Read zande Yeremaya 46 Bible Online

Yeremaya 46 - zande bible

Yeremaya 46

¹Gu sangba Yekova naaye koyo du Yeremaya ni nangia nebi tipa arikaaboro.

²Kuti Ezipeta. Tipa gu rikavura nga ga Faro Neko, bakindo aEzipeto, nga gu rikavura naadu pati gu di nga Ferata ku Karukamisa yo nga gu Nebukadenesara bakindo aBabero adi be he rogo biama garã zogarago nga ga Yoyakima wiri Yosiya bakindo aYudo:

³“Oni mbakadi vurakube na bakikii vurakube, ki ndu ku mbata yo tipa sovura!

⁴Oni vódi basunga ti afarasi; Ako aboro afarasi, oni dakpa ku ri ra! Oni rú ti gaoni aba na gaoni kpakpari vura ri roni yo, oni kõ gaoni abaso, ki ukadi tironi na gaoni roko marã!

⁵Tipagine bi mi he ti ni? I yungura ki sa tiyo ku sa yo berewe. Gayo airanyaka du ni bafubafu yo yo ku sande, i ki oro ni ipisatise; i angera nga ku sa yo te― gunde ki du ku bani na ku bani! wo poi Yekova.

⁶Ka gu ipiipi ni óro nga ku sa yo ya, ka iranyaka mérẽ nga a ya; i kotoko ki nitiwi, pati di Ferata ku nodiyo.

⁷“Da nga gi ni re, nahi wa ime Nire, wa di aimehe nakua ngirihe?

⁸Ezipeta nahi wa ime Nire, wa adi aimehe nakua ngirihe. Ko ya, Mi agúari, mi adáda kpotosende, mi agbarasa abaakporo na araki rogo ho.

⁹Ako afarasi, oni ndu ku mbata yo, Ako angbagidavura, oni ndú ni zinga! Airanyaka kúru ki ndu: aboro Etiopia nazada vurakube na aboro Puta, aboro Ruda nga airatatamana rogo pa darã mboto.

¹⁰Gu uru re nga ga Gbia MBORI uru nga ga arimbasa ko, nga uru irabape, ko aira bape ko ti avurako. Basape nikarita ahe ki mbiki, ki mbiri kureyo ki mbi be he. Bambiko Gbia MBORI nga ga arimbasa ko namanga pa motumo rogo ringara ku nodiyo pati gu di nga Ferata.

¹¹Mo ndu ku Girada yo, ki bi tomengua nga ngua kaza yo, Ako aboro Ezipeta! Mo amangi dungu angua vurũ; pa husa ro adu nga ho te.

¹²Arikaaboro gi pa ga zee, kpotosende ki hi be ga kpe; bambiko iranyaka akoto ti kura iranyaka; i ue ki tiwi wa sa.”

¹³Gu pai Yekova agumba fu Yeremaya nangia nebi tipa pa ye Nebukadenesara bakindo aBabero ka manga gu ringara nga ga aEzipeto:

¹⁴“Mo táki pande he Ezioeta yo, ki gumba pa ha Migedora yo; mo táki pande he Nofa yo na Tapanesa yo; Mo yá, ‘Oni ru nga ki mbakadi tironi, bambiko basape nikarita rago pati roni kirikiri.’

¹⁵Tipagine gaoni nyanyaki boro aora ti ni? Tipagine ni aru nga ti ni ya? Bambiko Yekova fó ni ku sande.

¹⁶Gaoni rimbasa kotoko ki tiwi, i ki ya gu ni fu gu ni, ‘Ani gúari, ani ga berewe koyo du gaani aboro ni na ku rogo gu ringara i avungu rani rogo ho, bambiko gu basape nga ga abarungosirani.’

¹⁷I ki ya ti Faro nga bakindo aEzipeto, ‘Boro tawawa gbua, nambu rago si susi.’

¹⁸“Wa du mi ni ungare, wo poi Bakindo, du rimoko nga Yekova nga ga arimbasa ko, wa Tabora du dagba abaagangara, wa Karumera du pangba baime, wo boro ka ye.

¹⁹Ako araki Ezipeta yo, oni mbakadi tironi na tindiro tipa nduge wa zizi aboro! Bambiko Nofa asá tihe ni bate, ki du ni zokodizokodi he, zanga araki rogo ho.

²⁰“Betedi paranga nabagara nga Ezipeta, yeremboi ye nodiyo sa ru.

²¹Zavura ga Ezipeta ngbengbe abo rosovura rogo ringara du wa awiri abagara nze anze; ii, i sa tiyo ki oro wa sa, i aru nga te; bambiko uru gayo gberãngbi da ku ri yo, si nga rago gayo mbusa.

²²“Woro yo nawo wa wo nandu rarara ku sa yo; bambiko rimbasa avurayo naye ni ome, ki niye sa yo na amangua, wa agu yo nadewa angua.

²³I adé gaha bire ku sande, wo poi Yekova, ka si vura du ni ndendende he vurũ, bambiko i nge ti ayere; i nge ki susi ba geda yo.

²⁴I abá zee ku ri aboro Ezipeta, i afú yo ku be aboro ku nodiyo.”

²⁵Yekova nga ga arimbasa ko, nga ga aYisaraere Mbori, ki ya: “Mo ngére, mi naye na mbusa ku ri Amona nga ga No mbori, ku ri Faro na ku ri Ezipeta na gaha ambori na gaha abakindo, ku ri Faro tigako na agu yo nakida kuti ko.

²⁶Mi afu yo ku be agu yo nagbata ungayo, ku be Nebukadenesara bakindo aBabero na ku be avuruko. Fuo gure aboro aráka Ezipeta yo wa gu naadu mbata, wo poi Yekova.

²⁷“Ako Yakoba gi moyambu, ono ka mo gúnde nga ya, Ako Yisaraere, ka mo yungura nga a ya; bambiko mo ngere, mi abátasa ro wa du mo tuturu, na awiro rogo gu ringara du yo ni ni zizi yo ku rogo ho. Yakoba akáraga tiko ki du zezeredi ki ongodi, a nga boro sa nikagundesi ko te.

²⁸Ako Yakoba gi moyambu, ka mo gúnde nga ya, wo poi Yekova, bambiko mi du na mo. Mi adígisa arikaaboro dunduko yo mi ado roni ku ho ni, ono oni mi adigisa nga roni te, Mi arúga roni na ruru ringbisahe, ka mi ambú nga roni zanga mbusa ya.”