Read zande Yeremaya 29 Bible Online

Yeremaya 29 - zande bible

Yeremaya 29

¹Agi apai re nga ga gu kedikedi waraga Yeremaya ake nga nebi ka keda ha Yerusarema yo fu abaakumba zizi aboro, na fu aboromotumo, na fu anebi, na fu agu aboro dunduko Nebukadenesara aga na yo ni zizi yo Yerusarema yo ku Babera yo.

²Gere adu fuo guari Bakindo Yekonya Yerusarema yo, na na bakindo, na gari amoyambu nangia airazangada, na abazogo aYudo na ga Yerusarema yo, na aboro birĩ, na apangu a.

³Ko akedi gu kedikedi waraga re be Erasa wiri Safana na be Gemaria wiri Erekiya, nga agu yo Sedekiya bakindo aYudo akedi yo ku Babera yo koyo du Nebukadenesara ni nangia bakindo aBabero. Si aya:

⁴“Ya Yekova nga ga arimbasa ko nga ga aYisaraere Mbori wẽ, fu gu zizi yo dunduko nga agu yo mi akedi yo ni zizi yo Yerusarema yo ku Babera yo:

⁵Oni audua abambu ki niraki tii he; oni ruku auati ki niri zuzuhe.

⁶Oni rogo ade ki nivungu akumbagude na adegude; oni rogo ade tipa awironi, oni fú awironi nga ade i rogo yo, ya i vungu akumbagude na adegude; oni ki ninge yo, ka oni arúna nga ya.

⁷Ono oni gbáta gu zereda nga ga gu bakporo yo mi akedi roni ku ho ni ni zizi roni, ki nikpari fu Yekova tipa ha, bambiko rogo gaha zereda oni ka bi gaoni zereda ni.

⁸Bambiko ya Yekova nga ga arimbasa ko, nga ga aYisaraere Mbori wẽ: Ka gaoni anebi na gaoni abinza nga agu yo du dagba roni nángi nga roni ya, ka oni dége nga turoni sa agu amusumo nga gu i arara ha ya,

⁹bambiko zire du i agumba ha na rimore fu roni; mi akeda nga yo te, wo poi Yekova.

¹⁰“Bambiko ya Yekova wẽ; Ho 70 agarã ka nyasa ni tipa Babera, mi ayé koyo du oni ni, mi ki digisi kidohe fu roni ki yega na oni berewe ku rogo gi ba re.

¹¹Bambiko mi ini agu aberã du ti re koyo du orii ni, wo poi Yekova, berã pa zereda, pa gbegberẽ pai té, ka fu maabangirise fu roni tipa gaoni apai ku mbata yo.

¹²Oni ki yambu re ki ye ka kpara fere, mi ki gi paroni.

¹³Oni agbata re ki bi re; ho oni ka gbata re agbata ni na kpotoroni yo du,

¹⁴oni abí re, wo poi Yekova, mi akáraga roni gene zia yo ki dungura roni yo du agu arikaaboro ni dunduko na rogo agu aba dunduko yo mi ado roni ku ho ni, wo poi Yekova, mi ki ye na oni berewe ku rogo gu ringara mi akedi roni rogo ho ni zizi roni.

¹⁵“Bambiko ya oni, ‘Yekova kusi anebi fu rani Babera yo,’―

¹⁶Ya Yekova wẽ tipa gu bakindo nasunga ri ga Dawidi mbatabakindo, na tipa agu aboro dunduko naraka rogo gi bakporo yo re, nga angbatunga roni naandu nga na oni ni zizi yo ya:

¹⁷‘Ya Yekova nga ga arimbasa ko wẽ, Oni ngére; mi nakeda basape kii ri yo, na ngbongi, na tata kaza, mi asá yo wa nyokoranyokora vurumo nga gu gberẽ ki susi ka i arengba nga na ri he ya.

¹⁸Mi adó fuo yo na basape, na ngbongi, na tata kaza, ki sa yo wa kere he fu angbi dunduko auru kpotosende, i ki du ni tiwatiwa yo, ni úkiga, ni uumohe ni úgbarasarimo dagba arikaaboro dunduko yo mi ado yo ku ho ni,

¹⁹bambiko i agia nga gimi apai te, wo poi Yekova, nga gu mi akedi he fu roni ku ngba gimi amoyambu ki niguari ngbatutu ka keda yo nga anebi, ono ka oni akpi nga nyemu ka dega turoni sa ni ya, wo poi Yekova.’

²⁰Oni gí ga Yekova pai, oni dunduko nga gu zizi roni mi akedi roni Yerusarema yo ku Babera yo:

²¹‘Ya Yekova nga ga arimbasa ko, nga ga aYisaraere Mbori wẽ: tipa Aba wiri Koraya na tipa Sedekiya nangia wiri Maseya, nagumba zire fu roni na rimore: Oni ngére, mi akúsa yo ku be Nebukadenesara bakindo aBabero, ko ki niimi yo kina ku bangironi.

²²Bambiko mbiko yo gi motiwa ka ndu ti ni re ku ngba zizi yo dunduko na ga Yuda yo ku Babera yo: nga “Yekova mángi roni wa Sedekiya na Aba, nga agu yo bakindo aBabero azo yo ku we yo,”

²³bambiko i amangi mumungo pai dagba aYisaraere, i amangi bari na dere akurayo, i ki gumba zire apai na rimore nga gu mi aruga nga yo na ni ya. Mi nga Yekova ini he, ki du ni dezire he, wo poi Yekova.’ ”

²⁴Mo ayá fu Semaya nga boro Nerama,

²⁵“Ya Yekova nga ga arimbasa ko, nga ga aYisaraere Mbori wẽ: Mo akedi kedikedi awaraga na rimore fu aboro dunduko du Yerusarema yo, na fu Sefanya wiri Maseya boromotumo, na fu aboromotumo dunduko, niya,

²⁶‘Yekova amoi ro ni boromotumo ku ba Yoyada boromotumo, ka ruga pa ga Yekova bambu ku ri aboro pupo dunduko nagumba pai, ka maa yo ku rogo angborõ yo na gonga ku gorõyo.

²⁷Were tipagine oni aza nga Yeremaya ti ni nga boro Anatota nagumba pai fu roni ya?

²⁸Bambiko ko akedi pai fu rani ku Babera yo, niya, “Gaoni zia adú ni gbanga ha; oni dúdua abambu ka raka rogo ho, ki rúku ahe ati yo ki niri zuzuhe.”’ ”

²⁹Sefanya boromotumo ki ye ki gedi gi kedikedi waraga re ku tu Yeremaya yo nangia nebi.

³⁰Sangba Yekova ki ye koyo du Yeremaya ni niya:

³¹“Mo kédi pai fu zizi yo dunduko, niya, ‘Ya Yekova wẽ tipa Semaya nga boro Nerama: Bambiko Semaya gumba pai fu roni ho mi akeda nga ko ni ya, ki mangi roni oni kida kuti zire,

³²si du ya Yekova wẽ: Mo ngére, mi ambúsa Semaya boro Nerama na atitako; ko adú nga na boro ka raka dagba agi aboro re ka bi gu wenepai nga gu mi ka manga fu gimi aboro te, wo poi Yekova, bambiko ko gumba pa samungu kuti Yekova.’ ”