Read zande Yeremaya 10 Bible Online

Yeremaya 10 - zande bible

Yeremaya 10

¹Ako aboro aYisaraere, oni gí gu pai Yekova agumba ha fu roni.

²Ya Yekova wẽ: “Ka oni wiriki nga gu pai nga ga arikaaboro ya, ka oni yúngura nga be gu yuguyuguapai nga ga angbangbaturũ ya, bambiko arikaaboro nayungura be he,

³bambiko asino aboro du ni kungba he. I de ngua ku sande bire yo, ki mangi sunge he na mangua ni be bangbasia sunge.

⁴Aboro nafonga ha na feda na dahabu; i nabanga ha na aneri na bande ya ka si rengbe nga ka wo ya.

⁵Gayo kpiaahe du wa sesekpia boro ni ngua ati koforo yo, ka si arengba nga ka fura ya; si rengbe i tindi he atinda, bambiko si arengba nga ka ndu te. Ka oni gúnde nga be he ya, bambiko si arengba nga ka manga gbigbitapai te, a nga manga wenepai rogo ho yo a te.”

⁶Ako Yekova, kura ni ho yy? mo te; mo nga bakere boro, rimoro ki du ni bakere he na ngarã.

⁷Ako Bakindo nga ga arimbasa ko, da nikagunde nga ti ro ya? Bambiko gere nga gu re na mo; bambiko dagba agu airatatamana nga ga arikaaboro yo na rogo gayo angbi dunduko a nga boro yo sa du wa mo te.

⁸I nga airazuu ni mumungo aboro a; gu rugapai nga ga kpiaahe si wa kina uturangba!

⁹I ye na tata feda Tarusisa yo, na dahabu Ufaza yo. Si nga gu sunge nga ga bangbasia na sunge nga ga pangu dahabu; gaha ukadiukadi roko du ni gbaya ha ni ngungungu he; si dunduko nga gu sunge nga ga ababio.

¹⁰Ono Yekova nga ndikidi Mbori; ko nga unga Mbori nga nyenye Bakindo. Kpotosende nakio be gako zinga, ka arikaaboro arengba nga na gako imisiri ngbaduse ya.

¹¹Were mo ka gumba ha fu yo: “Agu ambori naamanga nga angbangbaturũ na kpotosende ya si akpíka auru kpotosende na tii angbangbaturũ no.”

¹²Yekova nga gu ko namangi kpoto sende ni gako tandu, nanyakasi zegino be gako tatamana, nazaraga angbangbaturũ be gako rugatinapai.

¹³Ho ko agumba fugoko ni gbarakagbaraka pai adu nga ga aime rogo angbangbaturũ yo, ko namanga nduro si guari ti digida kpotosende yo, ko namanga nduro si guari ti digida kpotosende yo. Ko namanga ikpira gumba tipa mai, ko ki nikusi bayuge rogo gako abaigaahe yo.

¹⁴Aboro ni ba sa sa nga airazuu ni azangainahe; apangu dahabu ni ba sa sa du na zee mbiko gayo sese kpiaahe, bambiko gayo zaragasizaragasi kpiaahe nga úzire, onga rogo ho yo te.

¹⁵Si nga kungba he, nga sunge ni ũzire; ti rago gayo mbusa si akpí akpi.

¹⁶Gu ko nga ga Yakoba ko ko wa agi yo te re, bambiko ko nga gu ko namangi ahe dunduko, Yisaraere ki du ni gu ngbatunga nga ga gako kumuko; rimoko nga Yekova nga ga arimbasa ko.

¹⁷Ako mo ninaraka nyanyaki ba yo, mo dúngura gamo vodivodi ahe sande!

¹⁸Bambiko ya Yekova wẽ: “Mo ngére, mi naba araki rogo gi ringara re wa barioko ti gi rago re, mi ki ye na rungosi ku ri yo, ya i ini he.”

¹⁹Na gberẽ he fere bambiko gi ima! Gi oro ni kere he. Ono ya mi, “Ni rengo gere nga imisiripai, mi ka hi he ahi.”

²⁰Gi bamburoko gberẽ, gimi agiri bamburoko dunduko kafu; awire guari pati re du, i ho te; boro ho ka zaraga gi bamburoko berewe te, ka maa gimi aroko dadahe ku ari a te.

²¹Bambiko ababanda akandoro nga airazuu, i agbata nga pai be Yekova te; gayo rimbasa akandoro ki gbandaka dunduko.

²²Oni dége turoni, mboimboipai du! Mo ngére, si naye!― bakere woro bazigizo naye ringara nodiyo ka sa agu abaakporo nga ga Yuda ni vurubate, ni abaraka fu ahúa.

²³Ako Yekova, mi ini he ya gu pai nga ga boro si rogo ni yo te, gu boro nata, pa ruga gani apai si rogo ni yo te.

²⁴Ako Yekova, mo rúgu re, ono rogo ruru sarangbanga; ni ga zinga te, mo ka nyasa re.

²⁵Mo úka ga ngariangaria zinga ku ri arikaaboro nga agu yo aina nga ro ya, na ku ri agu aboro ayamba nga he ti rimoro ya; bambiko i riti Yakoba; i riti ko ki nyasi ko; ki gbarasi gako baraka.