Read zande Yeremaya 20 Bible Online

Yeremaya 20 - zande bible

Yeremaya 20

¹Were Pasura nangia boromotumo, nangia wiri Imere, gu ko nangia gbia abarumbatayo rogo ga Yekova bambu yo, ko agi pa Yeremaya ko nigumba agi apai re.

²Pasura ki nari Yeremaya nangia nebi, ki moi ko ku rogo agu angborõ nadu pa Ngbadimo Benyamina ku ngbi yo ti ga Yekova bambu.

³Wiso, ho Pasura akusi Yeremaya ni ti angborõ, Yeremaya ki ya fu ko, “Yekova ayamba nga rimoro nga Pasura te, ono Ugunde ti apavururago dunduko.

⁴Bambiko ya Yekova wẽ: Mo ngére, mi úsá ro ni ugunde fu kina ro na fu abadiaro dunduko. I akpíka be basape nga ga avurayo mo ki nibi yo abi. Mi ki fu aYudo dunduko ku be bakindo aBabero; ko agá na yo ni zizi yo ku Babera yo, ki imi yo yo ni basape.

⁵Ku ri gure, mi afú agu aukumuko dunduko nga ga bakporo, gaha amokiisa dunduko, na gaha kikiipaahe dunduko, na ga abakindo aYudo kikiipaahe ku be avurayo, nga agu yo nikagbu yo, ki zi yo, ki ga na yo ku Babera yo.

⁶Na mo, Pasura, na agu aboro dunduko naraka kpuro, i andú ni zizi yo du; mo andú ku Babera yo; yo mo ka kpi ni, i ki kpisidi ro yo, mo na abadiaro dunduko, nga agu yo mo agumba pai fu yo ni zire.”

⁷Ako Yekova, mo nangi re, mi adu ni nanginangi re; mo nyaki ki susi re, mo di be re. Mi sa tire ni úmongo na uru pitipiti; aboro dunduko namoma re.

⁸Bambiko ho mi nifura ni, mi nikpa ri ku ari, mi poi ku ari, “Pa zuu du na pa gbarasahe!” Bambiko sangba Yekova sa tihe fere ni ũgbarasarimo na ni úumohe na uru pitipiti kindi.

⁹Ka mi ya, “Mi apé nga pa ko te, watadu gumba pai berewe ti rimoko te,” si kpotore yo wa ka si du nga we kisi yo ku rogo amemere yo, mi ki nimbu be zada ha koyo, ka mi arengba nga na ni ya.

¹⁰Bambiko mi gi pa dungu aboro i nigumba pai ni patapata. Gunde du rogo apavururago dunduko! “Mo kíti ngbanga ko! Ani kiti ngbanga ko!” wo pe akuare he ini mi yo wenengaĩ dunduko, nangera tipa tigo re. “Isoke, i anánga ko, ani ki di be ko, ki iri bape rani ti ko.”

¹¹Ono Yekova du na mi wa kikii borosovura; si du abarungosi re akótoka ti ni, i adia nga be re te. I adú na bakere zee, bambiko i adia nga be re te. Gayo nyenye wasiro bangirise ago nga ti ni wa sa te.

¹²Ako Yekova nga ga arimbasa ko, naasada gu ruru yo, nabi kpotoboro yo na berãyo a, mo ídi he fere mi bi ga irabape ku ri yo, bambiko mi fu gi ngbanga ku be ro.

¹³Oni bi bia fu Yekova; oni tambua Yekova! Bambiko ko batasi unga aboro zingohe be amangi gbigbitapai.

¹⁴I tiwa gu uru i avungu re ti ni! Gu uru ho nina avungu re ni, ka si dú nga ni uru maku ya!

¹⁵Boro motiwa nga gu boro naye na pangbanga fu buba, “I vungu kumbagude foro,” ka fu bakere ngbarago fu ko.

¹⁶Gu boro dú re wa agu abaakporo nga gu Yekova asika ha zanga nunga; ni gí kpe wiso na pa zigbasi rago bebere uru,

¹⁷bambiko ko aimo nga re ku ruku mbu yo te; si du ka nina adu ni murãre, na rukumburi nye anye kindi ni bakere he.

¹⁸Tipagine mi akuru ti ni rukumbu yo ka bi mbugo na rungo, ka nyasa gimi arame rogo zee?