Read zande Abia Kpenunga 1 Bible Online

Abia Kpenunga 1 - zande bible

Abia Kpenunga 1

¹Ako bakporo sungu ni kina sa ha, nga gu naahi be aboro! Si sa tihe wa dekurugbo, nga gu naadu ni bakere he dagba arikaaboro! Gu naadu wa wiri bakindo nga de dagba aringara, sa tihe ki du ni zizi he.

²Si nakpara ni kere he yuru, aume ki nifuku ti abagaha. Dagba akpinyemuhe yo dunduko, a nga boro ho sa nangarãsa ha te. Abadiaha dunduko mangi pai fu he ni kina biriki, i sa tiyo ni avuraha.

³I zi Yuda ni zizi he be rungo, na be bakere sunge wa kanga Si naraka awere dagba arikaaboro, ono si abi nga baongoda te. Abarungosihe dunduko nadusia ha rago gaha dungbapai.

⁴Agu agene ndu ku Siona yo nakpara kpe, bambiko a nga boro sa ye tipa ringbisiringbisi agbuu te. Gaha angbadimo bakporo dunduko du wa kina ga bate, gaha aboromotumo nauko. Gaha ngasu ade du ni rungosirungosi yo, ono si ni tihe nambu ni kere he.

⁵Airafuda Siona sa tiyo ni abarumbatayo, avuraha du zezeredi, bambiko Yekova rungosi he tipa gaha badungu tiandika. Awirihe merẽ ku sa yo ni zizi yo ku barangba avuraha.

⁶Agu aboro nga aboro Siona gayo wene ngbanya guari ti yo. Gayo abazogo sa tiyo wa anzungba abi nga banambu ya. I oro barangba bado yo zanga ome.

⁷Ti ga Yerusarema rago gberãngbi na rungo si natingida pa gu wene ahe dunduko naadu ni gaha ti agu arame naadu mbata. Ni gu rago gaha aboro ati ku be avuraha boro adu nga ho sa ka unda ha te. Airafudifudipai abi he, i amomu amoma ti rago gaha yangara pai.

⁸Yerusarema mangi ingapai ni gbegberẽ he; si du si sa tihe wa birikobiriko he. Agu yo naairisa ha dunduko napayasi he apayasi, bambiko i bi gaha zee. Ii, si ni tihe nauko, ki sa kpakpuhe ku sa yo.

⁹Gaha biriko adu ti kina gaha abaukadi. Si aberã nga pa gu pai nikadu ti digida gaha rago te; si du tigo ho ki du ni baiiriwo ho; bangarãsihe ti ni te. “Ako Yekova, mo bí nga gi gberãngbi, mbiko vurare sambua tini!”

¹⁰Irafudifudipai taĩ beni ku ri gaha wene ahe dunduko; si bi arikaaboro rimi ku rogo gaha kparakpara ziazia ba ni rengo, nga agu yo mo aza yo ka i rimi nga ku dagba ga rimbasa yo ya.

¹¹Gaha aboro dunduko nauko wa i nagbata riahe; i bagi gayo wene ahe tipa riahe ka ungasi omeyo na ni. “Ako Yekova, mo ngére ki bi he, bambiko mi du ni payapaya re.”

¹²“Si wa kungba pai fu roni, agu roni nasusa dunduko? Oni ngére, ka bi nga, si ngia rungo ho wa du gi rungo, nga gu ye ku ri re, nga gu mbusa fu Yekova ha fere ti uru gako kere zinga.

¹³“Ko kedi we ari yo, si zorõ ku rogo amemere, ko re pio si zi ndure, ko karaga re ku sa yo; ko mangi re mi ronda, he ki nimaki re rogo uru pitipiti.

¹⁴“Ko dungura gi tiandika dunduko ni beko wa gonga; ki moi he ku gorõre; ko mangi omere si bati; Gbia kusi re ku be agu yo mi arengba nga ka guari be yo ya.

¹⁵“Gbia simbi gimi airaome dunduko ku bangbanda re wa kungba ahe; ko yambu gbuu kuti re i dekpera gimi aparanga. Gbia simbi ga Yuda aboro wa i nisimbi he bapira imekakue yo.

¹⁶“Tipa agi apai re mi akpara ti ni; bangire naga na aume; bambiko bangarãsire ka ungasi omere turũ ko aturã ti re. Awire ni kina sa yo, bambiko vurare di be re.”

¹⁷Siona nataã abehe; ono boro ho sa ka ngarãsa ha te. Yekova fu rugute kuti Yakoba, ya agu yo du kirikiri pati ko i du ni afudi ko. Yerusarema sa tihe wa birikobiriko he dagba yo.

¹⁸“Yekova du ni ruru ko; bambiko mi sa mungu kuti sangbako. Oni aboro dunduko, oni gí he, oni ngére ka bi gi rungo. Gimi ngasu ade na gimi paranga akumba i ga na yo ni zizi yo.

¹⁹“Mi ayambu akpinyemure, ono i anangi re. Gimi aboromotumo na gimi abaakumba akpiki bakporo yo, ho i agbata riahe ni ka ungasi ungayo na ni.

²⁰“Ako Yekova, mo ngére, bambiko mi du rogo rungo, mbisimore du rogo gbarakagbaraka pai. Kpotore yo udi tihe rogo re yo, bambiko mi nidu ni irasamungu gbe. Gene bakporo yo basape naimo aboro; dimoyo a nga kina kpio.

²¹“Mo gí he waĩ mi auko, boro ho ka ngarãsi re te. Avurare dunduko gi pa gi kere rungo; i na ngbarago wa mangi mo ho. Mo yé na gu uru mo ataki pande pa ha, i adú wa kina re.

²²“Gayo gbegberẽ mangapai yé dunduko ku bara bangiro; mo mángi fu yo wa mo amangi fere tipa gimi tiandika; bambiko gimi auko du ni dungu he, he namaka re amaka kpotore yo.”