Read zande Yeremaya 25 Bible Online

Yeremaya 25 - zande bible

Yeremaya 25

¹Gu sangba Yekova naye fu Yeremaya tipa ga aboro Yuda pai dunduko, ti biama garã nga ga Yoyakima wiri Yosiya nangia bakindo aYudo nangia bambata garã nga ga Nebukadenesara bakindo aBabero,

²Yeremaya nga nebi agumba ha fu aboro aYudo dunduko na araki Yerusarema yo:

³“Tipa agarã 23, tona ti gu bawe na biata garã nga ga Yosiya wiri Amona, nangia bakindo aYudo, daku areme, sangba Yekova ki nida kono du mi ni, mi ki nigumba ha fu roni ni guari ngbatutu ni gumba ha, ono oni adega nga turoni sa ni te.

⁴Oni adega nga turoni te ki ye turoni ka gia ha a te, zavura wa Yekova aguari ngbatutu ka keda gako amoyambu koyo du oni ni dunduko nga anebi,

⁵niya, ‘Oni sa tironi awere, oni ni ba sa sa, ti gaoni gbigbita sino na gbegberẽ mangaapai, ka raka rogo gu ringara nga gu Yekova afu fu roni na fu abaroni bakuru yo nye anye kindi;

⁶ka oni ndú nga fuo kura ambori ka manga pa ha ya na ka irisa ha a ya, watadu ka gara gi zinga ku ri roni ni gu mangaapai nga ga beroni ya. Si du ka mi amánga nga roni na ima ya.’

⁷Ono oni adega nga turoni fere te, wo poi Yekova, ya oni nikazingisa re sa zinga ni gu mangaapai nga ga beroni sa kina gaoni ima.

⁸“Si du ya Yekova nga ga arimbasa ko wẽ: Bambiko oni agia nga sangba re te,

⁹oni ngere, mi akéda sunge tipa agu angbatunga aboro du ku nodiyo dunduko, wo poi Yekova, na tipa Nebukadenesara bakindo aBabero, nga gi moyambu, mi ki ye na yo kuti gi ringara re na kuti araki rogo ho, na kuti agu arikaaboro dunduko du kirikiri; mi agbárasa yo kpakaya, ki sa yo ni ukiga, ni uumohe, ni ngbi nyenye ugure.

¹⁰Ku ri agi apai re, mi abáfa fugo mongo ti yo ku sa yo na fugo ngbarago, na fugo badide na fugo didide, na woro mbia saahe na ima ataha a.

¹¹Gi ringara dunduko re asá tihe ni ngbi ugure ni ukiga, agi arikaaboro re amanga pa bakindo aBabero garã ki du 70.

¹²Fuo nyasa 70 agarã tie, mi ambúsa bakindo aBabero na gu rikaaboro re, na ringara aKasado, tipa gayo irairapai, wo poi Yekova, ki sa ringara ni gbarasigbarasi he nye anye kindi.

¹³Mi ayé na agu apai dunduko ku ri gu ringara re nga gu mi agumba paha kuti ni, agu apai i ake rogo kitabu yo dunduko, nga gu Yeremaya agumba paha kuti arikaaboro dunduko.

¹⁴Bambiko dungu arikaaboro na bakikindigi abakindo asá agu aboro dagba yo yo ni akanga a; mi ki iri bape yo kuti gu mangaapai nga ga beyo.”

¹⁵Were Yekova nga ga aYisaraere Mbori ki ya fere wẽ: “Mo dí gi inga imekakue zinga du be re re, ki fu he fu arikaaboro dunduko nga agu yo mi akedi ro koyo du yo ni i mbiri he.

¹⁶I ambira ha ki nindu nzokinzoki ki gbatata be basape nga gu mi ka keda ku dagba yo.”

