Read zande Yeremaya 49 Bible Online

Yeremaya 49 - zande bible

Yeremaya 49

¹Tipa aboro Amona. Ya Yekova wẽ: “Agude be Yisaraere nga akumbagude te? Dikumbo be ko te? Tipagine tie Mirekoma arogo ga Gada angbi ti ni, gako aboro ki sungu rogo gako abaakporo?

²Mo ngére, aragoho naye, wo poi Yekova ho mi ka tina tatangba ni nga ga vura i agia ha kuti Raba nga ga aAmono bakporo; si asá tihe ni vurubate ni kanda, i azó gaha akporo na we; si du Yisaraere ki rogo ga agu yo ũkumbo naarogo gako ũkumbo mbata, wo poi Yekova.

³“Ako Esebona, mo yóro wawa, bambiko i gbarasi Ai! Ako awiri Raba nga ade, oni kpári! Oni úkadi mbuzaroko, oni kpári ki nita nebaduroni, ki nioro koyo na kono dagba anguru! Bambiko Mirekoma ndú ni zizi ko, na gako aboromotumo na gako abazogo a.

⁴Tipagine oni naabia tironi ti ni na gaoni angboongboorago? Ako aboro nga atikusayo, nakida kina kuti gaoni kikiipaahe, niya ‘Da nikaye sa rani?’

⁵Oni ngére, mi ayé na gunde ku ri roni be agu yo du pati roni kirikiri dunduko, wo poi Gbia MBORI nga ga arimbasa ko, i ki do roni ku zegi yo, aboro ni ba sa sa nioro kina barangba yo dnri, ka boro adú nga ka dungura merẽsimerẽsi yo ya.

⁶Ono mi akáraga awiri aAmono giza gene zia yo yo, wo poi Yekova.”

⁷Tipa Edome. Ya Yekova nga ga arimbasa ko wẽ: “Tatamana berewe Temana yo? Rugatinapai nyasi be ngangarã aboro? Gayo tatamana birikpo?

⁸Ako araki Dedana yo! Oni óro, ki sa tironi ku sa no, oni ráki rogo dudungura rago, Bambiko mi ayé na gu gberãngbi nga ga Esau ku ri ko, ni gu rago ho mi ka mbusa ko ni.

⁹Ka abadungura bakakue aye koyo du oni ni, ka i ambu nga futuhe te? Ka airadĩ ye yuru, ka i agbarasi nga kina gu narengbe tipa yo te?

¹⁰Ono mi uru Esau ni kundiri ko, mi kusi pa gako okooko abagbuko, ka ko arengba nga ka oka tiko berewe ya. I gbarasi awiriko na awirinako, na akurako a; ka ko adu nga ho berewe ya.

¹¹Oni mbú gaoni awirinyaure, mi abánda yo ni ungayo; oni ídi he gu gaoni adekurugbo i kida kuti re.”

¹²Bambiko ya Yekova wẽ: “Ka ngia agu yo nikambira he ti ngba gu inga i are nga na ni tigayo ya, mo tigamo nikadu zanga mbusa? Mo azánga nga mbusa te, ono mo tigamo nikambira he ambira ti ngba gu inga re.

¹³Bambiko mi zunga he ni tire, wo poi Yekova, ya Bosura asá tihe ni úkiga, ni úgbarasarimo, ni ugurago, ni uumohe, gaha abaakporo dunduko agbérã nye anye kindi.”

¹⁴Mi gi pangbanga ngba Yekova, i kedi bamokedi ku dagba arikaaboro: “Oni dungura tironi wa sa ki ye kuti bakporo, ki guari ku ari sa vura!”

¹⁵Bambiko mo ngére, mi amáa ro toni dagba arikaaboro ni payasipayasi ro dagba aboro.

¹⁶Ga tiriwopai nangi ro, na gu rekangose du kpotoro yo a, mo naraka rogo sapusapu ambia, nazada basona gangara. Ka mo vura maa ga bambu ku ari yo wa ga dingimo vurũ, mi azóga ro azoga yo, wo poi Yekova.

¹⁷“Edome asá tihe ni úkiga agu aboro dunduko nikasusa pati he i akíga ki niumo he mbiko gu gberãrago nga gaha dunduko.

¹⁸Wa si adu ho i agbarasi Sodomo ni na Amora na agu abaakporo naadu pati he, wo poi Yekova, wo ka boro aráka nga yo sa ya, boro amáa nga kooro yo a te.

