Read zande Yeremaya 8 Bible Online

Yeremaya 8 - zande bible

Yeremaya 8

¹“Ti gu rago re, wo poi Yekova, i akúsa ameme abakindo aYudo murãyo yo, na meme gayo abazogo, meme aboromotumo, meme anebi, na meme araki Yerusarema yo a;

²i ki gbaragi he fu uru na fu diwi na fu rimbasa aúngbangbaturũ, nga agu ahe i nakpi nyemu he ki nimangi pa ha, nga gu ndu yo fuo ho, nga gu gbata yo ho ki niirisi he; ka i adúngura nga ha watadu kpisida ha ya; si adú wa regbo anya auru sende.

³Kpio nikangba ti unga ti gu yangara yo nye dagba gi gbigbita rika ngbatunga aboro re dunduko, rogo agu aba dunduko nga gu do mi yo ku rogo ho, wo poi Yekova nga ga arimbasa ko.

⁴“Mo ayá fu yo, Ya Yekova wẽ: Ho aboro nitiwi ni, i naguari nga berewe te? Ka boro sa tini ku sa yo, ka ni karaga nga tini te?

⁵Tipagine tie sa gi rikaaboro tiyo ti ni ku sa yo re ni nyenye tikusayo? I kpatagara kuti biriki nyanyaki, i ka pa karaga tiyo.

⁶Mi ye ture ki dege ture, ono i agumba nga pai ni ruru he te; boro asa nga ti ni ti gani gbegberẽ pai te, niya, ‘Gine mangi mi?’ Aboro ni ba sa sa sa tiyo sa kina gayo apai, wa gu farasi nagba ni tiru ku rogo vura yo.

⁷Zavura gonyo ari yo u ini gau arago; na gbungu, na mbirambira, na zireime, ami rugu tira na pa rago gaami yega; ono gimi aboro aina nga ga Yekova rurungbanga te.

⁸“Waĩ rengbe oni ka ya, ‘Ani nga airatatamana, gu rugute nga ga Yekova du na ani’? Ono oni ngére, gu irazire ngua kepai nga ga abakeapai sa ha ni zire.

⁹I abá zee ku ri aboro tatamana, i ayúngura i ki di yo ku sa yo; oni ngére, i gindiga ga Yekova pai, gini tatamana du rogo yo yo?

¹⁰Si du mi ka fu adiayo ti ni fu akurayo na gayo aati fu abadibeyo, bambiko tona ti gu umba ni dati gu bakumba ni aboro ni ba sa sa du na nyemu iraira mokiisa ti yo; tona ti nebi dati boromotumo aboro ni ba sa sa namanga pai ni biriki.

¹¹T wiisi ga gimi aboro oro ni kungba pai niya, ‘Zereda, zereda,’ ho adu nga zereda ni ya.

¹²I adu na zee ho i amanga kere gbegberẽ pai ni? Óo, i adu nga na zee wa sa te; i aina nga pa uwa a te. Si du i ka tiwa ti ni dagba agu yo yo natiwa; i adú ni sikasika yo ho mi ka mbusa yo ni, wo poi Yekova.

¹³Mi anyása yo dunduko, wo poi Yekova. Rindikakue adu nga ti bakakue te, vurumo a ti angua vurumo te; akpehe ugu du, gu he mi afu fu yo si nyasi be yo dũ.”

¹⁴Tipagine ani nasunga ti ni kindi? Ani dúngura tirani sa, ani ndú ku rogo abaakporo ngapa ka kpika yo; bambiko Yekova gaani Mbori ringbisi rani sa kpio, ki fu ime kere kpepasio fu rani sa mbira ha, bambiko ani ingi pai kuti Yekova.

¹⁵Ani angere tipa zereda, ono wene pai aye nga te, tipa rago husa, ono oni ngére, kina gbudagbuda ki du.

¹⁶“Gu vudarago nga ga afarasi gi he tona Dana yo; ringara dunduko nakio kuti woro kpe gayo abaafarasi. Ami naye ka rita ringara dunduko na agu ahe hisi he dunduko, bakporo na agu yo naraka rogo ho.

¹⁷Bambiko oni ngére, mi nakeda awo ku dagba roni, kere awo adu nga ziga ra ti ni ya, ami adéwa roni,” wo poi Yekova.

¹⁸Ako ka mi rengbe na ngarãsa tire kuti rungo, kpotore yo na kaza vure yo.

¹⁹Oni dége turoni, woro kpe gimi aboro si rogo tuturu ringara ku bani na ku bani: “Yekova du Siona yo te? Gaha Bakindo rogo ho te?” “Tipagine i agara gi zinga ti ni ku ri yo ni gayo sese kpiaahe, na gayo kungba kpiaahe?”

²⁰“Rago ke ahe susi, faarago digi, ka ani ata bata nga ya.”

²¹Ngbadure naima tipa gu oro nga ga gimi aboro, mi nakpara ni kpenunga, kiga zi re.

²²A nga tome ngua nga ngua kaza Girada yo te? Binza yo te? Tipagine tie i ahusa nga gu kaza nga ga gimi aboro ti ni ya?