Read zande Yeremaya 33 Bible Online

Yeremaya 33 - zande bible

Yeremaya 33

¹Sangba Yekova ki ye ni ue he koyo du Yeremaya ni, ho ko adu ni ni kisikisi ko kindi vurukporo ku babandarago yo:

²“Ya Yekova wẽ namangi kpotosende, Yekova nambakadi he ka nyakasa ha ― Yekova nga rimoko:

³Mo yámbu he kono du mi ni mi ki karaga pai foro, ki gumba bakere apai foro na okooko apai nga gu mo aina nga ha ya.

⁴Bambiko ya Yekova nga ga aYisaraere Mbori wẽ, tipa agu abambu nga ga agi abaakporo re na agu abambu nga ga abakindo aYudo nga gu i asipi he ku sande, ka manga babandarago na ni kuti agu akanda vura na kuti basape:

⁵AKasado naye sa vura na ka hisa ha na kangba aboro nga agu yo mi ka imo yo ni gi zinga na gi ngariangaria zinga, bambiko mi oko kpakpure ti gi bakporo re mbiko gayo kere gbegberẽpai dunduko.

⁶Mo ngére, mi ayé na zereda kpotose na husa fu he, mi ki usi yo ki kusi pai fu yo ni ngenge zereda na yososopai

⁷Mi akáraga gu zizi yo nga ga aYudo yo na agu yo nga ga aYisaraere yo, mi ki moi yo berewe wa i adu ti bambata ha.

⁸Mi agirisa yo ti gu irairapai dunduko nga ga gayo ingaapai kuti re, mi ki vu yo ti gayo irairapai nga gu i aingi na ni kuti re na gayo samungu.

⁹Gi bakporo ki du fere re nga rimo wasa, ni tambuahe na ni taarimo ku bangiri arikaaboro dunduko nga ga kpotosende yo nga agu yo nikagia pa gu wenepai dunduko mangi mi fu yo; i agúnde ki nikio be gu wenepai dunduko na gu zereda dunduko fu mi tipa ha.

¹⁰“Ya Yekova wẽ: Rogo gi ba re nga gu oni niya ti ni, ‘Si nga ngbi ugure zanga boro watadu nya,’ rogo agu abaakporo nga ga Yuda na ngba agu agene bakporo Yerusarema nga gu du ni gbarasigbarasi he, zanga boro watadu araki rogo watadu nya,

¹¹i agia fugo wasa yo berewe na fugo ngbarago, fugo badide na fugo didide, na fugo agu yo nabi bia wa ye yo na amotumo tambuahe ku rogo ga Yekova bambu yo: ‘Oni fúku atambuahe fu Yekova nga ga arimbasa ko, bambiko Yekova du ni wene ko, bambiko gako weneringise nye anye kindi!’ Bambiko mi akáraga gu zizi yo nga ga ringara yo wa ti bambata ha, wo poi Yekova.

¹²“Ya Yekova nga ga arimbasa ko wẽ: Rogo gi ba du ni ngbi ugure re, zanga boro watadu nya, na rogo gaha abaakporo dunduko, baraka adú adu yo berewe nga ga ababanda akandoro nabanda gayo arimbasa anya ami piki zezeredi.

¹³Rogo abaakporo ringara agangara yo, arimbasa akandoro asúsa berewe tii be gu ni nageda ra rogo abaakporo tiditidi rago yo, na rogo agu abaakporo du Negebe yo, rogo ringara Benyamina yo na agu aba du pati Yerusarema yo kirikiri, na rogo abaakporo Yuda a, wo poi Yekova.

¹⁴“Mo ngére, aragoho naye, wo poi Yekova, ho mi ka digisa gu kidohe ni mi amangi fu aboro aYisaraere na fu aboro Yuda.

¹⁵Rogo agu arago re na ti gu rago re mi amánga ruru Bengua si kuru tipa Dawidi; ko ki nisari ngbanga nzunzu na rurupai rogo ringara.

¹⁶Rogo agu arago re aboro Yuda abata na aboro Yerusarema ki niraki zezeredi. Gere ki ngia gu rimo i ka yamba ha na ni: ‘Yekova nga gaani rurupai.’

¹⁷“Bambiko ya Yekova wẽ: Zingo boro ka sunga auru gu mbatabakindo nga ga aYisaraere amánga nga Dawidi wa sa te,

¹⁸ka aboromotumo nga aRevi azanga nga boro ku bangire ka fu zozo amotumo ya, ka zo amotumo riahe, ka tumo na amotumo nye anye kindi a ya.”

¹⁹Sangba Yekova ki ye koyo du Yeremaya ni niya:

²⁰“Ya Yekova wẽ: Ka oni rengbe na gbarasa gi mokido du tipa uru na gi mokido du tipa yuru, si du ka uru akura nga na yuru ti ni ti gaha ringbisiringbisi rago ya,

²¹si du tie ka gi mokido du na gi moyambu nangia Dawidi nyasi ti ni a, ka ko adu nga na wiriko ka zoga rago ri gako mbatabakindo ya, na gi mokido na aboromotumo na aRevi nga amangipa re si ki nyasi a.

²²Wa i arengba nga na geda rimbasa ahe nga ga ngbangbaturũ ya, ka i ringbisi nga angume nga ga baime a ya, a wo mi ka ngeesa atita Dawidi nga gi moyambu na aboro motumo nga aRevi nga agu yo namanga pa re.”

²³Sangba Yekova ki ye koyo du Yeremaya ni niya:

²⁴“Mo akparia nga pa gu pai agi aboro agumba te re? ‘Yekova gindiga rika ngbatunga aboro ue nga agu yo ko asia yo’. Were i payasi gimi aboro ya ka i du nga berewe ni rikaaboro ku bara bangiriyo ya.

²⁵Ya Yekova wẽ: Ka mi anyakasa nga gi mokido tipa uru na tipa yuru na agu arugaapai du tipa angbangbaturũ na tipa kpotosende ya,

²⁶mi agíndiga atita Yakoba tie na atita Dawidi gi moyambu ka mi asia nga boro sa dagba angbatungako ni zogo angbatunga Abarayama ya na ngbatunga Yisaka, na ngbatunga Yakoba a ya. Bambiko mi akáraga yo gene zia yo yo, ki ini pai fu yo.”