Read zande Yeremaya 21 Bible Online

Yeremaya 21 - zande bible

Yeremaya 21

¹Gere nga gu pai naye koyo du i Yeremaya ni yo du Yekova ni, ho Bakindo Sedekiya akedi Pasura ni koyo du ko ni nangia wiri Marekiya na Sefanya boromotumo, nangia wiri Maseya, niya,

²“Mo sána Yekova tipa rani, bambiko Nebukadenesara bakindo aBabero naso vura kuti rani; isoke Yekova amánga pa rani kuti gu gako iiriwo mangapai dunduko, ki sa ko ko karaga tiko ti rani.”

³Yeremaya ki ya fu yo:

⁴“Oni ayá fu Sedekiya wẽ, ‘Ya Yekova nga ga aYisaraere Mbori wẽ: Oni ngére, mi asá agu aúvura ku sa no nga gu du be roni nga gu oni aso vura na ni kuti bakindo aBabero na kuti aKasado nga agu yo ru nguru zegi yo kuti roni gii ngapa bakporo yo; mi ki ye na yo wa sa ku bangbanda gi bakporo yo re.

⁵Mi ni tire nikaso vura kuti roni ni taã bere na nyanyaki bere, rogo zinga, na rogo ngariangaria zinga, na rogo bakere era.

⁶Mi amánga araki rogo gi bakporo re, aboro na anya a; i akpíka be bakere tata kaza.

⁷Mi akúsa Sedekiya bakindo aYudo giza, wo poi Yekova, na gako amoyambu, na agu aboro du rogo gi bakporo re nikabata be tata kaza, be basape, na be ngbongi, ku be Nebukadenesara bakindo aBabero na ku be avurayo, ku be agu yo nagbata ungayo. Ko aimo yo na rindi basape; nungayo adú nga ti ko te, ko abánda nga pa yo te, watadu ina pai fu yo a te.’

⁸“Mo ki ya fu agi aboro re: ‘Ya Yekova wẽ: Oni ngére, mi moi gu pai nga ga unga ku bara bangironi na gu pai nga ga kpio

⁹Gu ni nikasunga rogo gi bakporo re ni akpi be basape, be ngbongi, na be tata kaza; ono gu ni nikakura ka ra fu aKasado nga agu yo ru nguru pati roni, ni nikanye ni ungani, ungani ki du fu ni ni mosoro nga ga sovura.

¹⁰Bambiko mi sa kpakpure kuti gi bakporo re tipa gbigbitapai tipa wenepai te, wo poi Yekova: mi afú he ku be bakindo aBabero, ko ki zo ho ni we.’

¹¹“Mo ki ya fu ga bakindo aYudo aboro, ‘Oni gí sangba Yekova,

¹²Ako ga Dawidi aboro! Ya Yekova wẽ: “ ‘Mo sári ngbanga nzunzu wiso, ki batasi gu ni be barungosi ni, nga gu ni i adĩ he be ni, gi ngariangaria zinga ka kura wa we, ka gbi ka boro adu nga ho ka bisa ha ya, bambiko gaoni gbigbita mangaapai.’ ”

¹³“Ako baraki ngboongboorago yo, mo ngére, mi gbarasi rimoro, Ako mbia nga ga kpasakpasa rago, wo poi Yekova; mo gu naya, ‘Da nikazorã sa rani, watadu da nikarima ku rogo gaani abaraka?’

¹⁴Mi ambúsa roni kuti zuzu gaoni mangaapai, wo poi Yekova; mi agínda we rogo gaha bire, si ki riti agu ahe dunduko du pati he kirikiri.”