Read zande Yeremaya 15 Bible Online

Yeremaya 15 - zande bible

Yeremaya 15

¹Yekova ki ya fere: “Zavura aMose na Samuere ka ru ku bara bangire, kpotore yo asa nga tihe koyo du agi aboro ni te re. Mo dó yo ku zegi yo bara bangire, i ga!

²Ho i ka sana ro ni niya, ‘Wari ani ka ndu ku ho ni?’ mo ayá fu yo, ‘Ya Yekova wẽ: “ ‘Agu yo du tipa tata kaza, i andú sa tata kaza, agu yo du tipa basape, sa basape; agu yo du tipa ngbongi, sa ngbongi, na agu yo du tipa zia yo, i andú sa zia yo a.’ ”

³“Mi aríngbisa arika abagbarasi aboro ku ri yo biama, wo poi Yekova: basape sa imo yo, aango ka yepa yo, azire ari na anya kpotosende ka rita yo na ka gbarasa yo.

⁴Mi ki sa yo ni kere he fu angbi dunduko auru kpotosende bambiko gu pai Manase wiri Izikiya amangi Yerusarema yo, nangia bakindo aYudo.

⁵“Ako Yerusarema, da nikadu na nunga roni ti ni, watadu da nikakpara kpe tipa roni? Da nikasa tini ku bani ka sana he waĩ du pa roni?

⁶Oni gindiga re, wo poi Yekova, oni ka kuti pa ndu ku sa yo; si du mi taĩ bere sa roni ka gbarasa roni;― mi mbu De sa gi berã.

⁷Mi igita yo na úigitahe ngbadimo bakporo nga ga ringara; mi bengete yo, mi gbarasi gimi aboro; i akaraga nga tiyo ngba gene gayo apai yo te.

⁸Mi ngeesi gedigedi gayo adeku rugbo i susi ngume abaime; mi ye na bagbarasi he bebere uru kuti ana paranga akumba; mi mangi ima na gbudagbuda si ti ku ri yo rure.

⁹Gu ri batika saba naruna; bayengia zi ri; uru ti he gari rame koyo; i aba zee ku ri ri ki mungosi ri. Gu yangara yo mi ka fu yo sa basape ku barangba avurayo, wo poi Yekova.”

¹⁰Nina, na gberẽ he fere, wa mo avungu re, mi du ni boro kpata ni úkango fu ringara dunduko! mi afu nga marã bape fu boro te, mi adia nga bape marã be boro te, ono i dunduko tiwa re.

¹¹Ako Yekova, si dú wo, ka mi azúngadi nga ro tipa gayo wenepai ya, ka mi azúngadi nga ro tipa avurayo rago gbigbitapai na rago fudifudipai a ya!

¹²Ka boro kiti marã, gu marã naye nodiyo na sirigi?

¹³“Gaoni kumuko na gaoni kikiipaahe mi afú he wa úmozi, zanga genoho, tipa gaoni ingaapai dunduko, rogo gaoni ringara dunduko.

¹⁴Mi asá roni oni mangi pa avuraroni rogo gu ringara oni aina nga ha ya, bambiko rago gi zinga mi ginda we nga gu nikaagbi nye anye kindi.”

¹⁵Ako Yekova, mo ini he; mo tingidi pa re ki ye ka bi re, ki iri bape re ti abarungosi re. Rogo ga hipai ka mo dí nga re ku sa yo ya; mo ini he mi di gbarasarimo mbiko ro.

¹⁶Mi bi gamo apai, mi ki ri he, ga pai ki sa tihe fere ni ngbarago ni gu pai kpotore yo nangi mbiko ho; bambiko i yambu re ti rimoro, Ako Yekova, Mbori nga ga arimbasa ko.

¹⁷Mi asunga nga dagba gu rika nga ga airasawia te; mi angi nga a te; mi asungu ni sa re, bambiko bero naadu ti re, bambiko mo ahisi re na imisiri ngbaduse.

¹⁸Tipagine du gi ima ti ni zanga zereda, gi oro ni nyebaru, ka si aida nga ka wi ya? Mo adú fere wa irabiriki wiridi, wa agu aime nga gu ugudi?

¹⁹Si du ya Yekova wẽ: “Ka mo káraga tiro, mi ambákada ga pai, mo ki niru ku bara bangire. Ka mo gumba gu pai kii pa ha akia, ki mbu gumba pa gu he akia nga pa ha ya, mo adú wa kina ngbare. I akáraga tiyo fuo ro, ono mo akáraga nga tiro fuo yo te.

²⁰Mi ki sa ro fu agi aboro re ni nyanyaki ngapa gbata nga ga sirigi; i asó vura kuti ro, ono i adia nga be ro te, bambiko mi du na mo ka batasa ro na ka kusa ro, wo poi Yekova.

²¹Mi akúsa ro be gbigbita aboro, ki tumo ro be gu zia nga ga bakigisi aboro.”