Read zande Yeremaya 7 Bible Online

Yeremaya 7 - zande bible

Yeremaya 7

¹Gu pai naye koyo du Yeremaya ni yo du Yekova ni:

²“Mo rú ti ngbadimo ga Yekova bambu, ki taki pande gi pai re yo, ki ya, Oni gí gu pai nga ga Yekova, aboro Yuda dunduko narima ti agi angbadimo re ka irisa Yekova.

³Ya Yekova nga ga arimbasa ko, nga ga aYisaraere Mbori wẽ, Oni mbákadi gaoni apai na gaon, mangaapai, mi ki mbu roni oni raki rogo gi ba re.

⁴Ka oni kída nga kuti agi apa nangahe re ya: ‘Gere nga ga Yekova yekaru gu yekaru nga ga Yekova, gu yekaru nga ga Yekova.’

⁵“Bambiko ka oni mbakadi gaoni apai ni rengo na gaoni mangaapai, ka oni sari sarangbanga ni ruru he gu ni fu gu ni, mi ambú roni oni raki rogo gi ba re, rogo gu ringara nga gu mi afu fu abaroni bakuru yo nye anye kindi, kina gu ka oni arúngosi nga kungba aboro ya, wirinyaure watadu dekurugbo a ya, watadu uka kure wenesa rogo gi ba re ya, ka oni andú nga fuo kura ambori sa gaoni ima a ya.

⁸“Oni ngére, oni nakida kuti pa nangahe arengba nga ya.

⁹Oni adĩ he? watadu imo boro, manga bari, zunga he ni zire, zo fuõngua fu Bara, ndu fuo kura ambori nga agu yo oni aina nga yo ya?

¹⁰fuo gure oni ki ye ku bara bangire ku rogo gi bambu re, nga gu i nayamba ha ti rimore, niya, ‘Ani bati!’ ― ono oni ki kpatagara kindi kina kuti manga gi kere gbegberẽapai re?

¹¹Gi bambu re, nga gu i nayamba ha ti rimore, sa tihe ni yaro abatuka bangironi? Oni ngére, mi ni tire bi he, wo poi Yekova.

¹²Oni ndú awere ku rogo gi ba nga gu nadu Siro yo, yo rimore araka ni mbata, ka bi gu pai mi amangi fu he tipa gu gbegberẽpai nga ga gimi aboro aYisaraere.

¹³Awere, bambiko oni mangi agi apai dunduko re, wo poi Yekova, ho mi agumba pai ni fu roni ki niguari ngbatutu ka gumba ha, oni adega nga turoni te, na ho mi ayambu roni ni, oni akaraga nga pai te,

¹⁴si du mi amánga fu gu bambu i nayamba ti rimore wa mi amangi fu Siro, nga gu oni akida kuti ni, na fu gu ba nga gu mi afu fu roni na fu abaroni.

¹⁵Mi ki ba roni ba ngera re ku sa yo, wa mi aba awirinaroni, nga ngbatunga Efuraima dunduko.

¹⁶“Na tipa yo Yeremaya, ka mo kpári nga tipa agi aboro re ya, watadu tumba kpe ku ari na kpetambuahe tipa yo ya, ka mo zúngadi nga re ya, bambiko mi agia nga pa ro te.

¹⁷Mo abi nga gu pai i amanga rogo abaakporo nga ga Yuda na rogo agene bakporo Yerusarema yo te?

¹⁸Agude nadungura nyake, abayo ki niginda we, ade ki nikafio ngungo ka manga rukutu zozohe tipa gu nakindo nga ga ngbangbaturũ ri; i ki uka mbirimbiri amotumo fu kura ambori, ka gara gi zinga ku ri yo.

¹⁹Si nga mi i azingisa re? wo poi Yekova. A nga i nazingisa kina tiyo te, sa gayo wasiro?

²⁰Si du ya Gbia Mbori wẽ: Oni ngére, gi zinga aúka ku ri gi ba re nga gi ngariangaria zinga, ku ri aboro na anya, ku ri angua ati yo zuzu ũkpotosende; si ki kĩ ka si abisa nga ya.”

²¹Ya Yekova nga ga arimbasa ko, nga ga aYisaraere Mbori wẽ: “Oni moi gaoni zozo amotumo pati gaoni amotumo, ki ri pasio ho.

²²Bambiko ni gu rago mi akusi abaroni ringara Ezipeta yo, mi agumba nga pai fu yo watadu ruga yo tipa zozo amotumo na amotumo te.

²³Onogipaimiaruguyokuti ni re niya, ‘Oni gí sangbare, mi ki du ni gaoni Mbori, oni ki du ni gimi aboro; oni ki nipeke fuo agu apai dunduko nga gu mi arugu roni kuti ni, ya pai ki du fu roni wenengaĩ.’

²⁴Ono i agia nga sangbare watadu ye tuyo te, ono i ki nipeke kina gayo rugaapai na gu mumungo berã nga ga gbegberẽ kpotoyo yo, ki ndu ku sa yo ono ku mbata yo te.

²⁵Tona ti gu rago nga gu abaroni akuru ringara Ezipeta yo dati gi uru re, mi anikedi gimi amoyambu nga anebi fu yo, ki niguari ngbatutu ka keda yo;

²⁶ono i ata dega nga tuyo fere te, watadu ye tuyo a te, ono i ki ninyakasi riyo kindi. I mangi pai gberẽ ki susi ga abayo.

²⁷“Si du mo agúmba agi apai dunduko re fu yo, ono i adéga nga tuyo foro te. Mo ayámba yo, ono i akáraga nga pai foro te.

²⁸Mo ki ya fu yo, ‘Gere nga gu rikaaboro agia nga sangba Yekova gayo Mbori ya, ka i aida nga i rugu yo ya; rengo digi; i di he ku sa yo ngbayo yo.

²⁹Mo yére mangeriro ki ba ha ku sa yo; mo tóna kpenunga ri kungba basosono arago yo, bambiko Yekova gindiga yo ki mbu gu rika aboro ko azingi fu yo.’

³⁰“Bambiko awiri aYudo mangi gbigbitapai ku bangire, wo poi Yekova; i moi gayo kere gbegberẽ apai ku rogo gu bambu i nayamba ti rimore, ka birikosi he.

³¹I dua gbanga ba nga Tofeta, gú du rogo ngboongboorago nga ga wiri Inomi, ka zo awiriyo nga akumba na ade ku we yo; nga gu mi aruga nga yo na ni ya, naye nga ku rogo gi berã a ya.

³²Si du, mo ngére, ragoho naye, wo poi Yekova, ho i ka yamba nga ha ni berewe nga Tofeta ya, watadu ngboongboorago nga ga wiri Tnomi a ya, ono gu ngboongboorago nga Ba Imoaboro: bambiko i akpísida aboro Tofeta yo, bambiko ba rogo kura rago te.

³³Kangba agi aboro re ki du ni riahe fu azire ari, na fu anya kpotosende; boro agúndesi nga ra te.

³⁴Mi anyása fugo wasa na fugo ngbarago ti abaakporo Yuda na agene bakporo Yerusarema, na fugo badide na fugo didide a; bambiko ringara asá tihe ni kungba ha.