Read zande Yeremaya 4 Bible Online

Yeremaya 4 - zande bible

Yeremaya 4

¹“Ako aYisaraere, ka oni karaga tironi, wo poi Yekova, oni ka karaga tironi kono du mi ni. Ka oni rogo gaoni gbegberẽ kere ahe bara bangire, ka oni abérã nga paha berewe ya,

²ka oni zunga he niya, ‘Wa du Yekova ni ungako,’ ni rengo, na rogo sarangbanga, na rogo rurupai yo, si du arikaaboro afú sambuatise ti ni fu tiyo rogo ko yo na rogo ko yo i ka taasa tiyo ni.”

³Bambiko wo poi Yekova fu aboro Yuda na fu araki Yerusarema yo: “Oni sópo gaoni fute, ka oni arũ nga he rogo akiwe yo ya.

⁴Ako aboro Yuda na araki Yeru sarema yo; oni yére tironi fu Yekova, oni yére zangayeratise ti ngbaduroni; gi ngariangaria zinga ka kura wa we, ki gbi ka bisi he adu nga ya, mbiko gu gbegberẽpai nga ga gaoni mangaapai.”

⁵Mo táki pande he Yuda yo, ki tungusi pai Yerusarema yo, ki ya, “Oni vúdi nambongo rogo ringara; oni kpári ku ari ki ya, ‘Oni dúngura tironi, ani ki ndu ku rogo abaakporo ngapa!’

⁶Oni túmba bendere koyo du Siona ni, oni óro tipa banda tironi, ka oni íma nga ya, bambiko mi ye na gbigbitapai nodiyo, na buna rago.

⁷Bahu kuru ku zegi rogo gau gbundu yo, bagbarasi arikaaboro nikuru ku zegi yo; u kuru ba ru yo ka sa gaoni ringara ni bate; gaoni abaakporo adú ni gbarasigbarasi he zanga araki rogo ho.

⁸Bambiko gere oni úkadi tironi na mbuzaroko, oni tá ngbaroni na kpenunga ki niyoro wawa; bambiko gu ngariangaria zinga nga ga Yekova asa nga tihe ti rani te.”

⁹“Ni gu rago re, wo poi Yekova, ngarã akpá be bakindo na be abazogo; aboromotumo akíga, iriwopai ki zi anebi.”

¹⁰Mi ki ya, “Ako, Gbia MBORI, mo anangi agi aboro re ni rengo na Yerusarema a, niya, ‘Si adú ni wenepai fu roni’; ono basape da ti kina ungayo.”

¹¹Ti gu rago re i ayá fu agi aboro re na fu Yerusarema, “Fafoi yuge ye rogo kungba basosono arago rogo ngbi ngume yo kono du gimi aboro ni, tipa igita he watadu kpuruwa he a te,

¹²ono yuge na ome susi gere naye tipa re. Mi du na fura awere rogo sarangbanga ku ri yo.”

¹³Oni ngére, ko naye wa adubo, gako angbagidavura ki du wa gugugu yuge; gako afarasi ipi ti adingimo— na gberẽ he fu rani, bambiko i gbarasi rani!

¹⁴Ako Yerusarema, mo zúndu ngba duro yo ti gbegberẽpai, mo ki bati. Rago ni gbanga ha waĩ ga gbegberẽ aberã ki nye rogo ro yo?

¹⁵Bambiko fugo taki pande pai Dana yo ki tungusi pa gbegberẽpai Bagangara Efuraima yo,

¹⁶Mo fúgu he fu arikaaboro ya ko naye; mo táki pande pa ha ku Yerusarema yo, “Abazirago ye gii ngbi yo; i nata wawa kuti abaakporo Yuda yo.

¹⁷Wa ababanda ati wo du yo kuti he kirikiri, bambiko si sa mungu kuti re, wo poi Yekova.

¹⁸Gaoni apai na gaoni mangaapai ye na gere ku ri roni. Gere nga gaoni gbegberẽpai, si ni hihii he; si rimi kina boro ku ngbaduroni yo.”

¹⁹Gi imisiri, gi imisiri! mi nasora rogo gi ima! Ako, kina ngbadure yo! Ngbadure nata tihe ni kere he; mi arengba nga ka onga kii te; bambiko mi gi woro nambongo, gu tatangba nga ga sovura.

²⁰Pa buna rago ye ni ba sa fuo pa buna rago, i gbarasi ringara dunduko. Gimi abamburoko ki gberẽ rure, gimi aroko dadahe ki gberẽ rogo wiri guru rago.

²¹Gbanga rago waĩ mi ka bi bendere, ki gi woro nambongo?

²²“Bambiko gimi aboro nga aira mungo, i aina nga re te; i nga ruguzuruguzu agude, rugatinapai ti yo te. I na tatamana rogo kina manga gbigbitapai, ono waĩ ka manga wenepai i aina nga ha te.”

²³Mi angére auru kpotosende, mo ngére, si adu ni ku he ni kungba ha; na ku angbangaturũ yo, ka imarago adu nga koyo ya.

²⁴Mi angere ku ri abaagangara yo, mo ngére, si adu ni zigizozigizo ho, agangará dunduko ki nigbisi koyo na kono.

²⁵Mi ki ngere, mo ngére, ka boro adu yo ya, azire ari dunduko ki gundu.

²⁶Mi ki ngere, mo ngére, ringara ida riahe adu ni ngbi ngume, gaha abaakporo dunduko adu ni gbarasigbarasi he ku bangiri Yekova, barangba gako ngariangaria zinga.

²⁷Bambiko wo poi Yekova, “Gu ringara dunduko re adú ni vurubate; ono mi adígisa nga ha dũ te.

²⁸Bambiko mbiko gere kpotosende akpára ni nunga, na angbangbaturũ ari yo ki du ni bi he; bambiko mi gumba ha, mi rugu he; mi asa nga gi berã te, mi asá nga tire a te.”

²⁹Ti woro abanduri afarasi na aba aguanza aboro abaakporo ni ba sa sa naora; i naora ku gbundu yo; i nabita a ku dagba ambia; i nambu abaakporo dunduko, aboro araka nga yo wa sa te.

³⁰Na mo, Ako mo gu i agbarasi ro, tipagine mo aberã pa ukadi zamba roko ti ni, mo ki vodi tiro na afongo dahabu, mo nakiisa bangiro na arangi? Mo nambakada tiro vurũ. Akpinyemuro gindiga ro; i nagbata ungaro.

³¹Mi gi kpe wa kpe de rago vunga, imisiripai wa ga gu de navunga bambata wiriri, wiri Siona nga de naonga zorokozoroko be kpe, ki nitaĩ aberi ki ya, “Na gberẽ he fere! He namaka re ku bangiri abaimiaboro.”