Read zande Yeremaya 30 Bible Online

Yeremaya 30 - zande bible

Yeremaya 30

¹Gu pai naye koyo du Yeremaya ni yo du Yekova ni:

²“Ya Yekova nga ga aYisaraere Mbori wẽ: Mo ké agu apai dunduko nga gu gumba mi foro ku rogo kitabu.

³Bambiko mo ngére, arago naye, wo poi Yekova, ho mi ka karaga gimi aboro ni gene zia yo yo, nga aYisaraere na aYudo, wo poi Yekova, mi ki ye na yo berewe ku rogo gu ringara nga gu mi afu fu abayo, i ki di he ni gayo.”

⁴Agi apai re nga gu Yekova agumba tipa aYisaraere na aYudo:

⁵“Ya Yekova wẽ: Ani agi kpe kio, nga ga gunde, ono kpe zereda te.

⁶Oni sána he awere, ka bi nga, kumba rengbe ka vunga gude? Tipagine mi abi akumba ti ni ni ba sa sa na beyo ti kina dimoyo wa de rago vunga? Tipagine sa kpakpuse tihe ti ni ni fukpere he?

⁷Ako! gu rago re du ni bakere he ki susi, kura ha adu nga ho wa ha te; si nga rago fudifudipai fu Yakoba; ono ko abáta abata be he.

⁸“Si aye ka du wa gere ti gu rago re, wo poi Yekova nga ga arimbasa ko, ya mi akúadi agonga ti gorõyo, mi ki kafu gayo azogbo, ka akare asá nga yo berewe ni gayo amoyambu ya.

⁹Ono i amánga pa Yekova gayo Mbori na pa Dawidi gayo bakindo, nga gu ko mi ka kusa ko fu yo.

¹⁰“Ako Yakoba gi moyambu, ka mo gúnde nga tie ya, wo poi Yekova, Ako aYisaraere, ka oni yungura nga a ya; bambiko oni ngére, mi abátasa roni ti tuturu rago yo, na gaoni avungu rogo gu ringara du yo ni ni zizi yo. Yakoba akáraga tiko ki du zezeredi ki sungu zaa, ka boro agúndesi nga ko ya.

¹¹Bambiko mi du na oni ka batasa roni, wo poi Yekova; mi adígisa arikaaboro dunduko nga agu yo mi agbandaka roni ku dagba yo yo, ono mi adígisa nga roni te. Mi ambúsa roni rogo ruru ringbisahe, ka mi ambú nga roni na gu pai zanga mbusa ya.

¹²“Bambiko ya Yekova wẽ: Gaoni ima nga nyebaru, gaoni aoro ki du ni kere he.

¹³Boro ho ka songodi gaoni pai te, ngua oro tipa gaoni aoro du nga a te, husa adu nga tipa roni a te.

¹⁴Bangiri akpinyemuroni dunduko go ti roni; i aberã nga pa roni te; bambiko mi mangi roni ni gu fõhe nga ga avuraroni, gu mbusa nga ga avuraroni zanga inapai, bambiko gaoni irairapai du ni dungu he, bambiko gaoni ingapai moi pai.

¹⁵Tipagine oni nakpara ti ni be gaoni ima? Gaoni ima nga nyebaru. Bambiko gaoni irairapai du ni dungu he, bambiko gaoni ingapai moi pai, si du mangi mi agi apai ti ni re fu roni.

¹⁶Si du agu yo dunduko nikarita roni i arita yo a, na avuraroni dunduko, i ni ba sa sa, i andú ni zizi yo; agu yo nikagbu roni i adú ni ugbuahe tigayo, na agu yo nazia roni ni umozi mi asá yo ni umozi a.

¹⁷Bambiko mi akáraga zereda kpo tose fu roni, mi ki wiisi gaoni aoro, wo poi Yekova, bambiko i ya ti ro baba boro: ‘Si nga Siona, boro aberã nga pa ha ya!’

¹⁸“Ya Yekova wẽ: Mo ngére, mi akáraga agu abamburoko nga ga Yakoba gene zia ha yo ki niini pai fu gako abaraka; i adúa bakporo ri gaha tanda berewe, ga bakindo bambu ki ru ho si anidu ni.

¹⁹Dagba yo yo abia tambuahe ka kura ni, na fugo agu yo namoma mongo. Mi angéesa yo, ka i adú nga ni umba yo ya; mi asá yo ni irisiirisi yo, ka i adú nga ni payapaya yo ya.

²⁰Awiriyo adú tigayo wa i adu baku ru yo, gayo rimbasa ki du ni mbakadimbakadi he bara bangire; mi ambúsa agu yo dunduko narungosi yo.

²¹Gayo abaworimo adú dagba yo yo; gayo abazogo akúra kina dagba yo yo; mi ambédisa ko, ko ki mbedi na mi, bambiko da erẽ ni tini ka mbeda na mi? wo poi Yekova.

²²Oni ki du ni gimi aboro, mi ki du ni gaoni Mbori.”

²³Oni bi nga gu bakamikami yuge nga ga Yekova! ngariangaria zinga kuru, nga bagugugu mamu yuge; si nikasu ku ri gbegberẽ aboro.

²⁴Gu ngariangaria zinga nga ga Yekova asá nga tihe te daho ko ka sara ngbanga ni ki nyasi agu apai ko aberã pa manga ha. Oni arúga tironi na gere ti yangara arame.