Read zande Yeremaya 26 Bible Online

Yeremaya 26 - zande bible

Yeremaya 26

¹Ti tonatona zogarago nga ga Yoyakima wiri Yosiya nangia bakindo aYudo, gi pai re aye ni yo du Yekova ni,

²“Ya Yekova wẽ: Mo rú vurukporo ga Yekova bambu yo, ki gumba pai fu aboro abaakporo dunduko nga ga Yuda nga agu yo ninaye ka irisa ko rogo ga Yekova bambu yo, pa agu apai dunduko nga gu rugu mi ro na ni mo gumba ha fu yo; ka mo ká nga na pai sa ya.

³Isoke i adéga tuyo, aboro ni ba sa sa ki sa tiyo ti gayo gbigbitapai, ya mi birĩ tire ti gu gbigbitapai nga gu mi aberã pa manga ha fu yo bambiko gayo gbigbita mangaapai.

⁴Mo ayá fu yo, ‘Ya Yekova wẽ: Ka oni adéga nga turoni fere ya, ka peka fuo gi rugute nga gu mi afu fu roni ku bangironi,

⁵ka gia agu apai nga ga gimi amoyambu nga anebi nga agu yo kedi mi yo koyo du oni ni niguari ngbatutu ka keda yo, ka oni avura nga gia ha ya,

⁶mi amánga gi bambu re wa Siro, mi ki sa gi bakporo re ni umotiwa tipa arikaaboro nga ga kpotosende yo dunduko.’ ”

⁷Aboromotumo ki gi pa Yeremaya na anebi na aboro dunduko ko nigumba agi apai re rogo ga Yekova bambu yo.

⁸Ho Yeremaya anyasi gumba agi apai ni re dunduko Yekova arugu ko na ni ka gumba ha fu aboro dunduko, si du aboromotumo azi ko na anebi na aboro dunduko niya, “Mo akpí akpi!

⁹Tipagine gumba mo pai ti ni na rimo Yekova, niya, ‘Gi bambu re adú wa Siro, gi bakporo re adú ni ugurago, zanga araki rogo ho’?” Aboro dunduko ki dungura tiyo kirikiri ku pati Yeremaya rogo ga Yekova bambu yo.

¹⁰Ho abazogo aYudo agi agi apai ni re, i ki kuru ku bakindo yo ku rogo ga Yekova bambu yo ki sungu ri gayo abasunga barima ti gu Vovo Ngbadimo nga ga ga Yekova bambu.

¹¹Aboromotumo na anebi ki ya fu abazogo na fu aboro dunduko, “Gi kumba re re na mbusa nga ga kpio, bambiko ko gumba pai kuti gi bakporo re, wa gi oni he ni turoni.”

¹²Yeremaya ki gumba pai fu abazogo dunduko na aboro dunduko a, niya, “Yekova naakedi re mi gumba pai kuti gi bambu re na kuti gi bakporo re nga agu apai dunduko gi oni.

¹³Awere oni mbákadi gaoni apai na gaoni mangaapai, ki gi sangba Yekova gaoni Mbori, Yekova abírã tiko ti gu gbigbitapai gumba ko pa ha kuti roni.

¹⁴Ono tipa re, oni ngére, mi kina be roni. Oni mángi na mi wa ngba ha bangironi wa ru he bangironi a.

¹⁵Kina gere ka oni ini ti ni ni rengo nga ka oni imi re, oni ayé na kure boro wenesa ku ri roni na ku ri gi bakporo re na araki rogo ho, bambiko Yekova akedi re ni rengo mi gumba agi apai dunduko re ku turoni yo.”

¹⁶Si du abazogo na aboro dunduko ki ya fu aboromotumo na anebi, “Gi kumba re are nga na mbusa nga ga kpio te, bambiko ko agumba pai fu rani na rimo Yekova gaani Mbori.”

¹⁷Agu yo dagba abaakumba aboro ringara yo ki ru ku ari ki gumba pai fu gbuu aboro dunduko, niya,

¹⁸“Mika nangia boro Moresota agumba pai ti rago Izikiya bakindo aYudo, ki ya fu aboro Yuda dunduko: ‘Ya Yekova nga ga arimbasa ko wẽ, I asópa Siona wa ati; Yerusarema ki sa tihe ni guguda gbarasigbarasi ahe, na gu bagangara nga ga bambu ki du wa bire ngua tumbatumba rago yo.’

¹⁹Izikiya nangia barukumbatayo na aboro Yuda dunduko aimi Mika? Ko agunde nga ti Yekova ki zungadi ga Yekova inapai, te? a nga Yekova abirĩ tiko ti gu gbigbitapai nga gu ko agumba pa ha kuti yo te? Ono ani tigaani nikaye na gi kere gbigbitapai re ku ri rani.”

²⁰Kura kumba adu yo nagumba pai na rimo Yekova, nangia Uria wiri Semaya naadu Kiriyata-yarima yo. Ko agumba pai kuti gi bakporo re na kuti gi ringara re rogo apai wa kina gu ga Yeremaya re.

²¹Ho Bakindo Yoyakima agi gako apai ni, na gako abanzengere dunduko na abazogo dunduko, bakindo agbata pa imo ko; ono ho Uria agi he ni, ko agunde ki merẽ ki oro ku Ezipeta yo.

²²Bakindo Yoyakima ki kedi aboro fuo ko ku Ezipeta yo nangia Erinatana wiri Akoboro na akura yo na ko,

²³i ki gbata Uria Ezipeta yo ki ye na ko fu Bakindo Yoyakima, ko ki imi ko ni basape ki ba kangbako ku bakpisida kangba payapaya aboro yo.

²⁴Ono be Aikama wiri Safana adu ti Yeremaya, si du i afu nga ko ti ni fu aboro i imi ko ya.