Read zande Yeremaya 11 Bible Online

Yeremaya 11 - zande bible

Yeremaya 11

¹Gu pai naye koyo du Yeremaya ni yo du Yekova ni:

²“Mo gí agu apai nga ga gi mokido re, ki gumba pai fu aboro Yuda na fu araki Yerusarema yo.

³Mo ayá fu yo, Ya Yekova nga ga aYisaraere Mbori wẽ: Boro motiwa nga gu boro agia nga agu apai nga ga gi mokido re ya,

⁴nga gu mi arugu abaroni na ni ho mi akusi yo ni ringara Ezipeta yo, gbigiwi marã yo, niya, Oni dége turoni sa fugore, ki mangi agu apai dunduko mi arugu roni na ni. Si du oni ka du ti ni ni gimi aboro, mi ki du ni gaoni Mbori,

⁵ya mi digisi gu zungahe nga gu mi azunga ha fu abaroni ka fu ringara fu yo du adu na mamuanya na nzeme anyege kpaima, wa du he ti gi uru re.” Mi ki karaga ha, “Si du wo, Yekova.”

⁶Yekova ki ya fere, “Mo táki pande agi apai dunduko re ku rogo abaakporo Yuda yo, na ngba agu agene bakporo nga ga Yerusarema: Oni gí agu apai nga ga gi mokido re ki mangi, he.

⁷Bambiko mi afugu he fu abaroni sirisiri ho mi aye ni na yo ringara Ezipeta yo, ki niguari ngbatutu ki nifugu he fu yo da ku areme niya, Oni gí sangbare.

⁸Ono i agia nga sangbare watadu ye tuyo te, ono aboro ni ba sa sa apeke kina gayo mumungo berã nga ga gbigbita kpotoyo yo. Si du mi aye na agu apai dunduko ku ri yo nga ga gi mokido re, nga gu mi arugu yo sa manga ha, ono i amanga nga ha te.”

⁹Yekova ki ya fere berewe, “Tabura du dagba aboro Yuda na araki Yerusarema yo.

¹⁰I sa tiyo berewe sa gu irairaapai nga ga atitayo nangia agu yo nambu gia gimi apai; i ndu fuo kura ambori ka manga pa ha; ngbatunga Yisaraere na ngbatunga Yuda abasa pa gi mokido nga gu mi amangi na abayo.

¹¹Si du, ya Yekova wẽ, Mo ngére, mi naye na gbigbitapai ku ri yo nga gu i arengba nga ka merã be he ya; ka i vura kpara ku ari fere, mi adéga nga ture fu yo te.

¹²Si du agu abaakporo nga ga Yuda na araki Yerusarema yo andu ka kpara fu ambori nga agu yo i nazo fuõngua fu he, ono si arengba nga ka batasa yo ti rago gayo gbigbitapai te.

¹³Ako aYudo, gaoni ambori du ni ngenge he a wa du gaoni abaakporo; agu abamotumo oni amoi he tipa uzee si ni ngenge he wa agene bakporo Yerusarema, nga agu abamotumo oni nazo fuõngua auru he fu Bara.

¹⁴“Si du ka mo nikpari nga tipa agi aboro re ya, watadu paa ku ari watadu kpara kpe tipa yo a ya, bambiko mi adéga nga ture ho i ka yamba he ni ti rago manga gbigbitapai fu yo te.

¹⁵Si rengbe gu ri mi akpi nyemu ri gbe ri du kpure yo, ho mangi ri pa wasiro ni? Azungahe rengbe na dia rago mbusa ti roni ku sa yo watadu gu pasio i atumo na ni? Oni rengbe na ngi?

¹⁶Yekova ayambu rimorani mbata nga, ‘Two ngua eraya, ni betedi he na wene zuzu he’; ono na woro bakere gugugu yuge ko agínda we ti ni, abehe ki gbi du.

¹⁷Yekova nga ga arimbasa ko, naru roni, kd pe pa gbigbitapai kuti roni, bambiko gu gbigbitapai mangi aboro aYisaraere na aboro Yuda, ka gara gi zinga ku ri roni nizo fuõngua fu Bara.”

¹⁸Yekova ayugu pa ha fere mi ki ini he; si du mo ayugu gayo gbigbita mangaapai fere.

¹⁹Ono mi adu wa bayee wiri kandoro i nindu na u sa imo ru. Mi aina nga ha ya i nasanga apai kuti re te, niya, “Ani gbárasi ngua na zuzuhe, ani dé ko ku sa yo ti gu ringara nga ga unga aboro, ya ka i atingida nga pa rimoko berewe ya.”

²⁰Ono, Ako Yekova nga ga arimbasa ko, nasara ngbanga ni ruru he, naasada kpoto aboro yo na gayo berã, mo ídi he mi bi ga irabape ku ri yo, bambiko mi yugu gi ngbanga foro.

²¹Si du ya Yekova wẽ tipa agu aboro nga ga Anatota yo, nagbata ungaro, niya, “Ka mo gúmba nga pai na rimo Yekova ya, mo akpi be rani”―

²²si du ya Yekova nga ga arimbasa ko wẽ: “Mo ngére, mi ambusa yo; paranga aboro akpíka be basape; awiriyo nga akumba na ade akpíka be ngbongi;

²³gu ni anyé nga te. Bambiko mi ayé na gbigbitapai ku ri aboro Anatota, ti garã gayo mbusa.”