Read zande Yeremaya 43 Bible Online

Yeremaya 43 - zande bible

Yeremaya 43

¹Ho Yeremaya anyasi gumba agi apai dunduko ni re fu aboro dunduko, nga ga Yekova gayo Mbori, nga gu Yekova gayo Mbori akedi ko na ni fu yo,

²Azaraya wiri Asaya na Yoanana wiri Karea na airaenda dunduko ki ya fu Yeremaya, “Mo nagumba kina zire. Yekova gaani Mbori akeda nga ro kono du ani ni te ka ya, ‘Ka oni ndú nga ku Ezipeta yo ka sunga koyo ya’;

³ono Baruka wiri Neriya zingisi ro kuti rani, ka kusa rani ku be aKasado, ya i imi rani watadu ga na ani ku Babera yo ni zizi rani.”

⁴Si du Yoanana wiri Karea na abarutiri aborosovura dunduko na aboro dunduko agia nga sangba Yekova te, ka nye ringara Yuda yo.

⁵Ono Yoanana wiri Karea na abarutiri aborosovura dunduko ki rogo gu yangara aYudo dunduko nakaraga tiyo ka raka rogo ringara Yuda yo yo du arikaaboro ni dunduko nga agu yo i ado yo koyo du yo ni

⁶akumba na ade na agude, na awiri bakindo nga ade, na agu aboro dunduko Nebuzaradana baira ababandarago ambu yo ku be Gedaria wiri Aikama, Aikama angia wiri Safana; na Yeremaya nebi a na Baruka wiri Neriya.

⁷I ki ye ku rogo ringara Ezipeta, bambiko i agia nga sangba Yekova te. I ki da ku Tapanesa yo.

⁸Sangba Yekova ki ta ye koyo du Yeremaya ni Tapanesa yo niya:

⁹“Mo rogo bakere ambia ku bero, ki igi he ku rogo pere rogo gu kpakakpaka ambia nga gu du ti ngbadimo ga Faro bambu bakindo du Tapanesa yo, ku bangiri aboro Yuda,

¹⁰ki ya fu yo, ‘Ya Yekova nga ga arimbasa ko, nga ga aYisaraere Mbori wẽ: Oni ngére, mi akéda sunge ki di Nebukadenesara bakindo aBabero, nga gi moyambu, ko amáa gako mbatabakindo ri agi ambia re nga gu igi mi he re, ko ki dua gako bamburoko bakindo auru he.

¹¹Ko aye ka manga ringara Ezipeta, ki nifu agu yo sa kpio nga agu yo i aringbisi yo sa kpio, ki fu agu yo ni zizi yo nga agu yo i aringbisi yo i du ni zizi yo, na agu yo sa basape nga agu yo i aringbisi yo sa basape.

¹²Ko agínda we rogo ayekaru nga ga ga aEzipeto ambori; ko ki zo ho ki ndu na aboro ku sa yo ni zizi yo; ko ki girisi ringara Ezipeta, wa babanda akandoro nagirisa gani roko ti agbiro; ko ki girisi yo ni zereda.

¹³Ko akúa duadua ambia Bete-semese yo nga gu du rogo ringara Ezipeta; ko azó agu ayekaru nga ga ga aEzipeto ambori na we.’ ”