Read zande Yeremaya 52 Bible Online

Yeremaya 52 - zande bible

Yeremaya 52

¹Garã Sedekiya adu 21 ho ko atona ka zoga rago ni; ko ki zogo rago Yerusarema yo garã ki du bawe na sa. Rimo nako nangia Amutara wiri Yeremaya boro Ribina.

²Ko ki mangi gu pai nadu ni gbigbita ha bangiri Yekova, a wa Yoyakima anamanga.

³Bambiko pai aye ka du gbegberẽ ku Yerusarema yo na ku Yuda yo, mbiko ga Yekova zinga, si ko abafu yo ti ni bara bangiriko. Sedekiya ki sa mungu kuti bakindo aBabero.

⁴Rogo ribua garã gako zogarago, rogo bawe diwi, ti rameru bawe, Nebukadenesara bakindo aBabero aye, ko tigako na gako rimbasa aborosovura sa Yerusarema, i ki zi bataya pati he ki dua gbata pati he kirikiri.

⁵Si du i aru nguru ti ni pati bakporo, ki da ti gu bawe na sa garã nga ga Bakindo Sedekiya.

⁶Ti ribua rame nga ga biama diwi gberãngbi ki moi pai bakporo yo, ni kere he ka riahe adu nga tipa aboro gu ringara re ya.

⁷I ki imi ngapa bakporo; abasovura dunduko ki oro, ki kuru ku zegi yo bakporo yo yuru ngba gu gene gii ngbadimo yo naadu dagba angapa bakporo ue naadu pati ga bakindo ati. Were aKasado adu pati bakporo kirikiri. I ki ndu ngba gene ku kpasakpasa rago yo.

⁸Ono ga aKasado rimbasa aborosovura ado fuo bakindo, ki dusia Sedekiya rogo kpasakpasa rago Yereo yo; gako rimbasa aborosovura ki gbandaka pati ko dunduko.

⁹Si du i ki zi bakindo, ki ndu na ko koyo du bakindo aBabero ni ku Ribera yo rogo ringara Amata, ko ki gbarasi ngbanga fu ko.

¹⁰Bakindo aBabero ki imi awiri Sedekiya kina ku bangiriko, ki imi awiri abazogo dunduko a nga ga aYudo yo Ribera yo.

¹¹Ko ki imi bangiri Sedekiya, ki vo ko ni azogbo, bakindo aBabero ki ndu na ko ku Babera yo, ki ba ko ku bambukisa yo dati rago kpioko.

¹²Rogo nisue diwi, ti rameru bawe ― nga gu nangia bawe na ribua garã zogarago nga ga Bakindo Nebukadenesara nangia bakindo aBabero ― Nebuzaradana arimi ku Yerusarema yo, nangia baira agu ababandarago nga gu ko namangi pa bakindo aBabero.

¹³Ko ki zo ga Yekova bambu, na ga bakindo bambu na agu abambu dunduko du Yerusarema yo; ko azokodi bakindigi abambu na we dunduko.

¹⁴Arimbasa aborosovura nangia ga aKasado yo dunduko, nga agu yo naadu na baira ababandarago, i ki kuadi angapa bakporo pati Yerusarema dunduko.

¹⁵Nebuzaradana baira ababandarago ki ga na bete agu yo du ni rungorungo yo ki susi dagba aboro ni zizi yo, na yangara aboro i ambu yo rogo bakporo, na agu yo naoro koyo du bakindo aBabero ni, wa sa na gu yangara yo nangia aboro sunge.

¹⁶Ono Nebuzaradana baira ababandarago ambu bete gu rungorungo aboro ringara rungo arungo ki susi, i du ni abambakadi bakakue ni ababanda aati.

¹⁷Agu adangba nangia sirigi nadu tii ga Yekova bambu yo, na amburuhe na gu bazundati nangia sirigi nga gu nadu rogo ga Yekova bambu yo, aKasado ki kuadi he rukutu, ki ndu na asirigi dunduko ku Babera yo.

