Read zande Yeremaya 12 Bible Online

Yeremaya 12 - zande bible

Yeremaya 12

¹Ako Yekova, mo ni ruru ro, ho mi nazungadi he ni foro; ono mo ídi he mi sana ro tipa gu pai dũ bangire. Tipagine ga gbegberẽ boro pai au ti ni? Tipagine agu yo dunduko nga airabiriki nau ti ni?

²Mo narú yo, i ki du na tarãyo, i ki soho ki nizuku; mo du mbembedi na ngbayo ki du tuturu ti kpotoyo yo.

³Ono mo, Ako Yekova, mo ini re; mo nabi re, ki niasadi gi berã koyo du mo ni. Mo gbéfe yo ku zegi yo wa akandoro sa imo ra, ki kpara yo ku bani tipa gu uru nga ga imo yo.

⁴Rago adú waĩ ringara nikpari kpenunga, anvuo ati yo dunduko ki ugu? Bambiko gu gbegberẽpai nga ga agu yo naraka rogo ho anya na azire merẽ ku sa yo, bambiko ya aboro, “Ko abí nga gaani digida pai te.”

⁵Yekova aya: “Ka mo zo abangira na aboro ni nduro, i ki mbusi ro, waĩ ka mo zo abangira na afarasi? Si ngia rogo zezeredi ringara mo ki ti sande, waĩ ka mo mangi rogo gu gbuku nga ga Yaradene?

⁶Bambiko awirinamo na ga bamo aborokporo, kina yo namangi pai ni biriki foro; i nado fuo ro ni rimbasa yo nita wawa; ka mo ídi nga gayo apai ya, ka i vura ka gumba betedi apai foro vuru.”

⁷“Mi nga Yekova guari pati gimi aborokporo, mi mbu gimi siasia aboro; mi fu agu aboro mbisimore nakpi nyemu yo ku be avurayo.

⁸Gimi siasia yo sa tiyo fere wa bahu bire yo i tumba fugoyo kuti re; si du mi nasoga yo ti ni.

⁹Gimi siasia yo fere wa kenekene zire ninazia akurai? Agu azire nazia akurara ami pati yo kirikiri? Oni yé, oni nga kere anya dunduko; oni yé ka rita yo.

¹⁰Badungu ababanda akandoro agbarasi gimi ati bakakue, i simbi gi kparakpara rago ku sande, i mangi gi wene kparakpara rago ni vurubate wa ngbakungba.

¹¹I mangi he ni vurubate; wa vurubate, si nakpara fere. Ringara dunduko mangi yo ni vurubate, ono a nga boro ho berẽ paha ku kpotoni yo te.

¹²Abagbarasi rago ye ku ri gu kungba sosono arago du rogo ngbi ngume yo; bambiko gu basape nga ga Yekova riti ahe tona ti gu digida ringara sa, sa gu kura ha; boro ho du na zereda te.

¹³I rú nganu ki ke kina akiwe, i mbusi tiyo ono ka mokiisa adu nga be yo ya. I adú na zee ti regbo gayo ke ahe bambiko gu ngariangaria zinga nga ga Yekova.”

¹⁴Ya Yekova wẽ tipa gu gbigbita akuare dunduko nga agu yo zadi gu ukumbo nga gu fu mi fu gimi aboro aYisaraere ni gayo: “Mo ngére, mi amófa yo rogo gayo ringara, mi ki mofo aboro Yuda dagba yo.

¹⁵Na fuo mofa mi yo, nungayo adú adu ti re berewe, mi ki ye na yo dunduko ni ba sa sa berewe sa gayo ukumbo ku rogo gayo ringara.

¹⁶Si ki ye ka du wa gere, ka i wiriki agu apai nga ga gimi aboro ngangarã, ka zunga he ti rimore, ‘Wa du Yekova ni ungako,’ zavura wa yugu yo pai fu gimi aboro i zunga he ti rimo Bara, i ki du ni duadua yo bangbanda gimi aboro.

¹⁷Ono ka gu rikaaboro adéga nga tuyo ya, mi ki mofo yo kpakaya ki gbarasi yo, wo poi Yekova.”