akúra nga ku zegi yo ti ngbadimo bamburoko dungurati yo tipa rame saba ya, daho rame gaoni dikatise ka rengba ni, bambiko pa dika roni adía rame saba.

³⁴Yekova arugu gi pai re a wa i nimangi he kina areme, ka manga pa dada ingapai tipa roni.

³⁵Oni anyé pa ngbadimo bamburoko dungurati yo rame ki du saba, uru na yuru a, nimangi agu apai Yekova arugu he, oni ka ndu ka kpika; bambiko wo rugu yo re.”

³⁶AArona na awiriko ki mangi agu apai dunduko Yekova arugu he ku ngba Mose.