Read zande Yeremaya 42 Bible Online

Yeremaya 42 - zande bible

Yeremaya 42

¹Si du agu abarutiri aborosovura dunduko aye ti ni na Yoanana win Karea na Asaraya wiri Osaya, na aboro dunduko tona ti umba yo dati bakumba yo, ki mbedi,

²ki ya fu Yeremaya nga nebi, “Mo ídi he gaani kpesarawati da ku turo yo, mo ki kpari fu Yekova ga Mbori tipa rani, tipa gi yangara yo dunduko re bambiko i ambu rani ni kina umba rani dagba dungu yo, a wa bi bangiro rani,

³ya Yekova ga Mbori ki yugu gu gene fu rani ka ani ndu ngba ha, na gu pai ka ani mangi he.”

⁴Yeremaya ki ya fu yo nangia nebi, “Mi gi sangba roni; oni ngére, mi akpára fu Yekova gaoni Mbori kuti gu pai oni asana he tipa ha, gu pai Yekova ka karaga ha tipa roni mi agumba ha fu roni; mi aóka nga pai ti roni wa sa te.”

⁵I ki ya fu Yeremaya, “Yekova dú ni ndikidi dezire kuti rani ni irarengo ka ani amánga nga pai kuti agu apai dunduko nga gu Yekova ga Mbori ka keda ro na ni fu rani ya.

⁶Watadu si ni wenepai watadu ni gbigbitapai, ani agia sangba Yekova gaani Mbori ani nakeda ro koyo du ko ni, ya pai ki ngba fu rani ho ka ani gi sangba Yekova ni nga gaani Mbori.”

⁷Ti digida rame bawe sangba Yekova ki ye koyo du Yeremaya ni.

⁸Si du ko ki yambu Yoanana wiri Karea na abarutiri aborosovura dunduko naadu na ko, na aboro dunduko tona ti umba yo dati bakumba yo,

⁹ki ya fu yo, “Ya Yekova nga ga aYisaraere Mbori wẽ, gu ko oni akedi re koyo du ko ni ka maa gaoni kpesarawati ku bara bangiriko:

¹⁰Ka oni nye rogo gi ringara re, mi ki dua roni ku ari ka mi akuádi nga roni ku sande ya; mi arú roni, ka mi amófa nga roni ya; bambiko mi birĩ tire ti gu gbigbitapai nga gu mi amangi kuti roni.

¹¹Ka oni gúnde nga be bakindo aBabero ya, nga gu ko oni nagunde be ko; ka oni gúnde nga be ko ya, wo poi Yekova, bambiko mi du na oni, ka batasa roni na ka kusa roni be ko.

¹²Mi aida pa inapai fu roni, ya ko ini pai fu roni ki mbu roni oni nye kina rogo gaoni ringara.

¹³Ono ka oni ya, ‘Ani anyé nga rogo gi ringara te re,’ ki ta basa sangba Yekova gaoni Mbori

¹⁴niya, ‘Óo, ani andú ku ringara Ezipeta yo, yo ani ka bi nga sovura ni ya, watadu gia woro nambongo, watadu du na gomoro tipa riahe a ya, ani ki niraki yo,’

¹⁵Ako gu yangara roni nga ga aYudo yo, oni gí sangba Yekova. Ya Yekova nga ga arimbasa ko, nga ga aYisaraere Mbori wẽ: Ka oni sa kpakpuroni ka rima ku Ezipeta yo ka ndu ka sunga yo,

¹⁶gu basape nga gu oni agunde be he adúsia fuo roni ku ringara Ezipeta yo; gu ngbongi nga gu oni agunde be he si apéka fuo roni mbembedi ku Ezipeta yo; oni ki kpiki yo.

¹⁷Agu aboro dunduko nasa kpakpuyo ka ndu ku Ezipeta yo ka sunga yo i akpíka be basape, na be ngbongi, na be tata kaza; i adú nga na gu yangara yo ka nye be gu goigbitapai nga gu mi ka ye na ni ku ri yo na agu yo ka bati a te.

¹⁸“Bambiko ya Yekova nga ga arimbasa ko, nga ga aYisaraere Mbori wẽ: Wa gi zinga na gi ngariangaria zinga naye ku ri araki Yerusarema yo, wo ngariangaria zinga ka uka ku ri roni ho oni ka ga ni ku Ezipeta yo. Oni adú ni aboro motiwa, ni úkiga, ni uumohe, ni ugbarasarimo. Ka oni abí nga gi rago re berewe ya.

¹⁹Ya Yekova fu roni, Ako yangara aboro Yuda, ‘Ka oni ndú nga ku Ezipeta yo ya.’ Oni ini he ni rengo ya mi fugu he fu roni areme

²⁰ya oni amangi pai ni biriki kina kuti ungaroni. Bambiko oni akedi re koyo du Yekova ni nga gaoni Mbori, niya, ‘Mo kpári tipa rani fu Yekova gaani Mbori, gu pai Yekova gaani Mbori ka gumba ha mo táki pande he fu rani ani ki mangi kina ha.’

²¹Mi taki pande he fu roni areme, ono oni agia nga sangba Yekova gaoni Mbori rogo gu pai nga gu ko akedi re mi gumba ha fu roni te.

²²Were si du oni ini he ti ni ni rengo ya oni akpi be basape, na be ngbongi na be tata kaza rogo gu rago yo oni akpi nyemu ka ndu ka sunga ni.”