Read zande Yeremaya 6 Bible Online

Yeremaya 6 - zande bible

Yeremaya 6

¹Ako awiri Benyamina, oni gúari bangbanda Yerusarema, ka batasa tironi! Oni vúdi nambongo Tekua yo, ki tumba yuguyuguhe Beteakerema yo; bambiko gbigbitapai ye nodiyo, na buna rago.

²Gu betedi rurungbura aboro mi agbárasa yo, nga aboro Siona.

³Ababanda akandoro na gayo rimbasa anya ayé kuti bakporo; i adúdua gayo abamburoko pati he kirikiri, ami arí banambu, ami ni ba sa sa kina rogo gu ba ra.

⁴“Oni mbákadi vura kuti he; oni gúari, ani zúba ha bebere uru!” “Na gberẽ he fu rani, bambiko uru nati, bambiko nzereme nga ga nyemu nagiza!”

⁵“Oni gúari ani ki zuba ha yuru, ki gbarasi gaha abambu bakindo!”

⁶Bambiko ya Yekova nga ga ari mbasa ko wẽ: “Oni dé gaha angua; oni bá kanda kuti Yerusarema. Gere nga gu bakporo nikadu ni mbusimbusi he; mbiko kina pa rungosi aboro du rogo ho.

⁷Wa guga nabanda imehe ki nifu ni wene he, wo si nabanda gaha gbigbitapai ki nikusi he ni vovo ho; i nagia pa zuu na pa gbarasahe ku rogo ho yo; imisiriapai na aoro nye ku bara bangire kindi.

⁸Ako Yerusarema oni gí fugapai, mi ka sa tire ti roni; mi ka manga roni wa vurubate, wa gu ringara zanga araki rogo ho.”

⁹Ya Yekova nga ga arimbasa ko wẽ: “Oni káti gu yangara aYisaraere sirisiri, wa kata yo bakakue; wa bakati bakakue oni ki fugu he berewe ti abehe ni beroni.”

¹⁰Ada ka mi fura na yo ki fugu pai, ya i gi he? Mo ngére, tuyo ni kisikisi he, i arengba nga ka dega ha te; mo ngére, gu pai nga ga Yekova du fu yo wa ũgbarasarimo, rago angba nga ti yo mbiko ho te.

¹¹Si du mi hi be gu ngariangaria zinga nga ga Yekova; mi nambu be dika ha ku kpotore yo. “Mo úka ha ku ri agude gene bakporo yo, na ku ri agu adunguratise nga ga paranga aboro, a wo; kumba na diani i ka roga yo ku sa Yo, gbinza aboro na kuru gbinza aboro a.

¹²I afú gayo abambu fu akurayo, gayo aati na adiayo wa sa; bambiko mi atáã bere kuti araki rogo gu ringara re,” wo poi Yekova.

¹³“Bambiko tona ti gu umba ni dati gu bakumba ni dagba yo yo, aboro ni ba sa sa du na nyemu iraira ũmokiisa ti yo; tona ti anebi dati aboromotumo, aboro ni ba sa sa namanga pai ni biriki.

¹⁴I wiisi ga gimi aboro oro ni kungba pai, niya, ‘Zereda, zereda,’ ho adu nga zereda ni ya.

¹⁵I adu na zee ho i nimangi kere gbegberẽpai ni? Óo, i adu nga na zee wa sa te; i aina nga pa uwa a te. Si du i ka tiwa ti ni dagba agu yo yo natiwa; i adú ni sikasika yo, ti gu rago mi ka mbusa yo,” wo poi Yekova.

¹⁶Ya Yekova wẽ: “Oni rú pangba abaagene, ka ngera, ka sana he tipa kuru agene, yo du wene gene ni; ki nita ngba ha, ki bi ongoda tipa mbisimoroni. Ono i ki ya, ‘Ani atá nga ngba ha te.’

¹⁷Mi moi babandarago ku ri roni, niya, ‘Oni dége turoni sa woro nambongo!’ Ono i ki ya, ‘Ani adéga nga turani te.’

¹⁸Si du, Ako arikaaboro, oni gí he, Ako rimbasa aboro, oni ini gu pai nikamanga fu yo.

¹⁹Ako kpotosende, oni gí he; oni ngére, mi naye na gbigbitapai ku ri agi aboro re, nga zuzu gayo sangaapai, bambiko i adega nga tuyo sa gimi apai te; na tipa gi rugute, i gindiga ha.

²⁰Tipa gini he fuõngua anaye ti ni fere Seba yo, watadu nzinziri koko gii ngbi yo? Gaoni zozo amotumo mi aida nga pa ha te, gaoni amotumo angba nga ti re a te.

²¹Si du ya Yekova wẽ: ‘Oni ngere, mi apíga ambia kota bara bangiri agi aboro re nga gu i ka kotoka ti ni; abayo na awiriyo akpíka wa sa, akurayo na abadiangbayo a.’ ”

²²Ya Yekova wẽ: “Oni ngére, aboro naye ringara nodiyo, gu bakere rikaaboro nawo ti tuturũ apapara rago gbe nga ga kpotosende.

²³I zadi mboto na baso, i du ni kere yo zanga inapai, woroyo du wa woro paa baime; i naora ri afarasi, ki ru ni nguru wa abasovura, kuti roni, Ako aboro Siona!”

²⁴Ani gi pa pande he, ani tigba berani tipa undahe; imisiri zi rani, imisiri wa ga de rago vunga.

²⁵Ka oni kúru nga ka ndu ku ati yo ya, ka oni tá nga ngba bagene yo a ya; bambiko vura du na basape, gbudagbuda du rogo arago ku bani na ku bani dunduko.

²⁶Ako gimi aboro, oni úkadi mbu zaroko, ki niwaranga rogo kuke; oni kpári ni kpenunga wa kpe tipa bangisa gude, ki nita ngbaduroni ni kpenunga ki susi; bambiko bagbarasihe nikakura rure ku ri rani.

²⁷“Mi moi ro ni baringbisi na ni bawisigi gimi aboro, ya mo ki ini gayo apai ki ringbisi he.

²⁸I dunduko nga nyanyakiri aira samungu, nandu kirikiri ki gbarasi rimo aboro; i nga sirigi na marã, i dunduko namanga pai ni wasiwasi he.

²⁹Ngbiti navuda he si ngaria, kpano ki riti he be we; i vura furusa ha vuru, bambiko gbegberẽ aboro aguari nga ku sa yo te.

³⁰I ya ti yo mirĩ feda, bambiko Yekova gindiga yo.”