Read zande Yeremaya 41 Bible Online

Yeremaya 41 - zande bible

Yeremaya 41

¹Ti saba diwi, Yisamaere wiri Netanya nga ngbatunga abakindo, aye na aboro bawe koyo du Gedaria ni nangia wiri Aikama ku Misipa yo, Netanya angia wiri Erisama. Yisamaere adu dagba agu abaira nga ga bakindo yo. Wa i ari kpokuta wa sa Misipa yo,

²Yisamaere wiri Netanya ki guari na agu aboro bawe gbia kuti ko ki imi Gedaria wiri Aikama ni basape, Aikama angia wiri Safana. Yisamaere aimi gu ko bakindo aBabero amoi ko ni bazogo rogo ringara.

³Yisamaere ki imi agu aEbere dunduko naadu na Gedaria Misipa yo, na agu abasovura nangia aKasado nadu yo ti gu rago re.

⁴Ti gu uru re fuo imo ko Gedaria, mbata aboro nikaina ha,

⁵aboro 80 aye Sekeme yo na Siro yo na Somorona yo, na maingbayo ni kpekpe he na gayo aroko ni sipisipi he, na kpotoyo ni dewedewe he, i niye na amotumo nga ga riahe na fuõngua ka maa ha ku rogo ga Yekova yekaru yo.

⁶Yisamaere wiri Netanya ki ta ye Misipa yo ka gbia yo, nikpari wa ko aye. Wa ko agbia yo, ko aya fu yo, “Oni yé koyo du Gedaria wiri Aikama ni.”

⁷Ho i ada ni bakporo yo, Yisamaere wiri Natanya na agu aboro naadu na ko ki imi yo, ki bafu yo ku due ime yo.

⁸Ono aboro adu dagba yo bawe naya fu Yisamaere, “Ka mo imi nga rani ya, bambiko ani du na igiigi riahe be rani ati yo nga nganu, na he wa mapunga, na nzeme, na nzeme anyege.” Si du ko ki za tiko ka ko aimo nga yo na gayo abadiata ya.

⁹Were gu due ime Yisamaere abafu kangba agu aboro re ku rogo ho nga agu yo ko aimi yo angia bakikii due ime nga gu Bakindo Asa amangi he tipa banda ko be Basa nga bakindo aYisaraere; Yisamaere wiri Netanya ki hisi he na kangba aboro.

¹⁰Si du Yisamaere ki zi gu yangara aboro dunduko naadu Misipa yo, awiri bakindo nga ade na agu aboro dunduko i ambu yo Misipa yo, nga agu yo Nebuzaradana, baira ababandarago afu yo ku be Gedaria wiri Aikama. Yisamaere wiri Netanya ki ndu na yo ni zizi yo ki ndu ka si fuo aAmono.

¹¹Ono ho Yoanana wiri Karea na agu abarutiri aborosovura naadu na ko agi pa gu gbigbitapai ni nga gu Yisamaere wiri Netanya amangi,

¹²i ki rogo gayo aboro dunduko ki ndu ka so vura kuti Yisamaere wiri Netanya. I ki da ti ko pati gu bamunga du Gibona yo.

¹³Ho agu aboro naadu na Yisamaere abi Yoanana ni wiri Karea na abarutiri aborosovura dunduko na ko, i ki du na ngbarago.

¹⁴Si du agu aboro dunduko Yisamaere aga na yo ni zizi yo Misipa yo i ki karaga tiyo ki yega berewe, ki ndu fuo Yoanana wiri Karea,

¹⁵Ono Yisamaere wiri Netanya ki merẽ be Yoanana na aboro muambi, ki ndu koyo du aAmono ni.

¹⁶Si du Yoanana wiri Karea na abarutiri aborosovura dunduko naadu na ko ki rogo gu yangara aboro nga agu yo Yisamaere wiri Netanya aga na yo ni zizi yo Misipa yo fuo imo ko Gedaria wiri Aikama ― abasovura, ade, agude na amoyambu, nga agu yo Yoanana ayega na yo berewe Gibona yo.

¹⁷I ki ndu ki sungu ku Geruta Kimama yo mbembedi na Betereme, niberẽ pa ndu ku Ezipeta yo

¹⁸bamb ko aKasado; bambiko i agunde agunde be yo bambiko Yisamaere wiri Netanya aimi Gedaria wiri Aikama, nga gu ko bakindo aBabero amoi ko ni bazogo rogo ringara.