Read zande Yeremaya 50 Bible Online

Yeremaya 50 - zande bible

Yeremaya 50

¹Gu pai nga gu Yekova agumba tipa Babera, na tipa ringara aKasado, ku ngba Yeremaya nangia nebi niya:

²“Mo túngusi he dagba arikaaboro ki taki pande he, mo túmba bendere ku ari ki taki pande he, ka mo óko nga ha ya, mo ya: ‘I di Babera, Bere du na zee, I kuadi Merodoka rukutu. I ba zee ti gaha kpiaahe, ki kuadi gaha uirisa.’

³“Bambiko rikaaboro ye nodiyo kuti ni, nga agu yo nikasa gaha ringara ni bate, ka boro aráka nga rogo ho wa sa ya; aboro aóra ku sa yo na anya a.

⁴“Rogo agu arame re na ti gu rago re, wo poi Yekova, awiri aYisaraere na awiri aYudo amóngo ye sa, nikpari wa i aye; i ki nigbata Yekova gayo Mbori.

⁵1 asána he tipa gene ku Siona yo, ki ta sa kpakpuyo koyo niya, ‘Oni yé, ani kpámia tirani na Yekova ni nyenye mokido nga gu bangirise ka go nga ti ni wa sa ya.’

⁶“Gimi aboro adu wa ngbuongbuo akandoro; ababandara angbe fu ra ku mbata yo ki ingisi ra nisa ra ku sa yo ri abaagangara; ami ki ndu ti gu bagangara sa gu gangara, bangirira ki go tipa gaami ndugu.

⁷Agu yo dunduko bi ra i ki riti ra, avurara ki ya, ‘Pai ri rani te, bambiko i ingi kuti Yekova gayo ndikidi banye, nga Yekova, nga ga abayo maabangirise.’

⁸“Oni gúari bangbanda Babera yo, ki kuru ringara aKasado yo, ki du wa abaameme barangba rimbasa akandoro.

⁹Bambiko mo ngére, mi nawo ti rikaavura nga ga bakere arikaaboro ki ye na yo ringara nodiyo kuti Babera; i atángara tiyo kuti ni; yo i ka dia ha ni. Gayo aguanza du wa gu tatamana iranyaka nakaraga nga tini ni ku be ni ya.

¹⁰I agbú ringara aKasado; agu yo dunduko ni ka gbu he i au au, wo poi Yekova.

¹¹“Ako oni nga abagbu gi ũkumuko, Ka rago vura ngba ti roni vurũ, ka oni vura ngi, ka oni vura du ngbungurungbunguru wa paranga nabagara nari nvuo, ki nikpari wa nyanyaki abaafarasi,

¹²naroni adú na zee ki susi, gu ri navungu roni, ki mungo amungo. Oni ngére, ri adú sa yo ti mburu arikaaboro yo, wa ngbakungba ni uguhe ni ngbi ngume.

¹³Mbiko gu zinga nga ga Yekova ringara adú nga na kporo rogo ho te, ono si ki du ni vurubate dunduko; agu aboro dunduko ka asusa pati Babera i akíga akiga, ki niumo he bambiko gaha gberãrago dunduko.

¹⁴Oni tángara tironi sa vura kuti Babera kirikiri, agu roni dunduko nagbe mboto; oni nó bakporo, ka oni bánda nga aguanza ya, bambiko si ingi pai kuti Yekova.

¹⁵Oni tá wawa kuti he kirikiri, bambiko si idi ka ra ni gorõho; gaha mburu bakporo ti, i kuadi angapaha ku sande. Bambiko gere nga gu irabape nga ga Yekova: oni íri bape ti ni, oni mángi fu he wa si amangi.

¹⁶Oni kpára bamitunga ku sa yo ti Babera, na gu ni zadi mungere regbo keahe; bambiko gu basape nga ga barungosi aboro, aboro dunduko asá tiyo ti ni sa kina gayo aborokporo, aboro ki nioro ni ba sa sa sa kina gayo ringara.

¹⁷“AYisaraere wa dandidandi akandoro abahu adanda ra. Bakindo aAsuro ariti yo mbata, were ti fuo ko Nebukadenesara bakindo aBabero akpuruka amemeyo.

¹⁸“Si du ya Yekova nga ga aYisaraere Mbori wẽ: Mo ngére, mi naye na mbusa ku ri bakindo aBabero na ku ri gako ringara, a wa mi ambusi bakindo aAsuro.

¹⁹Mi akáraga aYisaraere ku rogo gayo banambu, i ki niri he Karumera yo na Basana yo, gu he ko akpi nyemu he i ambi be he ti agangara Efuraima na Girada.

²⁰I agbáta irairapai dagba aYisaraere yo ti agu arame re na ti gu rago re, wo poi Yekova, ka si adú nga ho wa sa ya; na ingapai rogo Y uda yo, ka i abí nga ha wa sa ya; bambiko mi avú agu yo mi ambu yo ni yangara yo yo.

²¹“Oni ndú sa ringara nga Merataima, na sa araki Pekode yo. Oni imi yo, ki ba tungayo kpakaya, wo poi Yekova, oni mángi agu apai dunduko mi arugu roni kuti ni.

²²Woro vura nawo rogo ringara, na woro pa buna rago!

²³Gu bande nga ga kpotosende ru dunduko kati yo ru ku sande u ki kuadi! Babera sa tihe ni úkiga dagba arikaaboro!

