Read zande Yeremaya 3 Bible Online

Yeremaya 3 - zande bible

Yeremaya 3

¹“Ka kumba mbu diako ri ki guari be ko ki di kura kumba, ko akáraga tiko fuo ri berewe? Gu ringara re si adu nga ni birikosibirikosi he ki susi te? Oni mangi pai wa sino pa bari na dungu akpinyemuroni; oni akáraga tironi kono du mi ni? wo poi Yekova.

²Oni túmba nga bangironi ku kungba basosono arago yo, ka bi nga! Wari oni ata pi nga ni na abadiaroni ya? Pangba gene oni asunga ni ka sunguda akpinyemuroni wa boro Araba rogo ngbakungba. Oni birikosi ringara ni gaoni kere pa bari.

³Si du ka yo na moromoro mai ti ni, ka mamu garã ana nga a ya; ono oni du na kpakpu irabari ti roni ka zee amanga nga roni mbiko ho ya.

⁴Oni nayamba nga he kina awere kono du mi ni te? niya, ‘Buba, mo nangia badiangba parangare―

⁵ko adú na zinga nye anye kindi, ko adú na imisiri ngbaduse dati digida rago?’ Oni ngére, oni gumba ha, ono oni mangi gbigbitapai dunduko nga gu rengbe oni na ni.”

⁶Yekova ki ya fere ti agu arago nga ga Bakindo Yosiya: “Mo bi gu pai mangi ri; gu boro ti ku sa yo re, nga Yisaraere? wa biti ri ku ri gbangagbanga abaagangara yo dunduko na tii iwo angua ni ba sa sa dunduko, ki nimangi sino pa bari yo.

⁷Mi ki berẽ he, ‘Fuo manga ri agi apai dunduko re ri akáraga tiri kono du mi ni’; ono ri akaraga nga tiri te, tameri nga irabiriki nga Yuda ki bi he.

⁸Ri abi agu apai dunduko tipa agu abari nga ga gu tikusayo re, nga Yisaraere, mi akedi ri na waraga mbutise; tameri nga irabiriki nga Yuda ata gunde nga te, ono ri andu a ka manga sino pa bari.

⁹Bambiko pa bari adu ni taataa pai bangiriri, ri birikosi ringara, nimangi sino pa bari na mbia na ngua.

¹⁰Tipa gere tameri nga irabiriki nga Yuda ata karaga nga tiri kono du mi ni na kpotori yo dunduko te, ono ni kina nangahe, wo poi Yekova.”

¹¹Yekova ki ya fere, “Yisaraere nga boro tikusayo yugu tiri fere na ingapai arengba nga na ga Yuda nga irabiriki ya.

¹²Mo ndú, ka taka pande agi apai re ku nodiyo, ki ya. ‘Mo káraga tiro, Yisaraere nga boro tikusayo, wo poi Yekova. Mi angéra nga kuti ro na zinga te, bambiko mi du na inapai, wo poi Yekova; mi azínga nga nye anye kindi te.

¹³Mo ídi pa ga irairapai, ya mo asa mungu kuti Yekova ga Mbori, ki gbandaka ga mangapai dagba akare tii iwo angua dunduko ni ba sa sa, mo ata gia nga sangbare a te, wo poi Yekova.

¹⁴Ako oni nga agude nati ku sa yo, oni káraga tironi, wo poi Yekova; bambiko mi nga bairaroni; mi aróga roni, boro sa rogo gu bakporo na aboro ue dagba gu rika ngbatunga aboro, mi ki ye na oni ku Siona no.

¹⁵“ ‘Mi ki fu ababanda akandoro fu roni wa kpotore yo akpi nyemu he, nikariga roni na inahe na rugatinapai.

¹⁶Ho oni ka nge ni ki nizuga rogo ringara, rogo agu arago re, wo poi Yekova, i ayá nga berewe “Sanduki mokido nga ga Yekova,” te. Boro abérã nga paha te, watadu tingida paha a te, watadu bangirise adú nga ti ni a te; i amánga nga paha berewe a te.

¹⁷Ti gu rago re i ayá ti Yerusarema, ga Yekova mbatabakindo nga ha, arikaaboro adúngura tiyo ku pati he dunduko, ku bara bangiri Yekova Yerusarema yo, i apéka nga gayo mumungo berã nga ga gbigbita kpotoyo yo berewe te.

¹⁸Ti agu arago re aboro Yuda akóda tiyo na aboro aYisaraere, i ayé wa sa ringara nodiyo ku rogo gu ringara nga gu mi afu ni ukumbo fu abaroni.

¹⁹“‘Mi aberẽ he ya waĩ ka mi amaa roni dagba awire, ki fu wene ringara fu roni nga ringara ni babetedi he susi ga arikaaboro dunduko. Mi ki berẽ he ya oni aya ti re, Baroni, na oni asa nga tironi ti peka fuo re berewe te.

²⁰Ni rengo, wa irabiriki nga diakumba ambu kumbari, Ako ngbatunga aYisaraere, wo du oni ni airabiriki fere, wo poi Yekova.’ ”

²¹I gi fugo ri kungba basosono arago yo, kpe na kpesarawati nga ga awiri aYisaraere, bambiko i sa gayo pai bangiriyo go ti Yekova nga gayo Mbori.

²²“Ako oni nga agude nati ku sa yo, oni káraga tironi, mi ahúsa gaoni tikusayo.” “Mo ngére, ani ye kono du mo ni; bambiko mo nga Yekova nga gaani Mbori.

²³Ni rengo undahe aye nga ti aga ngara te, ti gu woro asino du ri abaagangara yo a te. Ni rengo rogo Yekova yo nga gaani Mbori du gu bata ni nga ga Yisaraere.

²⁴“Ono tona ti rago parangarani pa zee gbarasi agu ahe dunduko nga gu abarani amangi sunge he, gayo arimbasa akandoro na gayo arimbasa abagara, awiriyo nga akumbagude na adegude a.

²⁵Ani pí sande rogo gaani zee, gaani wasiwasi pai ki suradi rani; bambiko ani ingi pai kuti Yekova nga gaani Mbori, ani na abarani, tona ti parangarani daku areme; ka ani agia nga sangba Yekova nga gaani Mbori ya.”