Read zande Yeremaya 44 Bible Online

Yeremaya 44 - zande bible

Yeremaya 44

¹Gu pai naaye koyo du Yeremaya ni tipa pa agu aEbere dunduko naaraka ringara Ezipeta yo, ku Megidora yo, ku Tapanesa yo, ku Nofa yo, na rogo ringara Paterosa yo,

²“Ya Yekova nga ga arimbasa ko, nga ga aYisaraere Mbori wẽ: Oni bi gu gbigbitapai dunduko nga gu mi aye na ni ku ri Yerusarema na ku ri abaakporo dunduko du Yuda yo. Oni ngére, gi uru re si wa ngbi ugure, boro ara nga yo wa sa te,

³bambiko gu gbegberẽpai i amangi, ka gara gi zinga ku ri yo, rogo gu pai i andu ka zo fuõngua fu kura ambori na ka manga paha nga agu ahe i aina nga ha ya, zavura yo, na oni, na abaroni a.

⁴Mi ki ta guari ngbatutu ka keda gimi amoyambu dunduko nga aneoi, niya, ‘Ako, ka oni mángi nga gi kere gbegberẽ sino re nga gu mi asoga ha ya!’

⁵Ono i adega nga tuyo watadu ye tuyo ka sa tiyo ti gayo gbegberẽ apai te, ka i ambu nga pa zo fuõngua fu kura ambori a ya.

⁶Si du gi ngariangaria zinga na gi era du ti ni ki ki ku ri abaakporo wa we na rogo agene bakporo nga ga Yerusarema a; si ki sa tihe ni ugurago m vurubate, wa du he ti gi uru re.

⁷Were ya Yekova nga ga arimbasa ko, nga ga aYisaraere Mbori wẽ: Tipagine mangi oni gi bakere gbigbitapai ti ni re kina kuti roni, ka kpara kumba na de ti roni ku sa yo, fogo gude na gude, dagba Yuda yo, ka oni ambú nga yangara yo fu roni ya?

⁸Tipagine oni nagara gi zinga ti ni ku ri roni na gu mangaapai nga ga beroni, ka zo fuõngua fu kura ambori rogo ringara Ezipeta no ye oni ka raka ni, ya i kpara roni ku sa yo ki sa roni ni uumohe ni úgbarasarimo dagba arikaaboro dunduko nga ga kpotosende yo?

⁹Bangironi go ti gu gbegberẽpai nga ga abaroni, ti gu gbegberẽpai nga ga abakindo aYudo, na ti gu gbegberẽpai nga ga adiayo, na ti gaoni gbegberẽpai, na ti gu gbegberẽpai nga ga adiaroni, nga gu i amangi he ringara Yuda yo na ngba agene bakporo Yerusarema?

¹⁰Kai aumbasi nga tiyo ya, zavura daku areme vurũ, i agunde nga a te, ka i apeka nga fuo gi rugute na fuo gi rugaapai nga gu mi afu fu roni na fu abaroni a ku bangironi ya.

¹¹“Si du ya Yekova nga ga arimbasa ko, nga ga aYisaraere Mbori wẽ: Oni ngére, mi azinga kuti roni ni gbigbitapai, ka kpara Yuda dunduko ku sa yo.

¹²Mi adia gu yangara yo nga ga Yuda yo nasa kpakpuyo ka ye ku ringara Ezipeta no ka sunga no, i dunduko nikanyasa; i akpi dunduko rogo ringara Ezipeta; be basape na be ngbongi i ka nyasa be he du; tona ti umba yo dati gu bakumba yo, i akpi be basape na be ngbongi; i adú ni aboro motiwa, ni úkiga, ni uumohe, na ni úgbarasarimo.

¹³Mi ambúsa agu yo naraka ringara Ezipeta no, wa mbusi mi Yerusarema, ni basape, na ngbongi, na tata kaza,

¹⁴si du a nga gu ni sa dagba yangara aYudo naye ka sunga ringara Ezipeta no nikamerã watadu nye ni ungani watadu karaga ti ni ku ringara Yuda yo te, nga gu ringara i akpi nyemu ka karaga tiyo ka sunga rogo ho; bambiko i akáraga nga tiyo te, kina bete mefemefe aboro.”

¹⁵Si du agu akumba dunduko naaini he ya adiayo azo fuõngua fu kura ambori, na agu ade dunduko naaru ku bani, nga bakere gbuu, na agu aboro dunduko naaraka Paterosa yo ringara Ezipeta no, i ata karaga pai fu Yeremaya niya:

¹⁶“Tipa gu pai gumba mo fu rani na rimo Yekova, ani adéga nga turani foro te.

