Read zande Yeremaya 28 Bible Online

Yeremaya 28 - zande bible

Yeremaya 28

¹Ti kina gu garã re, ti tonatona zogarago nga ga Sedekiya bakindo aYudo, ti bisue diwi rogo biama garã, Anania wiri Asura, nangia nebi naye Gibona yo, agumba pai fere tii ga Yekova bambu yo, ku bangiri aboromotumo na aboro dunduko, niya,

²“Ya Yekova nga ga arimbasa ko, nga ga aYisaraere Mbori wẽ: mi k uadi gu gonga nga ga bakindo aBabero.

³Vuru garã ue mi ayé na agu aúsunge dunduko ku rogo gi ba re nga ga ga Yekova bambu, nga gu Nebukadenesara bakindo aBabero arogo ho rogo gi ba re ki ga na ni ku Babera yo.

⁴Mi ayé na Yekonya a wiri Yoyakima nangia bakindo aYudo ku rogo gi ba re berewe, na gu zizi yo dunduko i aga na yo ku Babera yo, wo poi Yekova, bambiko mi akúadi gu gonga nga ga bakindo aBabero.”

⁵Nebi nangia Yeremaya ki gumba pai fu Anania nangia nebi ku bangiri aboromotumo na ku bangiri aboro dunduko nga agu yo naru tii ga Yekova bambu yo;

⁶nebi nangia Yeremaya ki ya, “Amina! Yekova mángi he wo; Yekova mángi agu apai nga gu gumba mo ho si da ti rengo, ki yega na agu aúsunge berewe ku rogo gi ba re Babera yo nga ga Yekova bambu, na gu zizi yo dunduko.

⁷Ono oni gí gi pai re awere nga gu gumba mi ku turoni yo na ku tu aboro yo dunduko.

⁸Agu anebi nadu mbata fu roni na mbata fe re a ti kuru arago, i agumba pa sovura, na pa ngbongi, na pa tata kaza kuti dungu aringara na kuti bakikindigi angbi.

⁹Ono tipa pa gu nebi nagumba pa zereda, ho rago gu pai nga ga gu nebi re ka da ni, i ki ini he ya Yekova kedi gu nebi re ni rengo.”

¹⁰Anania nangia nebi ki di ngbongbo gonga gorõ Yeremaya nangia nebi, ki kuadi he.

¹¹Anania ki gumba pai ku bangiri aboro dunduko, niya, “Ya Yekova wẽ: Mi akúadi gu gonga nga ga Nebukadenesara kina wo nangia bakindo aBabero ti gorõ agu arikaaboro dunduko vuru garã yo ue.” Ono Yeremaya nangia nebi ki ndu ngba gako gene.

¹²Ni gu rago fuo kuadi nebi Anania ngbongbo gonga gorõ Yeremaya nangia nebi, sangba Yekova ki ye fu Yeremaya:

¹³“Mo ndú, ki gumba ha fu Anania, ‘Ya Yekova wẽ: mo kuadi angbongo ngua, ono mi amánga angbongbo marã ku ba ha.

¹⁴Bambiko wo poi Yekova nga ga arimbasa ko nga ga aYisaraere Mbori: mi moi gonga ku gorõ agu arikaaboro re nga gonga marã nga ga kanga i ara fu Nebukadenesara bakindo aBabero, i ki nira fu ko, bambiko mi fu he fu ko zavura anya vurũ nga ga nvuo ra.’ ”

¹⁵Yeremaya nangia nebi ki ya fu nebi nangia Anania, “Anania, mo gí nga ha, Yekova akeda nga ro te, mo mangi agi aboro re i kida kuti zire.

¹⁶Si du ya Yekova wẽ: ‘Mo ngére, mi adia ro ri kpotosende. Ni kina gi garã re mo ki kpi, bambiko mo gumba pa samungu kuti Yekova.’”

¹⁷Rogo kina gu garã re, ti saba diwi, Anania nangia nebi ki kpi.