Read zande Yeremaya 37 Bible Online

Yeremaya 37 - zande bible

Yeremaya 37

¹Sedekiya wiri Yosiya, nga gu ko Nebukadenesara bakindo aBabero amoi ko ni bakindo ringara aYudo yo, ko zogo rago ku ba Konya wiri Yoyakima.

²Ono ko adega nga tuko sa agu apai nga ga Yekova nga gu ko agumba ku ngba Yeremaya nga nebi te, na gako amoyambu na aboro gu ringara a te re.

³Bakindo Sedekiya ki kedi Yukara wiri Seremaya, na Sefanya boromotumo, wiri Maseya, koyo du nebi Yeremaya ni, niya, “Mo kpári tipa rani fu Yekova gaani Mbori.”

⁴Were Yeremaya andu kindi dagba aboro, bambiko i ata maa nga ko ho ku bambukisa yo te.

⁵Ga Faro rikavura aye Ezipeta yo; ho aKasado nga agu yo naaru nguru pati Yerusarema agi pa yo ni, i ki guari pati Yerusarema.

⁶Sangba Yekova ki ye koyo du Yeremaya ni nangia nebi niya:

⁷“Ya Yekova nga ga aYisaraere Mbori wẽ: Mo ayá fu bakindo aYudo wẽ nakedi ro kono du mi ni ka sana re, ‘Mo ngére, Gu ga Faro rikavura nga gu naye ka unda ro si nikakaraga tihe ku Ezipeta yo, ku rogo gaha ringara.

⁸AKasado ayé berewe ka so vura kuti gi bakporo re; i adia ha ki zo ho na we.

⁹Ya Yekova wẽ, Ka oni nángi nga tironi ya, niya, “aKasado anyé koyo ti rani,” bambiko i anyé nga koyo te.

¹⁰Bambiko ka oni vura dia be rikaaboro dunduko nga ga aKasado yo nga agu yo naso vura kuti rini, kina hõgihõgi aboro dagba yo ki nye, aboro ni ba sa sa kina ku rogo gayo abamburoko, i agúari ku ari ki zo gi bakporo re na we.’ ”

¹¹Were ho ga aKasado rikavura aguari ni pati Yerusarema mbiko ga Faro rikavura naambeda,

¹²Yeremaya ki guari Yerusarema yo ka ndu ku ringara Benyamina yo ka dia gako ukporo yo dagba aboro.

¹³Ho ko ada ni ti Ngbadimo Benyamina, banzengere nangia basungudi rago yo rimoko angia Yiriya wiri Seremaya, Seremaya angia wiri Ananya, ki zi Yeremaya nangia nebi, niya, “Mo naora koyo du aKasado ni.”

¹⁴Yeremaya ki ya, “Ziredu; mi aora nga koyo du aKasado ni te.” Ono Yiriya akpi nga nyemu ka dega tuko fu ko te, ko ki zi Yeremaya ki ye na ko fu abazogo.

¹⁵Abazogo ki zingi fu Yeremaya, i ki ta ko ki ba ko ku bambukisa yo rogo ga Yonatana bambu yo nangia bakeapai, bambiko i asa ha ni bambukisa.

¹⁶Ho Yeremaya aye ni ku vuru bambu yo du bambukisa tii sende yo, ki sungu yo tipa dungu rame,

¹⁷Bakindo Sedekiya ki kedi sunge tipa ko, ki di ko ku kpuko yo. Bakindo ki sasana ko ni gbuko kpuko yo, ki ya, “Pai ye yo du Yekova ni?” Yeremaya ki ya, “Si kina ho.” Ko ki ya, “I afú ro ku be bakindo aBabero.”

¹⁸Yeremaya ki ya fu Bakindo Sedekiya, “Gini pai ingi mi na ni kuti ro watadu kuti gamo amoyambu watadu kuti agi aboro re, kisi mo re ti ni ku bambukisa yo?

¹⁹Wari du gu gamo anebi ni ninagumba pai foro? ki ya, ‘Bakindo aBabero ayé nga sa ro na sa gi ringara te re’.

²⁰Were mi nakpara foro mo gí he, Ako gi gbia nga bakindo: mo ídi he fere gi kpe umbasitise dá ku bara bangiro, ka mo kédi nga re berewe ku Yonatana yo nga bakeapai ya, mi ka kpi akpi yo.”

²¹Si du Bakindo Sedekiya ki fu rugute, i ki moi Yeremaya ku vurukporo ku babandarago yo; i ki nifu kpokuta fu ko na uru ti ga baudikpokuta gene bakporo yo, daho kpokuta anyasi ni bakporo yo dú. Si du Yeremaya ki nye vurukporo ku babandarago yo.