Read zande Yeremaya 19 Bible Online

Yeremaya 19 - zande bible

Yeremaya 19

¹Ya Yekova wẽ, “Mo ndú, ki ngbe ga bameakoro kambu, ki rogo bete abaakumba dagba aboro yo na bete abaakumba aboromotumo,

²ki ndu ku Ngboongboorago Beni-inomi yo ti barima ti Ngbadimo Ngbadi, ki taki pande agu apai yo gumba mi foro.

³Mo ayá, ‘Oni gí sangba Yekova, oni nga abakindo aYudo na araki Yerusarema yo. Ya Yekova nga ga arimbasa ko nga ga aYisaraere Mbori wẽ: Oni ngére, mi naye na ngbatunga gbigbitapai ku ri gi ba re ya tu agu yo nikagia ha akpérenga akperenga be he dunduko.

⁴Bambiko aboro mbu re, ki birikosi gi ba re nizo fuõngua rogo ho fu kura ambori nga gu i aina nga ha ya na abayo na abakindo aYudo a ya; bambiko i hisi gi ba re ni kure aboro wenesa,

⁵ki dudua gbangagbanga aba fu Bara ka zo awiriyo ku we yo wa zozo amotumo fu Bara, nga gu mi aruga nga yo kuti ni ya, watadu rú ndika ha a ya, ka si aye nga ku rogo gi berã a ya;

⁶si du, oni ngére, ragoho naye, wo poi Yekova, ho i ka yamba nga gi ba ni re berewe ni Tofeta ya, watadu Ngboongboorago Beniinomi a ya, ono ni Ngboongboorago Imoboro.

⁷Na rogo gi ba re mi amúngosi gu berã pa apai nga ga Yuda na ga Yerusarema ni ku he, ki mangi agi aboro re i kpiki be basape barangba avurayo, na be agu yo nagbata ungayo. Mi afú kangbayo fu azire ari na anya kpotosende.

⁸Mi ki sa gi bakporo re ni úkiga ni gu he i aumo ho; agu aboro dunduko nikasusa pati he akíga ki niumo ho bambiko gu gberãrago nga gaha dunduko.

⁹Mi ki mangi yo i ri pasio awiriyo nga akumbagude na adegude a, aboro ni ba sa sa nikari pasio akurayo ti rago kisa yo yo ku bakporo yo na rungosi, nga gu avurayo ka rungosi yo na ni na agu yo nagbata ungayo.’

¹⁰“Mo ki futuka gu kambu re ku bangiri agu aboro ka ndu na mo,

¹¹ki ya fu yo, ‘Ya Yekova nga ga arimbasa ko wẽ: Wo mi ka futuka agi aboro re na gi bakporo re, wa boro niimi ga bameakoro pere, ka i arengba nga ka mbakada ha berewe wa sa ya. I akpísida aboro Tofeta yo bambiko ba adu nga ho berewe i ka kpisida yo rogo ho te.

¹²Were mi ka manga fu gi ba re, wo poi Yekova, na araki rogo ho, ki mangi gi bakporo re wa Tofeta.

¹³Agu abambu du Yerusarema yo na agu abambu nga ga abakindo aYudo ― agu abambu dunduko i nazo fuõngua ri he yo fu agu arimbasa dunduko nga ga ngbangbaturũ, na mbirimbiri amotumo i nauka ha fu kura ambori ― si adú ni gbarasigbarasi he wa gu ba nga Tofeta.’ ”

¹⁴Yeremaya ki ye Tofeta yo, yo Yekova akedi ko ku ho ni ko gumba pai yo, ko ki ru vurukporo ga Yekova bambu yo, ki ya fu aboro dunduko:

¹⁵“Ya Yekova nga ga arimbasa ko nga ga aYisaraere Mbori wẽ, Oni ngére, mi naye na gbigbitapai ku ri bakporo na ku ri gaha abaagbata dunduko nga gu mi agumba paha kuti ni, bambiko i nyakasi riyo, ki ka pa gia gimi apai.”