Read zande Yeremaya 35 Bible Online

Yeremaya 35 - zande bible

Yeremaya 35

¹Gu pai naaye kono du Yeremaya ni yo du Yekova ni ti gu rago nga ga Yoyakima wiri Yosiya, bakindo aYudo:

²“Mo ndú fuo ga aRekaba aborokporo, ka fura na yo, ki ye na yo ku rogo ga Yekova bambu yo, ku rogo vuru bambu yo sa; mo ki fu imekakue fu yo i mbiri he.”

³Si du mi ki di Yazanaya wiri Yeremaya, Yeremaya angia wiri Abisiniya, na awirinako, na awiriko dunduko, na ga aRekaba aborokporo dunduko.

⁴Mi ki ye na yo ku rogo ga Yekova bambu yo ku rogo gu vuru bambu nga ga awiri Anana wiri Yigedaraya, ga Mbori kumba, nadu mbembedi na gu vuru bambu nga ga abazogo, ri gu vuru bambu nga ga Maseya wiri Saruma, babanda ngbadimo.

⁵Mi ki moi arunge nahiki be imekakue ku bara bangiri aRekaba, na ainga; mi ki ya fu yo, “Oni mbiri imekakue.”

⁶Ono i ki karaga ha ki ya, “Ani ambira nga imekakue te, bambiko Yonadaba wiri Rekaba, nga barani, arugu rani ki ya, ‘Ka oni nimbiri nga imekakue ya, oni na awironi nye anye kindi;

⁷oni adúa nga bambu te; oni aru nga tunga te, oni arúka nga ahe te watadu du na ati bakakue a te; ono oni aráka rogo kina bamburoko ti rago ungaroni dunduko, si du oni ki raki tipa dungu arame rogo gu ringara yo yo oni araka ni.’

⁸Ani agi sangba Yonadaba wiri Rekaba, nga barani, rogo agu apai dunduko ko arugu rani na ni. Ani naambira nga imekakue wa du ani ni ungarani te, ani dgaani, na adiarani, na awirani nga akumba, watadu awirani nga ade a te,

⁹ani naadua nga abambu ka araka tii he a te. Ati bakakue be rani te watadu kura ati watadu tunga ahe a te;

¹⁰ono ani naaraka rogo kina abamburoko, ki gi sangba Yonadaba na agu apai dunduko ko arugu rani kuti ni.

¹¹Ono ho Nebukadenesara bakindo aBabero aye sa ringara ni, ani ki ya, ‘Oni yé, ani ndú ku Yerusarema yo mbiko gunde rikavura nga ga aKasado na gu rikavura nga ga aSurio.’ Si du ani naraka ti ni Yerusarema no.”

¹²Sangba Yekova ki ye koyo du Yeremaya ni niya:

¹³“Ya Yekova nga ga arimbasa ko, nga ga aYisaraere Mbori wẽ: Mo ndú ka ya fu aboro Yuda na araki Yerusarema yo, Oni akpi nga nyemu ka gia rugute na ka dega turoni sa gimi apai te? wo poi Yekova.

¹⁴Gu rugute nga gu Yonadaba wiri Rekaba afu fu awiriko, nga ka i mbiri nga imekakue ya, i aka kuti ni; ka i ambira nga ha dati gi uru re ya, bambiko i agi sangba ga bayo rugute. Mi ki guari ngbatutu ka gumba pai fu roni, ono oni adega nga turoni fere te.

¹⁵Mi kedi gimi amoyambu fu roni dunduko nga anebi, ni guari ngbatutu ka keda yo, niya, ‘Oni ni ba sa sa sá tironi ti gaoni gbigbitapai, ki mbakadi gaoni mangaapai, ka oni nindú nga fuo kura ambori ka manga paha ya, si du oni ka araka ti ni rogo gu ringara nga gu mi afu fu roni na abaroni.’ Ono oni aye nga turoni watadu dega turoni fere te.

¹⁶Awiri Yonadaba wiri Rekaba aka kuti gako rugute nga gu bayo afu he fu yo, ono agi aboro re agia nga sangbare te.

¹⁷Si du, ya Yekova nga Mbori nga ga arimbasa ko, nga ga aYisaraere Mbori wẽ: Oni ngére, mi naye na gbigbitapai ku ri aYudo na araki Yerusarema yo dunduko nga gu gumba mi pa ha kuti yo dunduko; bambiko mi gumba pai fu yo i adega nga tuyo sa ni te, mi yambu he koyo du yo ni ka i akaraga nga pai a ya.”

¹⁸Ono Yeremaya ki ya fu ga aRekaba aborokporo, “Ya Yekova nga ga arimbasa ko, nga ga aYisaraere Mbori wẽ: Bambiko oni gi sangba ga Yonadaba rugute nga baroni, ki ka kuti gako andika, ki nimangi agu apai dunduko ko arugu roni na ni,

¹⁹si du ya Yekova nga ga arimbasa ko, nga ga aYisaraere Mbori wẽ: Yonadaba wiri Rekaba azanga nga boro ka ru ku bara bangire wa sa te.”