¹⁷Ono ani amánga agu apai dunduko nga gu ani azunga he tipa ha, ka zo fuõngua fu nakindo ngbangbaturũ na ka uka amotumo mbirimbiri he fu ri, wa ani amangi he, ani na abarani, na gaani abakindo na gaani abazogo, rogo abaakporo Yuda na ngba agene bakporo Yerusarema; bambiko ani adu na dungu riahe be rani ni gu rago re, ki nidu wenengaĩ, ka ani abi nga gbigbitapai ya.

¹⁸Ono wa ani ambu pa zo fuõngua fu nakindo ngbangbaturũ na pa uka amotumo mbirimbiri he fu ri, ani adu na zingo ahe dunduko ani ki nyasi be basape na be ngbongi.”

¹⁹Ade ki ya, “Ho ani azo fuõngua ni fu nakindo ngbangbaturũ ki uka amotumo mbirimbiri he fu ri, ani amangi he zanga ga akumbarani idapai ya ani mangi rukutu zozo ahe tipa ri du na gari kpiahe ti ni, ki uka amotumo mbirimbiri he fu ri?”

²⁰Yeremaya ki ya fu aboro dunduko, fu akumba na fu ade, na fu agu aboro nakaraga gi karagapai fu ko re:

²¹“Tipa gu fuõngua nga gu oni azo rogo abaakporo Yuda na ngba agene Yerusarema, oni na abaroni, na gaoni abakindo na gaoni abazogo, na aboro ringara, Yekova atingida nga pa ha, te? Si aye nga ku rogo gako berã yo, te?

²²Yekova arengba nga ka hi mbugo gaoni gbigbita mangaapai na gu kere gbegberẽ asino berewe nga gu oni amangi he te; si du gaoni ringara sa tihe ni ugurago ni úkiga ni uumohe, zanga araki rogo ho, wa du he areme.

²³Si bambiko oni azo fuõngua na bambiko oni aingi pai kuti Yekova ka oni agia nga sangba Yekova ya, ka oni apeka nga fuo gako arugute na fuo gako andika na fuo gako dezireapai a ya, si du ti gi gbegberẽpai ku rironi ti ni re, wa du he areme.”

²⁴Yeremaya ki ya fu aboro dunduko na fu ade a dunduko, “Oni gi sangba Yekova, oni nga aboro Yuda dunduko du ringara Ezipeta no,

²⁵Ya Yekova nga ga arimbasa ko, nga ga aYisaraere Mbori wẽ: Oni ataki pande he ni ngbaroni na adiaroni a ki digisi he ni beroni, niya ‘Ani amanga pa gaani kidohe amanga ni rengo nga gu ani akido, ka zo fuõngua fu nakindo ngbangbaturũ na ka uka amotumo mbirimbiri he fu ri.’ Si du oni nyákasi pa gaoni kidohe ki mangi pa gaoni akidohe!

²⁶Si du oni gí sangba Yekova, oni dunduko nga aboro Yuda naraka ringara Ezipeta no: Oni ngére, mi zunga he na rimore du ni bakere he, wo poi Yekova, ya ka boro kpári nga ti rimore ni ngbani nga boro Yuda rogo ringara Ezipeta dunduko ya, niya, ‘Wa du Gbia MBORI ni ungako.’

²⁷Oni ngére, mi naberã pa yo tipa manga yo na gbigbitapai ono na wenepai te; agu aboro dunduko nga ga Yuda yo du ringara Ezipeta no anyása be basape na be ngbongi, daho i ka nyasa ni dunduko.

²⁸Agu yo ka bati be basape i akáraga tiyo ringara Ezipeta no ku ringara Yuda yo, ni umba yo; na gu yangara yo nga ga Yuda yo, naaye ku ringara Ezipeta no ka sunga no, i aina ga da pai nikaru, gimi watadu gayo.

²⁹Gere nikangia yuguyuguhe fu roni, wo poi Yekova, ya mi ambúsa roni rogo gi rago re, ya oni ini ya gimi apai adu ni rengo kuti roni tipa gbigbitapai;

³⁰Ya Yekova wẽ, Oni ngére mi afú Faro Ofura bakindo aEzipeto ku be avurako na ku be agu yo nagbata ungako, wa mi afu Sedekiya bakindo aYudo ku be Nebukadenesara bakindo aBabero, nangia vurako naagbata ungako.”