²⁴Ako aBabero, mi ré gbina tipa roni oni ki du ni zizi roni ka oni aina nga ha ya; i abi roni ki zi roni, bambiko oni azuna pai kuti Yekova.

²⁵Yekova za gako baiga amarãvura, ki kusi agu amarãvura nga ga gako imisiri ngbaduse, bambiko Yekova nga ga arimbasa ko du na pai ka manga ha rogo ringara aKasado.

²⁶Oni yé sa ni ti papara abangbanda arago dunduko; oni sóngo gaha agbamu; oni bá aguta ha wa agu aguta zendehe, ki gbarasi he kpakaya; ka gaha he anyé nga wa sa ya.

²⁷Oni imi gaha abaabagara dunduko, ami zorõ sa imo ra. Na gberẽ he fu ra, bambiko gaami uru da, rago gaami mbusa.

²⁸“Oni dége turoni! i oro ki merẽ ringara Babera yo, ka taka pande gu irabape nga ga Yekova gaani Mbori Siona yo, irabape tipa gako yekaru.

²⁹“Oni yámbu abaaguanza kuti Babera, agu yo dunduko nagbe amboto. Oni vó gbuu pati he kirikiri, ka boro mérẽ nga wa sa ya. Oni amánga fu Babera rengbe na gaha mangaapai, oni mángi he rengbe kuti gu si amangi; bambiko si sa mungu ni ruka kuti Yekova, gu Ziazia Ko nga ga aYisaraere ko.

³⁰Si du gaha aparanga akpíka ngba kina gaha agene, i ki gbarasi gaha abasovura du ni gu uru re, wo poi Yekova.

³¹“Ako mo nga iraruka, mo ngére, mi gbarasi rimoro, wo poi Gbia MBORI nga ga arimbasa ko; bambiko ga rame da, nga gu rago mi ka mbusa ro ti ni.

³²Gu iraruka re ko akóta ki ti, ka boro adú nga ho ka tumba ko wa sa ya, mi ki ginda we rogo gako abaakporo, si ki riti agu ahe dunduko du pati ko kirikiri.

³³“Ya Yekova nga ga arimbasa ko wẽ: I narungosi awiri aYisaraere na awiri aYudo wa sa na yo; agu yo naandu na yo ni zizi yo i zi yo nyanyaki, i ka pa mbu yo i ga.

³⁴Batumoyo nyaki; rimoko nga Yekova nga ga arimbasa ko. Ko azúngadi he ni rengo tipa gayo apai, ya ko afú ongoda fu kpotosende, ono ko afú fudifudipai fu araki Babera yo.

³⁵“Basape du ri aKasado, wo poi Yekova, na ku ri araki Babera yo, na ku ri gaha abazogo na gaha airatatamana!

³⁶Basape du ri airasoroka, ya i sa tiyo wa mumungo aboro! Basape du ri gaha airanyaka, ya i yúngura du!

³⁷Basape du ri gaha afarasi na gaha angbagidavura, na ku ri ga kungba aboro rimbasa vura du bangbanda ha, ya i sá tiyo wa ade! Basape du ri gaha kikiipaahe dunduko, ya i gbú he agbu!

³⁸Ugure du ri gaha aime, ya si úgudi du! Bambiko si nga ringara sese kpiaahe, i namungo mbiko gbudagbuda.

³⁹“Si du anyarinde ka araka ti ni Babera yo na ahúa, na gu bazire nga asurutío aráka rogo ho a; si adú nga na aboro rogo ho berewe nye anye kindi te, ka si adú nga na araki rogo ho tipa arika ngbatunga aboro dunduko nye anye kindi ya.

⁴⁰Wa si adu ni gu rago Mbori agbarasi Sodomo ni na Amora na agu abaakporo naadu pati he, wo poi Yekova, wo ka boro aráka nga yo wa sa ya, na wiri boro amáa nga kporo vo wa sa a te.

⁴¹“Mo ngére, aboro naye nodiyo; bakere rikaaboro na dungu abakindo naguari ni tiyo tuturu papara kpotosende yo.

⁴²I zadi mboto na baso; i nga kere aboro, ka ina pai adu nga ti yo ya. Woro yo du wa woro pazuo baime tikpo; i naora ri afarasi, ki ukadi tiyo wa aborosovura kuti roni, Ako aboro Babera!

⁴³“Bakindo aBabero agi pa yo, beko ki ti zezere; imisiri ki zi ko, wa ga de ima rago vunga.

⁴⁴“Mo ngére, boro naye wa bahu nakura bire yo Yaradene yo sa nyanyaki ndugu akandoro, wo mi ka tungua yo i oro ku sa yo pati he; mi ki ringbisi boro ku ri Babera nga gu ni mi ka sia ni. Bambiko da du wa mi? Da nikayamba re? Gini babanda akandoro ka ru bara bangire?

⁴⁵Si du oni gí pa gu rugapai nga gu gumba Yekova kuti Babera, na agu apai nga gu mbakadi ko kuti ringara aKasado: Zavura gu rukutu ra nga ga gayo rimbasa akandoro vurũ i agbéfa ra ku sa yo ni rengo; ndugu ra adú ni bagbegberẽ he ni rengo ti gaoni digida pai.

⁴⁶Ti woro zia Babera kpotosende akío akio, i agia kpe he dagba arikaaboro du.”