Read zande Yeremaya 39 Bible Online

Yeremaya 39 - zande bible

Yeremaya 39

¹Ti ribua garã zogarago nga ga Sedekiya bakindo aYudo, rogo bawe diwi, Nebukadenesara nangia bakindo aBabero aye sa Yerusarema na gako rikavura dunduko, ki ru nguru pati he;

²rogo bawe na sa garã zogarago nga ga Sedekiya, ti biama diwi, ti ribua rameru, i akuadi ngapa bakporo.

³Ho i adi Yerusarema ni, agu abazogo dunduko nga ga bakindo aBabero yo aye ki sungu ti gu ngbadimo du bebere bakporo yo: rimoyo du re, Neregara-saresera, Samegara-nebu, Saru-sekima nangia gbia ku ri avuru bakindo, Neregara-saresera, nangia gbia airatatamana, na yangara abaakumba nga ga bakindo aBabero yo.

⁴Ho Sedekiya bakindo aYudo abi yo ni, na abasovura dunduko, i ki oro, ki nikuru ku zegi yo ngba ga bakindo gene ati rogo gu ngbadimo bakporo dagba avuro ngapa bakporo ue; i ki ndu ku kpasakpasa rago yo.

⁵Ono gu rimbasa aborovura nangia ga aKasado ki nido fuo yo, ki gbia Sedekiya rogo gu akpasakpasa rago du Yereo yo; ho i azi ko ni, i ki ye na ko koyo du Neoukadenesara ni nga bakindo aBabero, ku Ribera yo rogo ringara Amata; ko ki sari ngbanga ko.

⁶Bakindo aBabero ki imi awiri Sedekiya Ribera yo kina ku bangiriko; bakindo aBabero ki imi agbia akporo dunduko nga ga aYudo yo.

⁷Ko ki imi abangiri Sedekiya, ki vodi ko ni azogbo ka ndu na ko ku Babera yo.

⁸AKasado ki zokodi ga bakindo bambu na ga aboro abambu a, ki kuadi ngapa bakporo ku sande du pati Yerusarema.

⁹Si du Nebuzaradana nangia baira ababandarago, ki ga na gu yangara aboro ni zizi yo nga agu yo naanye bakporo yo, na agu yo naaoro koyo du ko ni, na agu aboro naanye.

¹⁰Ono Nebuzaradana baira ababandarago ambu bete aboro ringara Yuda yo, nga rungorungo aboro naadu nga na he be yo ya, ki fu aati bakakue fu yo na aati riahe ti kina gu rago re.

¹¹Nebukadenesara bakindo aBabero afu rugute tipa Yeremaya ku be Nebuzaradana, baira ababandarago, ki ya,

¹²“Oni dí ko, ki nibanda ko wenengaĩ ka oni ímisi nga ko ya, oni mángi fu ko wa ko ka gumba ha fu roni.”

¹³Si du Nebuzaradana baira ababandarago, na Nebusazebana nangia gbia ku ri avuru bakindo, na Neregara-saresera nangia gbia airatatamana, na abaira abarutirivura dunduko nga ga bakindo aBabero yo,

¹⁴i ki kedi sunge ki di Yeremaya vurukporo ku babandarago yo. I ki fu ko ku be Gedaria wiri Aikama, Aikama angia wiri Safana, ya ko ndu na ko ku kpuko yo. Si du ko ki niraki dagba aboro.

¹⁵Sangba Yekova ki ta ye koyo du Yeremaya ni ho i akedi ko ni ku vurukporo ku babandarago yo niya:

¹⁶“Mo ndú, ki ya fu Ebede-mereke boro Etiopia, ‘Ya Yekova nga ga arimbasa ko nga ga aYisaraere Mbori wẽ: Mo ngére, mi adígisa gimi apai kuti gi bakporo re ni gbigbitapai ono ni wenepai te, si ki mangi ku bangiro ti gu rago re.

¹⁷Ono mi abátasa ro ti gu rago re, wo poi Yekova, ka mi afú nga ro ku be agu aboro mo agunde be yo ya.

¹⁸Bambiko mi abátasa ro ni rengo, ka mo akpi nga be basape ya; ono mo adú na ungaro wa mosoro nga ga sovura, bambiko mo nakida kuti re, wo poi Yekova.’ ”