¹⁸I aga na aakoro, na aundukuda ahe, na aúbisawe, na akurungbu, na abaarikare, na agu aúsunge sirigi nga gu i anamanga sunge na ni;

¹⁹na asaani, na aúkpanawe, na akurungbu, na aakoro, na abaduawe, na abaarikare, na rukutu asaani. Gu nadu ni dahabu baira ababandarago aga na ni ni dahabu, na gu nangia ga feda, ni feda.

²⁰Agu adangba bambu ue, gu bazundati, na kpia abaabagara nadu ni sirigi bawe na ue, nadu tii amburuhe yo, nga gu Soromo bakindo amangi he tipa ga Yekova bambu, barõa agu asirigi nga ga agi ahe dunduko re agasi pa ringbisa ha.

²¹Pa adangba adu were, bagiza dangba sa adu wa bagiza mbiribe bawe na muambi, bagiza gire adu ti ni kirikiri wa bagiza mbiribe bawe na ue, banagaha ki du wa awirinzaga biama, vuruhe yo ki du ni ku he.

²²Kpakpari sirigi ki du ri he yo, bagiza gu kpakpari adu wa bagiza mbiribe bisue; kpia zuzuhe wa ndavu adu ti kpakparihe kirikiri na arambaaramba ahe dunduko adu ni sirigi. Gu ue dangba re adu wa kina gu na kpia zuzuhe wa ndavu a.

²³Kpia zuzuhe wa ndavu adu yo 96 ti apavuruhe; kpia zuzuhe wa ndavu adu wa 100 auru gu arambaaramba he re kirikiri.

²⁴Baira ababandarago ki zi Seraya nangia baira aboromotumo, na Zefaniya gu ue boromotumo, na agu ababanda ngbadimo nadu biata;

²⁵ko ki zi barumbatayo sa bakporo yo nga gu ko nadu ku ri abasovura, na aboro saba dagba agu yo yo nanabi kpakpu bakindo, i abi yo bakporo yo; na bakeapai nangia ga barutiri rimbasa aborosovura ko naadungura aboro ringara; na aboro ringara 60, i abi yo bakporo yo.

²⁶Nebuzaradana nga baira ababandarago ki ga na yo, ki ye na yo koyo du bakindo aBabera ni Ribera yo.

²⁷Bakindo aBabero ki ta yo, ki imi yo Ribera yo ringara Amata yo. Si du i aga na aYudo ti ni ni zizi yo rogo gayo ringara.

²⁸Gere nga pa gedigedi agu aboro Nebukadenesara aga na yo ni zizi yo; ti saba garã aEbere 3,023;

²⁹ti bawe na muambi gará zogarago nga ga Nebukadenesara ko aga na aboro ni zizi yo Yerusarema yo wa 832;

³⁰ti 23 garã zogarago nga ga Nebukadenesara, Nebuzaradana nangia baira ababandarago aga na agu aEbere ni zizi yo 745; aboro dunduko adu wa 4,600.

³¹Si ki ta du wa gere ti gu 37 garã nga gu Yoyakina adu ni zizi ko nangia bakindo aYudo, ti bawe na ue diwi, ti rameru 25. Ewira-merodoka bakindo aBabero atumba Yoyakina bakindo aYudo ku ari ki kusi ko bambukisa yo; ti kina gu garã ko nga Ewira-meredoka atona zoga rago ni.

³²Ko ki nifu na ko wenengaĩ, ki moi gako mbatabakindo ku ri agu ambatabakindo nga ga agu abakindo nadu na ko Babera yo.

³³Si du Yoyakina ki uru gako aremu nangia ga bambukisa. Ko ki niri riahe ku bangiri bakindo dedede wa ko adu ni ungako;

³⁴tipa gako úngba, ahe adu kina ho bakindo anafu fu ko kindi; rengbe fu ko na uru dedede, wa ko adu ni ungako, ki da ti gu rago ko akpi.