¹⁷Si du mi ki di inga be Yekova, ki fu he fu agu arikaaboro dunduko nga agu yo Yekova akedi re koyo du yo ni i mbiri he:

¹⁸Yerusarema na agu abaakporo nga ga Yuda, gaha abakindo na gaha abazogo, ka sa ha ni ngbi ugure ni ukiga, ni uumohe na ni motiwa a, wa du he ti gi uru re;

¹⁹na Faro nga bakindo aEzipeto, na gako amoyambu, na gako abazogo, na gako aboro dunduko,

²⁰na gu kungba ngbatunga aboro nadu dagba yo dunduko; na agu abakindo dunduko nga ga ringara Uza yo na agu abakindo dunduko nga ga ringara aFereseto (nga Asekerone, Gaza, Ekerone, na gu yangara yo nga ga Asedodo yo);

²¹Edome, Moaba, na awiri Amona;

²²abakindo aTuro dunduko, na abakindo aSidono dunduko, na agu abakindo nga ga ringara gango baime ku mbiti baime yo;

²³Dedana, Tema, Buza, na agu aboro dunduko nayera tii mburu mangeriyo;

²⁴abakindo aArabo dunduko na agu abakindo dunduko nga ga kodikodi angbatunga ninaraka rogo ngbi ngume;

²⁵abakindo aZimiri dunduko, abakindo aEramo dunduko, na abakindo aMedio dunduko;

²⁶abakindo pavururago ku nodiyo dunduko, tuturu yo na mbembedi yo a, gu ni fuo kura ni, na angbi dunduko nga ga zegino du auru kpotosende. Bakindo aBabero ki mbiri he fuo yo.

²⁷“Mo ki ya fu yo, ‘Ya Yekova nga ga arimbasa ko wẽ, nga ga aYisaraere Mbori: Oni mbiri he, ki kpi he ki nisuku he, ki nitiwi ka oni agúari nga berewe ya, bambiko gu basape mi akeda ku dagba roni.’

²⁸“Ka si adú wa i aida nga ka dia gu inga re be ro ka mbira ha ya, mo ki ya fu yo, ‘Ya Yekova nga ga arimbasa ko wẽ: Oni mbiri nga he!

²⁹Bambiko oni ngere, mi tona manga gbigbitapai ti bakporo nga gu i nayamba ha ti rimore, oni ki zanga mbusa? Oni azánga nga mbusa te, bambiko mi nayamba basape kuti araki auru kpotosende dunduko, wo poi Yekova nga ga arimbasa ko.’

³⁰“Si du, mo agúmba agi apai dunduko re kuti yo, ki ya fu yo: ‘Yekova apãzuo ari yo, rogo gako kparakpara ziazia baraka yo ko gumba fugoko, ko apazuo ni ome kuti gako ndugu anya, ki ta wawa, wa agu yo ninasimba bakakue, kuti araki auru kpotosende dunduko.

³¹Woro wawa apáa daku digida kpotosende yo, bambiko Yekova du na pai kuti arikaaboro; ko tona sara ngbanga kuti aboro dunduko, gbegberẽ yo ko afú yo sa basape, wo poi Yekova.’

³²“Ya Yekova nga ga arimbasa ko wẽ: Oni ngére, gbigbitapai nakura ti gu rika aboro sa gu rikaaboro, bagugugu mamu yuge nawo ti gu tuturu papara arago nga ga kpotosende!

³³“Agu yo Yekova ka imo yo ti gu uru re kangbayo adú tona ti digida kpotosende ku bani ki da ku bani. I akpara nga yo nita ngbaduse te, watadu kpisida yo a te; i adu wa regbo anya auru sende.

³⁴“Oni nga ababanda akandoro, oni yóro wawa, oni kpári, oni nga agbia rimbasa anya, oni wáranga rogo kuke, bambiko uru imo roni da na uru gbandaka roni, oni atiwa wa siasia úsunge.

³⁵Bagbuko anyé nga tipa ababanda akandoro te, gene merã adú nga tipa agbia rimbasa anya a te.

³⁶Oni dége turoni, kpe ababanda akandoro du, na yora wawa nga ga agbia rimbasa anya! Bambiko Yekova nagbarasa gayo banambu,

³⁷gu zezeredi andugu ki du ni gba rasigbarasi he, bambiko gu ngariangaria zinga nga ga Yekova.

³⁸Ko guari rogo gako bagbuko yo wa bahu, bambiko gayo ringara du ni bate bambiko gu basape nga ga Yekova, na bambiko gako ngariangaria zinga.”