¹⁹Mo ngére, boro naye wa bahu nakura bire yo Yaradene yo sa nyanyaki ndugu akandoro, wa mi akatunguo yo i oro ku sa yo pati he; mi ki ringbisi boro ku ri Edome nga gu ni mi ka sia ni. Bambiko da du wa mi? Da nikayamba re?

²⁰Gini babanda akandoro ka ru bara bangire? Si du oni gí pa gu rugapai nga gu gumba Yekova kuti Edome na agu apai nga gu mbakadi ko kuti araki Temana yo: Zavura gu rukutu ra nga ga rimbasa akandoro ra i agbéfa ra dú ku sa yo; ndugu ra adú ni bagbegberẽ he ni rengo rago gaami digidapai.

²¹Ti woro tigoho kpotosende akío akio; i agia kpehe kina Zamba Baime yo.

²²Mo ngére, boro abíta ku ari ki gu sue wa dingimo, ki zara puponi sa Bosura, ngbadu airanyaka Edome yo adú rogo gu uru re wa ngbadu de rago gari ima vunga.”

²³Tipa Damaseke. “I ba zee ku ri Amata na ku ri Arupada, bambiko i gi gbigbita apangbanga: i ziziri be gunde, i ni fudifudi yo wa baime tikpo nga gu arengba nga ka ru zaa ya.

²⁴Damaseke du dokonyõ, si sa tihe ka ora, pa gunde zi he; imisiri zi he na arungo, wa ga de rago vunga.

²⁵Gu baworimo bakporo nga gu mbu yo ho, nga bakporo ngbarago!

²⁶Si du gaha paranga aboro atiwa kina ngba gaha agene, gaha aborosovura adú ni gbarasigbarasi yo rogo gu uru re, wo poi Yekova nga ga arimbasa ko.

²⁷Mi agínda we ti ngapa Damaseke, si ki riti abambu bakindo nga ga Bena-dada.”

²⁸Tipa Kedara na agu angbi nga ga Asora nga gu Nebukadenesara bakindo aBabero aimi he. Ya Yekova wẽ: “Mo gúari ku ari, ki ndu ku mbata yo sa Kedara! Mo gbárasi aboro bara ku uroyo!

²⁹I aróga gayo abamburoko na gayo rimbasa akandoro, na gayo aroko dadahe na gayo aúsunge dunduko; gayo akameri i aróga ra beyo ku sa yo, aboro ki kpari fu yo: ‘Gunde du ku bani na ku bani dunduko!’

³⁰Ako araki Asora yo, Oni óro, oni ndú andu tuturu ku sa yo, ki niraki dudungura rago yo! wo poi Yekova. Bambiko Nebukadenesara bakindo aBabero aberẽ pa manga pai kuti roni ki mbakadi pai kuti roni.

³¹“Mo gúari ku ari, ki ndu ku mbata yo kuti gu rikaaboro du zezeredi, naraka ni bandabanda yo, adu nga angbadimo ti gayo bakporo watadu ngbongbo a ya, nga agu yo naraka ni sa yo, wo poi Yekova.

³²Gayo akameri adú ni ugbugbuahe, gayo rimbasa abagara ni ũmozi. Mi agbándaka agu yo ku rogo angbi dunduko nayera tii mburu riyo, mi ki ye na gayo gberãngbi ti gayo bangbanda rago ni ba sa sa, wo poi Yekova.

³³Asora adú ni baraka fu ahúa, ni nyenye gbarasigbarasi rago; boro aráka nga yo wa sa te, boro amáa nga kporo rogo ho a te.”

³⁴Gu pai nga ga Yekova naaye koyo du Yeremaya ni nangia nebi tipa Erama, ti tonatona zogarago nga ga Sedekiya bakindo aYudo.

³⁵Ya Yekova nga ga arimbasa ko wẽ: “Mo ngére, mi akúa gu mboto nga ga aEramo nga mburu pa gayo ngarã;

³⁶mi ki ye na ayuge biama ku ri Erama ti papara ngbangbaturũ biama; mi ki gbándaka yo ku rogo angbi yo dunduko, agu yo i ado yo Erama yo i agbándaka yo ku dagba arikaaboro dunduko.

³⁷Mi akúadi aEramo barangba avurayo, na barangba agu yo nagbata ungayo; mi ayé na gbigbitapai ku ri yo, nga gi ngariangaria zinga, wo poi Yekova. Mi akéda basape fuo yo daho mi ka nyasa yo ni;

³⁸mi ki moi gi mbatabakindo Erama yo, ki gbarasi gayo bakindo na abazogo, wo poi Yekova.

³⁹“Ono rogo yangara arago mi akáraga aEiamo gene zia yo yo, wo po, ifekova.”